కరోనావైరస్: డయాబెటిస్, బీపీ, ఆస్తమా ఉన్నవారికి ఈ వైరస్ ప్రాణాంతకమా.. సోకితే ఏం చేయాలి

కరోనావైరస్ ఎవరికైనా వ్యాపించవచ్చు. కానీ, ఇప్పటికే కొన్ని ఆరోగ్య సమస్యలు ఉన్న వారికి లేదా వయసు పైబడిన వారికి ఇది చాలా ప్రాణాంతకం.

‘ద లాన్సెట్ జర్నల్‌’లో ప్రచురితమైన ఒక అధ్యయనం ప్రకారం వృద్ధులు.. అధిక రక్తపోటు, డయాబెటిస్ ఉన్నవారికి కరోనా వైరస్ వల్ల ప్రమాదం ఎక్కువ.

చైనాలో వుహాన్‌లోని రెండు ఆస్పత్రుల్లో ఉన్న 191 మంది రోగులపై ఈ అధ్యయనం చేశారు. కరోనా వల్ల చనిపోయినవారు లేదా కోలుకుని ఆస్పత్రి నుంచి డిశ్చార్జ్ అయినవారిపై ఈ పరిశోధనలు చేశారు.

వీరిలో 135 మంది జిన్‌జియాన్ ఆస్పత్రి, 56 మంది వుహాన్ పల్మనరీ ఆస్పత్రి రోగులు. వీరిలో 137 మంది ఆస్పత్రి నుంచి డిశ్చార్జ్ అవగా, మరో 54 మంది మృతి చెందారు.

రోగుల నుంచి సేకరించిన మొత్తం శాంపిళ్లలో 58 మందికి హైపర్‌టెన్షన్, 36 మందికి డయాబెటీస్, 15 మందికి హృదయ సంబంధిత వ్యాధులు ఉన్నట్టు తేలింది.

ఈ 191 మంది రోగుల వయసు 18 నుంచి 87 ఏళ్ల మధ్యలో ఉంది. వీరిలో ఎక్కువ మంది పురుషులే.

ఈ పరిశోధనలో సీరియస్ వ్యాధులు, మరణానికి సంబంధించిన ప్రమాదాలను పరిశీలించారు.

కరోనావైరస్‌తో చనిపోయినవారిలో వృద్ధులున్నారు. ఆస్పత్రుల్లో చేర్చేటప్పటికే వారిలో సెప్సిస్(ఇన్ఫెక్షన్ వల్ల అవయవాలు పనిచేయడం మానేయడం) లక్షణాలు కనిపించాయి. వారికి హైబీపీ, డయాబెటీస్ లాంటి వ్యాధులు ఉన్నాయి.

అయితే, శాంపిల్ సైజ్ చిన్నది కావడం వల్ల పరిశోధన ఫలితాల వివరణ పరిమితం అయ్యుండొచ్చని పరిశోధకులకు అనిపిస్తోంది.

భారత్‌లో డయాబెటీస్ రోగుల సంఖ్య ఎక్కువ. ఇంటర్నేషనల్ డయాబెటీస్ ఫౌండేషన్ గణాంకాల ప్రకారం భారత్‌లో 2019 నాటికి డయాబెటీస్ రోగుల సంఖ్య 7.7 కోట్లు. కరోనావైరస్‌ పాజిటివ్ వచ్చిన వారికి డయాబెటీస్ కూడా ఉందని చెబుతున్నారు. అయితే అలా ఎంతమంది రోగులు ఉన్నారు అనే లెక్కలు అందుబాటులో లేవు.

గ్లోబల్ ఆస్తమా రిపోర్ట్-2018 ప్రకారం భారత్‌లోని 131 కోట్ల జనాభాలో 6 శాతం మంది పిల్లలకు, 2 శాతం వయోజనులకు ఆస్తమా ఉంది.

మీకు ఇప్పటికే ఏదైనా వ్యాధి ఉండి, కరోనావైరస్ వస్తుందని భయంగా ఉంటే, అలాంటప్పుడు మీరు ఏం చేయాలో నిపుణులు చెబుతున్నారు.

ఎక్కువ ప్రమాదం ఎవరికి?

మీకు ఇప్పటికే ఏదైనా వ్యాధి ఉంటే, కరోనా వైరస్ ఇతరులతో పోలిస్తే త్వరగా వస్తుందని ఏం లేదు. కానీ ఒకసారి ఇన్ఫెక్షన్‌కు గురైతే, ఆ తర్వాత మీ పరిస్థితి మిగతా రోగుల కంటే సీరియస్‌గా ఉండచ్చు.

కరోనా వైరస్ ఇన్ఫెక్షన్ వల్ల వృద్ధులు, ఇప్పటికే శ్వాస సంబంధిత వ్యాధుల(ఆస్తమా)తో ఇబ్బంది పడుతున్నవారు, రోగనిరోధక శక్తి లేకపోవడం, మధుమేహం, గుండె సంబంధిత వ్యాధులు లాంటివి ఉన్నవారు తీవ్ర అనారోగ్యానికి గురయ్యే అవకాశం ఎక్కువగా ఉంటుంది.

చాలామంది రోగులు కొన్ని రోజులు విశ్రాంతి తర్వాత కరోనా ఇన్పెక్షన్ నుంచి కోలుకుంటారు. చాలా మందిలో ఇది తీవ్రం కావచ్చు. అరుదుగా దీనివల్ల ప్రాణాపాయం కూడా ఉండచ్చు. దీని లక్షణాలు మిగతా వ్యాధుల్లాగే అనిపిస్తుంటాయి. అంటే దగ్గు-జలుబు, జ్వరం, శ్వాస ఇబ్బందులు లాంటివి ఉంటాయి.

ఆస్తమా ఉంటే ఏం చేయాలి?

ఆస్తమా ఉన్నవారు డాక్టర్ సూచించిన ఇన్‌హేలర్ వాడుతూ ఉండాలి. అలా చేయడం వల్ల ఏదైనా వైరస్ నుంచి వచ్చే ప్రమాదం తగ్గుతుంది.

మీ ఇన్‌హేలర్ ప్రతిరోజూ మీతోనే ఉంచుకోవాలి. మీకు ఆస్తమా పెరుగుతున్నట్టు అనిపిస్తే, మీకు కరోనావైరస్ వచ్చే ప్రమాదం ఉంది. అలాంటప్పుడు హెల్ప్ లైన్ నంబర్‌ను సంప్రదించాలి.

డయాబెటిస్ ఉంటే ఏం చేయాలి?

టైప్ వన్, టైప్ టూ డయాబెటిస్ ఉన్నవారిలో కరోనావైరస్ లక్షణాలు తీవ్రంగా ఉండవచ్చు.

"కరోనావైరస్ లేదా కోవిడ్-19 డయాబెటిస్ రోగుల్లో కాంప్లికేషన్స్ సృష్టించవచ్చు. మీకు డయాబెటీస్ ఉంటే, దగ్గు, జ్వరం, శ్వాస తీసుకోవడంలో ఇబ్బందులు వస్తుంటే, మీ బ్లడ్ షుగర్ చెక్ చేసుకుంటూ ఉండాలి. డాక్టర్ సాయం తీసుకోవాలి" అన్నారు డయాబెటీస్ యూకే హెడ్ ఆఫ్ కేర్ డాన్ హావర్త్.

బ్రిటన్ ప్రభుత్వ చీఫ్ మెడికల్ అడ్వైజర్ వయోవృద్ధులు తమకు తాముగా దూరంగా ఉండాల్సిన అవసరం లేదు అని కొత్తగా సలహా ఇచ్చారు.

"పెద్ద వయసు వారి ఆరోగ్యాన్ని వారి కుటుంబాలు, స్నేహితులు జాగ్రత్తగా చూసుకోవడం చాలా అవసరం. వారి ఆరోగ్యం గురించి మీకు ఏదైనా సందేహం లేదా గందరగోళం ఉంటే దాని గురించి మరింత సమాచారం తెలుసుకోండి" అని ఏజ్ యూకే చారిటీ డైరెక్టర్ కెరోలైన్ అబ్రహాం చెప్పారు.

ఇప్పటికే ఏదైనా వ్యాధి ఉంటే?

హై బ్లడ్ ప్రెజర్, శ్వాస సంబంధిత సమస్యలు, రోగ నిరోధక శక్తి తక్కువగా ఉన్నవారు వైరస్ రాకుండా జాగ్రత్తలు తీసుకోవాలి.

కరోనావైరస్ వల్ల కూడా శ్వాస సంబంధిత సమస్యలు రావచ్చు. ఈ వైరస్ గొంతు, శ్వాసనాళం, ఊపిరితిత్తులపై ప్రభావం చూపిస్తుంది. దాంతో, ఇప్పటికే ఏవైనా సమస్యలు ఉంటే, వాటికి చికిత్స తీసుకోవడం సవాలుగా మారుతుంది. ఒకవేళ ఫ్లూ లక్షణాలు కనిపిస్తే, వెంటనే డాక్టర్ సలహాలు తీసుకోవాలి.

మీరు పొగతాగుతున్నారా?

ఎక్కువగా పొగతాగేవారు, ఈ వైరస్ ప్రమాదాన్ని తగ్గించడానికి పొగతాగడం వదిలేయాలని పబ్లిక్ హెల్త్ చారిటీ 'యాష్' చీఫ్ ఎగ్జిక్యూటివ్ దెబోరాహ్ ఆర్నాట్ సూచించారు.

"పొగతాగేవారికి శ్వాసనాళ సంబంధిత ఇన్ఫెక్షన్లు వచ్చే అవకాశాలు ఎక్కువగా ఉంటాయి. పొగతాగనివారితో పోలిస్తే వీరికి న్యూమోనియా వచ్చే ప్రమాదం రెట్టింపు ఉంటుంది. పొగతాగడం మానేయడం వల్ల మీకు చాలా రకాల ప్రయోజనాలు ఉంటాయి. కరోనావైరస్ ఈ సమస్య నుంచి ప్రేరేపితమై, పరిస్థితి తీవ్రం కాకముందే వారు పొగతాగడం వదిలేయడం మంచిది" అని అన్నారు.

శ్వాస తీసుకోగలిగేలా రోగికి సాయం చేయడం, శరీరం వైరస్‌తో సమర్థంగా పోరాడగలిగేలా వారి రోగనిరోధక శక్తిని పెంచడం అనే వాటిపై కరోనావైరస్‌కు చికిత్స ఆధారపడి ఉంటుంది.

భారత్‌లో ఇప్పటివరకూ 147 కరోనావైరస్ కేసులు బయటపడ్డాయి. వీరిలో ముగ్గురు చనిపోయారు.

ఈ వైరస్ వల్ల ఇప్పటివరకూ 146 దేశాలు ప్రభావితం అయ్యాయి. 1,53,648 ఇన్ఫెక్షన్ కేసులు నమోదైనట్లు ధ్రువీకరించారు.

కరోనావైరస్ హెల్ప్‌లైన్ నంబర్లు: కేంద్ర ప్రభుత్వం - 01123978046, ఆంధ్రప్రదేశ్, తెలంగాణ - 104

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)