థాయ్‌లాండ్ గుహ నుంచి సురక్షితంగా బయటపడ్డ ఎనిమిది మంది బాలలు.. ఇక మిగిలింది నలుగురే

థాయ్‌‌లాండ్ గుహ నుంచి ఎనిమిది మంది బాలలు క్షేమంగా బయటపడ్డారని సహాయక చర్యలను పర్యవేక్షిస్తున్న నేవీ సీల్స్ స్పష్టం చేసింది.

ఈ మేరకు ఎవరెవరిని కాపాడారో వారి పేర్లను తన అధికారిక ఫేస్ బుక్ పేజీలో బోర్స్1, బోర్స్ 2.. పేర్లతో ప్రకటించింది. పిల్లల అసలు పేర్లను బయటకు చెప్పకూడదనే ఉద్దేశంతో వారి ఫుట్‌బాల్ జట్టు పేరైన వైల్డ్ బోర్స్‌ను స్ఫురించేలా ఈ పేరు పెట్టినట్లు తెలిపింది.

కాగా, మిగిలిన నలుగురిని రక్షించేందుకు మంగళవారం కూడా సహాయక చర్యలు కొనసాగిస్తామని రెస్య్కూ సిబ్బంది తెలిపారు.

చియాంగ్ రాయ్ ఆస్పత్రి‌లో చికిత్స పొందుతున్న నలుగురు బాలురు బాగా ఆకలితో ఉండటంతో ఫ్రైడ్ రైస్ కావాలని అడిగారని రెస్క్యూ టీం హెడ్ నరోంగ్‌సాక్ ఓసటర్నకోర్న్ తెలిపారు.

ఆస్పత్రి గ్లాస్ డోర్‌ల నుంచి బాలురను చూడటానికి తల్లిదండ్రులకు అనుమతి ఇచ్చామని ఆస్పత్రి సిబ్బంది వెల్లడించారు.

చికిత్స పొందుతున్న నలుగురి పేర్లను వెల్లడించడం సరికాదని అధికారులు తెలిపారు.

6.40 PM మిగిలిన నలుగురు బాలలను, కోచ్‌ను కాపాడేందుకు మంగళవారం సహాయక చర్యలు కొనసాగిస్తామని రెస్క్యూ సిబ్బంది తెలిపారు.

2.00 PM థాయ్‌లాండ్ గుహ దగ్గర మళ్లీ సహాయక చర్యలు ప్రారంభించారు.

1.00 PM థాయ్‌లాండ్‌ గుహలో చిక్కుకున్న మిగతా వారిని కాపాడేందుకు గజ ఈతగాళ్లు సిద్ధంగా ఉన్నారు.

ఆదివారం సహాయక బృందాలు నలుగురు పిల్లలను బయటికి తీసుకొచ్చాయి.

గుహ నుంచి పిల్లలను తీసుకొచ్చే దారిలో ఆక్సిజన్ ట్యాంకులు మార్చడం పూర్తయింది.

శనివారం రాత్రి రెస్క్యూ ఆపరేషన్ నిలిపేశారు. సుమారు 10 గంటల పాటు శ్రమించి ఆక్సిజన్ ట్యాంకులు అమర్చారు.

చిక్కుకున్న వారెవరు? గుహలో ఉన్నప్పుడు వాళ్లేమన్నారు?

గుహలో ఎలా చిక్కుకున్నారు?

గుహ లోపల వారం కిందట బ్రిటీష్ డైవర్లకు ఈ బాలురు కనిపించారు. గుహ బయటి నుంచి వీరు చిక్కుకపోయిన ప్రాంతం దాదాపు 4 కిలోమీటర్ల దూరంలో ఉంది.

వీరంతా 11 నుంచి 17 ఏళ్ల మధ్యనున్నవారే. వైల్డ్ బోర్స్ అనే ఫుట్ బాల్ క్లబ్‌ జట్టుకు ప్రాతినిథ్యం వహిస్తున్నారు.

విహారయాత్రలో భాగంగా కోచ్‌తో కలసి ఈ గుహకు వచ్చారు. గుహలో చిక్కుకున్న వీరిని కనిపెట్టడానికి రెస్క్యూ టీంకు తొమ్మిది రోజులు పట్టింది.

"గుహలోకి వెళ్లే దారి అంతటా ఆక్సిజన్ ట్యాంకులను అమర్చిన తర్వాత డైవర్లు మళ్లీ సహాయ కార్యక్రమాలు ప్రారంభిస్తారు" అని చాంగ్ రాయ్ గవర్నర్ ఆదివారం తెలిపారు.

చీకటిలో నీళ్లు నిండిన దారుల్లోంచి గుహ ప్రవేశ మార్గం వైపు ఎలా రావాలో డైవర్లు పిల్లలకు చూపిస్తున్నారు. నడుస్తూ గుహ దాటేలా వారిని సన్నద్ధం చేశారు.

వర్షం ఆగితే, అనుకున్న సమయం కంటే ముందే 'హై రిస్క్ ఆపరేషన్' ప్రారంభించాలని సహాయ బృందాలు భావిస్తున్నాయి.

సహాయ కార్యక్రమాల మొదటి దశను కూడా అధికారులు కాస్త ముందే ప్రారంభించారు.

పిల్లల్ని ఎలా తీసుకొస్తున్నారు

90 మంది గజ ఈతగాళ్లు గుహలో వారిని బయటకు తీసుకురావడానికి ప్రయత్నిస్తున్నారు. వీరిలో థాయ్‌లాండ్ డైవర్లు 40 మంది, ఇతర దేశాలకు చెందిన డైవర్లు 50 మంది ఉన్నారు.

గుహలో కఠినమైన దారుల్లో పిల్లలు చిక్కుకున్న ప్రాంతానికి వెళ్లి వారిని మళ్లీ ప్రవేశ మార్గం వరకూ తీసుకురావడం ఎంతో అనుభవం ఉన్న ఈతగాళ్లకు కూడా కష్టం అవుతోంది.

ఈ సహాయ కార్యక్రమాలలో భాగంగా గుహలో నడవడంతోపాటు, ఎక్కడం, గైడింగ్ రోప్స్ ద్వారా ఈదడం చేయాల్సి వస్తోంది.

రెస్పిరేటర్ల బదులు డైవర్లు అందరూ ఫుల్ ఫేస్ మాస్కులు వేసుకున్నారు. ఒక్కో బాలుడిని ఇద్దరు డైవర్లు తీసుకొస్తున్నారు. పిల్లాడికి అందిస్తున్న ఆక్సిజన్ ట్యాంకును కూడా డైవర్లే మోస్తున్నారు.

గుహ నుంచి బయటికి వస్తున్నప్పుడు సగం దూరంలో ఉన్న టీ-జంక్షన్ అనే ప్రాంతం దగ్గర డైవర్లకు కష్టంగా ఉంటోంది. అది చాలా ఇరుగ్గా ఉండడంతో డైవర్లు తమ ఆక్సిజన్ ట్యాంకులు తీసి దాన్ని దాటాల్సి వస్తోంది.

ఆ గుహలోనే ఉన్న చాంబర్ 3 అనే ప్రాంతం నుంచి డైవర్లు సహాయ కార్యక్రమాలు కొనసాగిస్తున్నారు. లోపలి నుంచి తీసుకొచ్చిన వారు, అక్కడ కాసేపు విశ్రాంతి తీసుకున్న తర్వాత చాంగ్ రాయ్‌లోని ఉన్న ఆస్పత్రికి పంపుతున్నారు.

మొదటి దశ సహాయ కార్యక్రమాలు

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)