ఆంధ్ర, తెలంగాణ రాష్ట్రాలలో కరోనావైరస్ వ్యాప్తి ఎలా ఉంది?

17 మార్చి 2020

తెలంగాణలో సోమవారం మరో కరోనా కేసు నిర్ధరణ అయింది. దీంతో తెలంగాణలో కరోనా వచ్చిన వారి సంఖ్య నాలుగుకు చేరింది. అయితే, అందులో మొట్టమొదటి వ్యక్తికి చికిత్స ఫలించి వ్యాధి తగ్గడంతో ఇప్పటికే ఇంటికి పంపేశారు. మిగతావారు ఆసుపత్రిలో చికిత్స పొందుతున్నారు.

క్వారంటైన్ కేంద్రంగా గచ్చిబౌలి స్టేడియంను మార్చబోతున్నారు. ఒకవేళ వ్యాధిగ్రస్తులు పెద్ద సంఖ్యలో వచ్చినా ఇబ్బంది లేకుండా ఈ ఏర్పాట్లు చేస్తున్నారు.

ఆంధ్రప్రదేశ్‌లో కొత్త కేసులు నమోదు కాలేదు. ఇటీవల నెల్లూరులో బయటపడిన కేసులో వ్యక్తికి చికిత్స అందిస్తున్నారు.

తెలంగాణలో పలుచోట్ల ఫలానా వారికి కరోనా వచ్చిందంటూ సోషల్ మీడియాలో వార్తలు వెల్లువెత్తుతున్నాయి.

ఎవరితోనూ కలవకుండా ఉంచడం కోసం కాస్త అనుమానం ఉన్న వారిని వైద్య ఆరోగ్య శాఖ అంబులెన్సుల్లో తీసుకువెళ్లి ఆసుపత్రుల్లో చేరుస్తోంది. దీంతో అలా తీసుకువెళ్లిన అందరికీ కరోనా ఉందేమోనన్న భావనతో ఈ వార్తలు వ్యాపింపచేస్తున్నారు.

వాట్సప్, టిక్‌టాక్‌లలో ఫోటోలు, వీడియోలు, మెసేజీలూ పెడుతున్నారు. కొందరైతే ఏకంగా అనుమానితుల పేర్లను కూడా బాధితుల్లాగా ప్రకటించేస్తున్నారు. ఇలాంటివి సహించేది లేదనీ, వారిపై కేసులు నమోదు చేస్తామనీ అధికారులు తెలిపారు.

ఆంధ్రలో కరోనా వల్ల స్థానిక సంస్థల ఎన్నికలు వాయిదా వేశారు. ఇది వివాదాస్పదం అయింది. తాము కరోనాను ఎదుర్కోగలమని, ఎన్నికలు నిర్వహించవచ్చనీ, ఆ రాష్ట్ర ప్రధాన కార్యదర్శి, రాష్ట్ర ఎన్నికల సంఘానికి లేఖ రాశారు. ఇక కరోనాను సులువుగా ఎలా ఎదుర్కోవచ్చో ఆదివారం ముఖ్యమంత్రి జగన్మోహన్ రెడ్డి విలేకర్ల సమావేశంలో చేసిన ప్రసంగం సోషల్ మీడియాలో వివాదాస్పదం అవుతోంది.

అటు హైదరాబాద్ నగరంలో మార్చి 31 వరకూ అన్ని బడులకూ, సినిమా హాళ్లకూ, జనం పోగయ్యే అవకాశం ఉన్న కార్యక్రమాలకూ అనుమతులు రద్దు చేశారు. పెళ్లిళ్లు తక్కువ మందితో చేసుకోవాలని సూచించింది ప్రభుత్వం. కొత్తగా ఫంక్షన్ హాల్ బుకింగ్‌లను అనుమతించవద్దని సూచించింది.

Skip ఎక్కువమంది చదివినవి and continue reading

ఎక్కువమంది చదివినవి