కరోనావైరస్: రాష్ట్రాల్లో లాక్ డౌన్ ఎత్తేయడంపై ప్రణాళిక విడుదల చేసిన డోనల్డ్ ట్రంప్

'ఓపెనింగ్ అప్ అమెరికా అగైన్' లక్ష్యంగా మొత్తం మూడు దశల్లో అమెరికాలోని వివిధ రాష్ట్రాలు లాక్ డౌన్‌ను ఎత్తేయవచ్చని అధ్యక్షుడు డోనల్ట్ ట్రంప్ సూచించారు.

ఫెడరల్ ప్రభుత్వ సాయంతో గవర్నర్లే తమ పరిస్థితిని చక్కదిద్దుకోవచ్చని హామీ ఇచ్చారు. కొన్ని రాష్ట్రాలు ఈ నెలలోనే తిరిగి తమ కార్యకలాపాలు ప్రారంభించవచ్చని కూడా ఆయన సూచించారు.

ట్రంప్ ఇంకా ఏం చెప్పారు?

రోజువారీ జరిగే సమీక్షా సమావేశంలో భాగంగా భాగంగా వివిధ రాష్ట్రాల గవర్నర్లతో మాట్లాడిన ట్రంప్.. అమెరికాను తిరిగి పట్టాలపైకి ఎక్కించడమే తాము చేయాల్సిన తదుపరి యుద్ధమని వ్యాఖ్యానించారు.

“అమెరికా, అమెరికా దేశస్థులు తిరిగి తమ పనిని ప్రారంభించాలనుకుంటున్నారు. దేశవ్యాప్త లాక్ డౌన్ ఈ సమస్యకు దీర్ఘకాలిక పరిష్కారం కాదు” అని ట్రంప్ అన్నారు.

ఆరోగ్యవంతులు కొన్ని నియమ నిబంధనలను పాటిస్తూ తిరిగి తమ విధుల్లో చేరవచ్చని సూచించారు. సామాజిక దూరం పాటించడం కొనసాగుతుందని, అలాగే అనారోగ్యంతో బాధపడే వారు ఇంటి దగ్గరే ఉండవచ్చని తెలిపారు.

అమెరికా ఆర్థిక కార్యకలాపాలు ఎట్టి పరిస్థితుల్లోనూ తిరిగి ప్రారంభం కావాల్సిందేనని ఆయన అభిప్రాయపడ్డారు. ప్రస్తుత పరిస్థితుల్లో చాలా జాగ్రత్తగా అడుగులు వేయాలన్న ట్రంప్.. ఈ విషయంలో రాష్ట్ర గవర్నర్లు తమ పరిస్థితులకు అనుగుణంగా చాలా వేగంగా చర్యలు తీసుకోవాలని కోరారు.

ట్రంప్ ప్రణాళిక

మొత్తం 3 విడతలుగా అమెరికా ఆర్థిక వ్యవస్థ పునఃప్రారంభం కానుంది. ప్రతి ఫేజ్ 14 రోజుల పాటు కొనసాగుతుంది.

మొదటి విడతలో భాగంగా ప్రస్తుతం లాక్ డౌన్‌లో కొనసాగుతున్న నిబంధనలే కొనసాగుతాయి. అయితే రెస్టారెంట్లు, ప్రార్థనాస్థలాలు, క్రీడా ప్రాంగణాలు సామాజిక దూరం నియమాలను నిర్లక్ష్యం చెయ్యకుండా తమ కార్యకలాపాలను ప్రారంభించవచ్చు.

వైరస్ తిరిగి విజృంభించడం లేదన్న స్పష్టమైన ఆధారాలు లభించిన తర్వాతే ఫేజ్ 2 మొదలవుతుంది. అందులో భాగంగా పాఠశాలలు, బార్లు, సాధారణ ప్రయాణాలు తిరిగి ప్రారంభమవుతాయి. అది కూడా నిర్దిష్ట పరిస్థితుల మధ్య మాత్రమే.

మూడో ఫేజ్ విషయానికొస్తే వైరస్ ప్రభావం పూర్తిగా తగ్గి కేసుల సంఖ్య కూడా తగ్గుతోందన్న నమ్మకం రాష్ట్రాలకు కలిగిన తరువాత మాత్రమే ఇది మొదలవుతుంది. అప్పుడు కూడా సామాజిక దూరం పాటించడం తప్పనిసరి. సభలు, సమావేశాలు జరుపుకోవచ్చు. వృద్ధాశ్రమాలు, అనాథాశ్రమాలు, ఆస్పత్రులు, బార్లపై ఉన్న ఆంక్షల్ని మరింత సడలిస్తారు.

కేసుల సంఖ్య బాగా ఎక్కువగా ఉన్న చోట లాక్ డౌన్ ఎత్తేయడానికి మరి కాస్త సమయం పడుతుంది.

మే 1 నుంచి దేశంలో కార్యకలాపాలను ప్రారంభించాలని ట్రంప్ ప్రభుత్వం గతంలో భావించింది. అయితే బుధవారం మాత్రం వీలైతే కొన్ని రాష్ట్రాలు అంత కంటే ముందే తమ సూచనలు అనుసరిస్తూ తిరిగి తమ కార్యకలాపాలను ప్రారంభించవచ్చని ట్రంప్ సూచించారు.

అయితే వీలైనంత త్వరగా లాక్ డౌన్‌ను ఎత్తేయాలన్న ట్రంప్ సూచనల్ని, కొన్ని రాష్ట్రాల గవర్నర్లు, వైద్య నిపుణులు వ్యతిరేకిస్తున్నారు.

“మనం మరీ ఎక్కువగా ఆశపడుతున్నట్లుంది. సామాజిక దూరం నియమాల్ని సడలించే నిర్ణయం తీసుకోవడం కన్నా ముందు దేశంలో చాలా ప్రాంతాల్లో ఇంకా వైరస్ నిర్ధరణ పరీక్షల్ని నిర్వహించాల్సిన అవసరం ఉంది” అని ప్రభుత్వ సాంక్రమిక వ్యాధుల విభాగం నిపుణులు డాక్టర్ ఆంథోని ఫౌసీ అన్నారు.

న్యూయార్క్ గవర్నర్ కూడా మే 15 వరకు స్టే ఎట్ హోమ్ ఉత్తర్వులు అమల్లో ఉంటాయని గురువారం స్పష్టం చేశారు.

అయితే మిచిగాన్, ఒహియో, విస్కాన్సిన్, ఇల్లినోయిస్, ఇండియానా, కెంటకీ తదితర రాష్ట్రాల గవర్నర్లు మాత్రం తమ ప్రాంతాల్లో తిరిగి కార్యకలాపాలను ప్రారంభించడంలో కలిసి పని చేస్తామని ప్రకటించారు.

ఇతర దేశాలు ఏం చేస్తున్నాయి?

ఇవి కూడా చదవండి.

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)