టోక్యో ఒలింపిక్స్: ప్రపంచంలోనే అతిపెద్ద క్రీడా ఉత్సవం ప్రత్యేకతలేంటి? భారత్ నుంచి ఎవరెవరు వెళ్తున్నారు?

ప్రతి నాలుగేళ్లకు ఒకసారి ఒలింపిక్స్ జరుగుతాయి. ప్రణాళిక ప్రకారం 2020లోనే ప్రస్తుత ఒలింపిక్స్ జరగాలి. అయితే, కరోనావైరస్ వ్యాప్తి నడుమ వీటిని వాయిదా వేశారు.

దీంతో ఏడాది ఆలస్యంగా, జులై 23 నుంచి ఆగస్టు 8 వరకు జపాన్‌లోని టోక్యోలో ఈ పోటీలు జరగబోతున్నాయి.

అయితే, ప్రారంభ కార్యక్రమానికి రెండు రోజుల ముందే, అంటే జులై 21నే ఫుకుషిమాలో ‘‘సాఫ్ట్‌బాల్’’ పోటీలు మొదలవుతాయి.

33 విభాగాల్లో 339 పతకాల కోసం ఈ సారి క్రీడాకారులు పోటీ పడబోతున్నారు. తొలి పతాక ప్రధాన కార్యక్రమం జులై 24న నిర్వహిస్తారు.

ఇప్పుడు కూడా ఈ పోటీలతో కరోనావైరస్ కేసులు పెరగవచ్చనే ఆందోళనలు వినిపిస్తున్నాయి. అయితే, అన్ని రకాల జాగ్రత్తలు తీసుకున్న అనంతరం జపాన్ ప్రభుత్వం, ఇంటర్నేషనల్ ఒలింపిక్స్ కమిటీ పచ్చజెండా ఊపాయి.

టోక్యోలో జరుగుతున్న ఈ వేడుకలను జపాన్ మినహా విదేశీయులు నేరుగా చూసేందుకు అనుమతి లేదు.

ఇదివరకు కూడా మూడు సార్లు (1964, 1972, 1988) ఒలింపిక్స్‌కు జపాన్ ఆతిథ్యం వహించింది.

భారత్‌లో చూడడం ఎలా?

ఒలింపిక్స్ ప్రారంభ వేడుకల నుంచి ఆగస్ట్ 8న చివరి రోజు పోటీల వరకు అన్ని కార్యక్రమాలు భారత్‌లో కొన్ని టీవీ చానళ్లలో, ఆన్‌లైన్‌లో చూడొచ్చు.

ఇండియా పాల్గొనే ఈవెంట్లను దూరదర్శన్ నెట్‌వర్క్ హిందీలో ప్రసారం చేస్తుంది.

సోనీ స్పోర్ట్స్ నెట్‌వర్క్ భారత్‌లో ఈ ప్రసారాలను తనకు చెందిన 5 నెట్‌వర్క్ చానళ్లు సోనీ సిక్స్, సోనీ టెన్ 1, సోనీ టెన్ 2, సోనీ టెన్ 3, సోనీ టెన్ 4లలో నాలుగు భాషలలో అందిస్తోంది.

వీటితో పాటు'సోనీ లైవ్' ప్లాట్‌ఫాంలో కూడా ఈవెంట్లను చూడొచ్చు. టీవీ, స్మార్ట్‌ఫోన్ రెండింట్లోనూ ఇది అందుబాటులో ఉంటుంది.

టోక్యో ఒలింపిక్స్ చిహ్నం ఏమిటి?

టోక్యో ఒలింపిక్స్ చిహ్నాన్ని ‘‘మిరాయిటోవా’’గా పిలుస్తున్నారు. దీన్ని జపాన్ సంప్రదాయ నీలం రంగుతో సిద్ధంచేశారు.

జపనీస్ సాహిత్యంలో మిరాయిటోవాకు ప్రత్యేక స్థానముంది. ఇటు సంస్కృతి, అటు ఆధునికీకరణలను ఇది ప్రతిబింబిస్తుంది.

జపనీస్‌లో మిరాయ్ అంటే భవిష్యత్తు. టోవా అంటే శాశ్వతమైనది అని అర్థం.

పతకాలను ఎలా తయారుచేశారు?

పోటీల్లో గెలుపొందే క్రీడాకారులకు ఇచ్చే పతకాలను పాత ఎలక్ట్రానిక్ వస్తువులు, ఫోన్ వ్యర్థాలతో తయారుచేశారు. దీని కోసం పాత ఫోన్లు, ఎలక్ట్రానిక్ వస్తువులను తమకు ఇవ్వాలని 2017 ఫిబ్రవరిలో ప్రజలను ఒలింపిక్స్ నిర్వాహకులు అభ్యర్థించారు.

2010లో వాంకూవర్‌లో జరిగిన ఒలింపిక్స్‌లోనూ ఇలా ఎలక్ట్రానిక్ వస్తువులతోనే పతకాలను తయారుచేశారు.

పతకం వెనుకవైపు టోక్యో ఒలింపిక్స్ లోగో ఉంటుంది. మరోవైపు ఒలింపిక్స్ స్టేడియానికి ముందువైపు.. విజయానికి చిహ్నంగా భావించే గ్రీక్ దేవత ‘‘నైక్’’ విగ్రహం కూడా ఏర్పాటుచేశారు.

ఒలింపిక్స్ జ్వాల మార్చి 25నే

గ్రీస్‌లోని చరిత్రాత్మక ఒలింపియా పట్టణంలో హెరా దేవాలయంలో గత ఏడాది మార్చి 12నే టోక్యో ఒలింపిక్స్ జ్వాలను వెలిగించారు. గ్రీస్‌లోని పనాథెనియక్ స్టేడియంలో నిర్వహించిన ప్రత్యేక కార్యక్రమంలో ఈ జ్వాలను జపాన్‌కు అందించారు.

జపాన్‌లో మార్చి 25నే టార్చ్ రిలే మొదలైంది. 2011లో సునామీతో తీవ్రంగా ప్రభావితమైన ఫుకుషిమాలో ఈ కవాతు మొదలైంది.

121 రోజులపాటు 47 ప్రావిన్స్‌లలో తిరిగిన అనంతరం చివరగా జులై 23తో ఈ ప్రదర్శన ముగుస్తుంది. టోక్యో ఒలింపిక్స్ వెబ్‌సైట్‌లో దీన్ని లైవ్ ఇస్తున్నారు.

జపాన్‌లోని స్థానికులు రోడ్డుకు ఇరువైపులా నిలబడి ఈ ప్రదర్శనను చూడొచ్చని, సామాజిక దూరం తప్పనిసరిగా పాటించాలని టోక్యో ఒలింపిక్స్ సీఈవో తొషిరో ముత్సు చెప్పారు.

టోక్యో ఒలింపిక్స్ ప్రత్యేకత ఏమిటి?

ఈ సారి ఐదు ప్రత్యేక స్పోర్ట్స్ విభాగాలను కూడా ఒలింపిక్స్‌లో చేర్చారు. సర్ఫింగ్, స్కేట్ బోర్డింగ్, స్పోర్ట్స్ క్లైంబింగ్, కరాటే, బేస్‌బాల్‌లను కొత్తగా ఒలింపిక్స్‌లో భాగం చేశారు.

ఇటీవల కాలంలో రద్దుచేసిన మరికొన్ని స్పోర్ట్స్ కూడా మళ్లీ ఒలింపిక్స్‌లో భాగం కాబోతున్నాయి.

ఎంత మంది భారత క్రీడాకారులు అర్హత సాధించారు?

ఇప్పటివరకు భారత్ నుంచి 116 మంది టోక్యో ఒలింపిక్స్‌లో పాల్గొనేందుకు అర్హత సాధించారు.

అర్చరీ

అథ్లెటిక్స్

జావెలిన్ త్రో క్రీడాకారులు నీరజ్ చోప్రా, శివపాల్ సింగ్ పతకాలు తీసుకొస్తారని ఇప్పటికే విశ్వాసం వ్యక్తంచేశారు.

టోక్యో ఒలింపిక్స్‌లో 20 మీ. రేస్ వాక్‌లో పాల్గొనేందుకు కేటీ ఇర్ఫాన్ మార్చి 2019లో అర్హత సాధించారు. టోక్యోలో పాల్గొనేందుకు అర్హత సాధించిన తొలి భారత అథ్లెట్ ఆయనే.

4x400 మిక్సిడ్ రేస్‌లో పాల్గొనేందుకు అర్హత సాధించిన వారిలో ఏసియన్ గేమ్స్ స్వర్ణ పతక విజేత మహమ్మద్ అనాస్ కూడా ఉన్నారు.

2020 వరల్డ్ అథ్లెటిక్స్ ఛాంపియన్‌షిప్‌లో భారత్‌కు వీరు మూడో స్థానాన్ని తెచ్చిపెట్టారు.

బాక్సింగ్

ఫెన్సింగ్

తొలిసారిగా ఒలింపిక్స్‌లో ఫెన్సింగ్‌లో భారత తరఫున పాల్గొనేందుకు భవానీ దేవి అర్హత సాధించారు.

హంగరీలో జరిగిన బుడాపెస్ట్ సాబెర్ వరల్డ్ కప్‌లో పాల్గొనడం ద్వారా ఆమె ఒలింపిక్ టికెట్ సాధించారు.

హాకీ

ఒలింపిక్స్‌లో పాల్గొనేందుకు భారత్‌లోని ఇటు పురుషుల జట్టు, అటు మహిళల జట్టు.. రెండు జట్లూ అర్హత సాధించాయి.

16-16 మంది సభ్యులున్న ఈ జట్లు నవంబరు 2019లో అర్హత సాధించాయి.

వరల్డ్ ర్యాంకింగ్స్‌లో భారత పురుషుల హాకీ జట్టు నాలుగో స్థానంలో ఉంది. మహిళల జట్టు మూడో స్థానంలో ఉంది.

షూటింగ్

టేబుల్ టెన్నిస్

ఒలింపిక్స్‌లో పాల్గొనేందుకు శరత్ కమల్ అర్హత సాధించడం ఇది నాలుగోసారి.

శరత్ కమల్, మణికా బాత్రా మిక్సిడ్ డబుల్స్‌ విభాగంలోనూ పాల్గొంటారు.

రెజ్లింగ్

బ్యాడ్మింటన్

మహిళ సింగిల్స్‌కు పీవీ సింధు, పురుషుల సింగిల్స్‌కు సాయి ప్రణీత్ అర్హత సాధించారు.

మెన్స్ డబుల్స్ విభాగంలో తొలిసారిగా సాత్విక్‌ సాయిరాజ్ రంకిరెడ్డి, చిరాగ్ శెట్టి పాల్గొనబోతున్నారు.

ఈక్వెస్ట్రియన్

ఒలింపిక్స్‌లో భారత్ తరఫున ఈక్వెస్ట్రియన్ క్రీడల్లో పాల్గొనడం గత రెండు దశాబ్దాల్లో ఇదే తొలిసారి.

ఆసియన్ గేమ్స్‌లో రజత పతకాన్ని సాధించిన ఫవాద్ మీర్జా భారత్‌కు ప్రాతినిథ్యం వహించనున్నారు.

మరోవైపు మీరాబాయ్ చాను వెయిట్ లిఫ్టింగ్‌లో పాల్గొనేందుకు అర్హత సాధించారు.

కోవిడ్-19 నడుమ కొత్త మార్పులు ఇవే..

కరోనావైరస్ వ్యాప్తి నడుమ కొత్త నిబంధనలు స్పష్టంగా తెలియజేసేందుకు 33 పేజీల పుస్తకాన్ని ఒలింపిక్స్ నిర్వాహకులు విడుదల చేశారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)