అనంత్ అంబానీ ప్రీ-వెడ్డింగ్: పాప్ స్టార్ రియానా, బిలియనేర్ బిల్‌గేట్స్, మార్క్ జుకర్ బర్గ్, ఇవాంకా ట్రంప్... ఇంకా భారతీయ హేమాహేమీల మెగా సందడి

500కు పైగా వంటకాలు, బాలీవుడ్ తారలు, స్టార్ ఆటగాళ్ళ హంగామా, తొలిసారి ఇండియాలో పాప్‌స్టార్ రియానా ప్రదర్శన, బిల్‌గేట్స్, మార్క్ జుకర్ బర్గ్, ఇవాంకా ట్రంప్ లాంటి ప్రపంచ ప్రసిద్ధ ప్రముఖుల రాక.. ఇవీ మూడురోజులపాటు ఘనంగా జరిగిన అనంత్ అంబానీ ముందస్తు వివాహ వేడుకలోని ముఖ్యాంశాలు.

అపరకుబేరుడు, రిలయన్స్ ఇండస్ట్రీస్ అధినేత ముకేష్ అంబానీ కుమారుడు అనంత్ అంబానీ, అతనికి కాబోయే భార్య రాధిక మర్చంట్ ముందస్తు వివాహ వేడుకలు మూడురోజులపాటు ఘనంగా జరిగాయి.

ఈ వేడుకలో 500కుపైగా వంటకాలతో అతిథిమర్యాదలు చేశారు. బాలీవుడ్ తారలతోపాటు టెక్ దిగ్గజాలు, స్టార్ ఆటగాళ్ళే కాకుండా, అమెరికా మాజీ అధ్యక్షుడు డోనాల్డ్ ట్రంప్ కుమార్తె ఇవాంక ట్రంప్ కూడా హాజరయ్యారు.

ప్రీ వెడ్డింగ్ వేడుకలు భారత్ నే కాదు ప్రపంచం దృష్టిని కూడా ఆకర్షించాయి. గుజరాత్‌లోని జామ్‌నగర్‌లో ఈ వారాంతంలో మూడురోజుల పాటు జరిగిన ఈ వేడుకలకు సంబంధించిన ప్రతి చిన్న విషయం కూడా ప్రపంచం దృష్టిని ఆకట్టుకుంది.

దేశం నలుమూలల నుంచే కాక, ప్రపంచ వ్యాప్తంగా వచ్చిన అతిథుల కారణంగా స్థానిక విమానాశ్రయానికి తాత్కాలికంగా అంతర్జాతీయ హోదా లభించింది. ఈ వేడుక కోసం 130 విమానాలలో అతిథులు వచ్చారని విమానాశ్రయ వర్గాలు చెప్పాయి. టెక్ దిగ్గజాలు బిల్‌గేట్స్, మార్క్ జుకర్‌బర్గ్‌ లాంటివారు ఈ ప్రాంతానికి వచ్చారని చెప్పారు.

ముందస్తు వివాహ వేడుకు జరిగే వేదికకు సమీపంలోనే ఊహకు కూడా అందనంత అత్యంత విలాసవంతమైన టెంట్లలో ఎక్కువమంది అతిథులు బస చేశారు. దీంతోపాటు ప్రపంచం నలుమూలల నుంచి వచ్చిన డజన్ల కొద్దీ చెఫ్‌లు తయారుచేసిన 500 రకాల వంటకాలను అతిథులు ఆస్వాదించారు.

థీమ్ పార్టీలకు హాజరయ్యే అతిథులకు తదనుగుణంగా కేశాలంకరణ, మేకప్ చేయడానికి ఆర్టిస్టులు, లాండ్రీ సర్వీసులు, స్టైలిస్టులను అందుబాటులో ఉంచారు. అతిథులకు ఎలాంటి లోటు రాకుండా ఏ సమయానికి ఏం జరగాలనే విషయాన్ని 9పేజీల షెడ్యూల్‌లో పొందరుపరిచారు.

ఈ వేడుకలో పాప్‌స్టార్ రియానా ప్రదర్శన హైలైట్‌ అయింది. ఇండియాలో ఇది ఆమె తొలి ప్రదర్శన. ఇందుకోసం ఆమెకు 7 మిలియన్ల అమెరికన్ డాలర్లు (సుమారు 58 కోట్ల రూపాయలు) చెల్లించారని చెబుతున్నారు. అయితే ఈ విషయాన్ని బీబీసీ స్వతంత్రంగా నిర్థరించలేకపోయింది.

రియానా హిట్ పాటలకు దేశంలోని ప్రసిద్ధ సినీనటులు కూడా డాన్స్ చేశారు.

వేడుకకు వచ్చిన అతిథులందరూ వేలాది జంతువులకు ఆవాసంగా ఉన్న 3వేల ఎకరాల అంబానీ కలల ప్రాజెక్ట్‌ను సందర్శించారు.

స్థానికుల కథనం మేరకు ముకేష్ అంబానీ స్థానికంగా 14 ఆలయాలు నిర్మించారు.

ఇక ఇప్పుడు అందరి దృష్టి జులైలో జరగబోయే అనంత్ అంబానీ వివాహవేడుకపైనే ఉంది.

ఫోర్బ్స్ మ్యాగజైన్ ప్రకారం ముకేష్ అంబానీ సంపద 115 బిలియన్ డాలర్లు.

ఇవి కూడా చదవండి:

బీబీసీ తెలుగును ఫేస్‌బుక్ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)