ట్రంప్‌ గోల్ఫ్ ఆడుతుండగా పొదల్లో తుపాకీతో దుండగుడు.. సీక్రెట్ సర్వీస్ ఏజెంట్ల అప్రమత్తతతో తప్పిన ప్రమాదం

అమెరికా అధ్యక్ష పదవికి మరోసారి పోటీపడుతున్న మాజీ అధ్యక్షుడు డోనల్డ్ ట్రంప్‌పై హత్యాయత్నం జరిగినట్టు ఎఫ్‌బీఐ ప్రకటించింది.

ఈ ఘటన ఫ్లోరిడాలోని వెస్ట్‌ పామ్‌ బీచ్‌లో ఆదివారం రాత్రి ట్రంప్‌కు చెందిన అంతర్జాతీయ గోల్ఫ్‌క్లబ్‌లో జరిగింది.

ట్రంప్ గోల్ఫ్ ఆడుతున్న సమయంలో ఆయనకు రక్షణగా ఉన్న సీక్రెట్ సర్వీస్ ఏజెంట్లు పొదల్లో గన్‌తో దాక్కున్న వ్యక్తిని గుర్తించారు.

సహజంగా భద్రత చర్యలలో భాగంగా ట్రంప్ కంటే సీక్రెట్ సర్వీస్ ఏజెంట్లు కొంతముందు ఉంటారు. గోల్ఫ్ ఆడే సమయంలో ట్రంప్ ఒక హోల్ వద్ద ఉంటే, ఆయన తరువాత చేరుకునే హోల్ వద్దకు ఈ ఏజెంట్లు ముందుగానే వెళ్తారు.

గోల్ఫ్ కోర్సులోని ఐదు, ఆరు, ఏడు హోల్స్ సమీపంలో ఉన్న పొదల్లో షూటర్ దాక్కున్నట్లు కౌంటీ షరీఫ్ రిక్ బ్రాడ్‌షా తెలిపారు.

పొదల్లోంచి కనిపించిన తుపాకీ బారెల్‌ను ఏజెంట్లు గుర్తించి వెంటనే కాల్పులు జరిపారు. ఆ సమయంలో ట్రంప్ ఘటనాస్థలానికి 300-500 గజాల దూరంలో ఉన్నారు.

ఏజెంట్లు పలుమార్లు కాల్పులు జరిపాక అనుమానితుడు పొదల్లోంచి బయటకు వచ్చి పారిపోతూ నల్లని నిస్సాన్ కారులోకి దూకడాన్ని ఓ ప్రత్యక్ష సాక్షి గమనించారు. అనుమానితుడి కారును, లైసెన్సు ప్లేట్‌ను ఆ సాక్షి ఫొటో తీశారు.

తరువాత ఆ కారును గోల్ఫ్ క్లబ్‌కు ఉత్తరాన మార్టిన్ కౌంటీ వద్ద ఆపారు.

‘మేం వెంటనే మార్టిన్ కౌంటీ షరీఫ్ కార్యాలయాన్ని అప్రమత్తం చేశాం. దీంతో వారు ఆ వాహనాన్ని ఆపి, అనుమానితుడిని కారులోంచి బయటకు లాగి అదుపులోకి తీసుకున్నారు’ అని పామ్‌బీచ్ కౌంటీ షరీఫ్ రిక్ బ్రాడ్‌షా చెప్పారు.

‘‘మేం ప్రత్యక్షసాక్షిని తీసుకువచ్చాం. పొదల్లోంచి బయటకు వచ్చి కారులోకి దూకిన వ్యక్తిని ఆయన గుర్తించారు’’ అని షరీఫ్ మీడియాతో చెప్పారు.

‘‘తాను క్షేమంగా ఉన్నట్టు’’ ట్రంప్ తన మద్దతుదారులకు ఈమెయిల్ ద్వారా తెలిపారు.

‘‘నన్ను ఏదీ ఆపలేదు. నేను ఎప్పటికీ లొంగిపోను’’ అని ఆయన రాశారు.

పెన్సిల్వేనియాలోని బట్లర్‌లో ఎన్నికల ప్రచారంలో పాల్గొన్న ట్రంప్‌పై హత్యాయత్నం జరిగిన రెండు నెలల తరువాత ఇప్పుడీ ఘటన జరిగింది.

ఈ కేసును దర్యాప్తు చేస్తున్నట్టు సీక్రెట్ సర్వీస్ ‘ఎక్స్’ వేదికగా తెలిపింది.

పేరు చెప్పని అధికారులను ఉటంకిస్తూ యూఎస్ మీడియా అనుమానితుడిని హవాయికు చెందిన రేయాన్ వెస్లీ రౌత్ (58) అని చెప్పింది.

ఆ పేరుకు సరిపోలిన ప్రొఫైల్‌ను ‘బీబీసీ వెరిఫై’ గుర్తించింది.

విదేశీ ఫైటర్లు రష్యన్ దళాలకు వ్యతిరేకంగా పోరాడటానికి యుక్రెయిన్‌కు వెళ్లాలని రౌత్ పిలుపునిచ్చినట్టు గుర్తించారు.

ట్రంప్ ఇంటర్నేషనల్ గోల్ఫ్ కోర్సులో జరిగిన ఈ ఘటన గురించి అధ్యక్షుడు జో బైడెన్, ఉపాధ్యక్షురాలు కమలా హారిస్‌కు వివరించినట్టు శ్వేతసౌధం తెలిపింది.

‘ట్రంప్ క్షేమంగా ఉన్నట్టు తెలుసుకుని వారు ఊపిరిపీల్చుకున్నారు. ఎప్పటికప్పుడు వారికి ఈ విషయంపై తాజా సమాచారాన్ని అందిస్తున్నామని’ వైట్‌హౌస్ పేర్కొంది.

ట్రంప్‌ క్షేమంగా బయటపడటంపై హారిస్ ‘ఎక్స్’ వేదికగా స్పందిస్తూ ‘‘అమెరికాలో హింసకు తావులేదు’’ అని రాశారు.

జులై 13న పెన్సిల్వేనియాలోని బట్లర్‌లో ట్రంప్ ప్రజలను ఉద్దేశించి ప్రసంగిస్తుండగా థామస్ మాథ్యూ క్రూక్స్ అనే వ్యక్తి ఏఆర్-15 తరహా తుపాకీతో సమీపంలోని భవనం పైకప్పు నుంచి కాల్పులు జరిపాడు. ఆ ఘటనలో ట్రంప్ గాయపడ్డారు.

ఈ కాల్పుల్లో ఒక ప్రేక్షకుడు మరణించారు.

క్రూక్స్ (20) సీక్రెట్ సర్వీస్ స్నైపర్ కాల్పుల్లో అక్కడికక్కడే మరణించారు.

ఈ ఘటన తరువాత సీక్రెట్ సర్వీస్‌పై తీవ్ర విమర్శలు రావడంతో ఆ సంస్థ డైరెక్టర్ కింబర్లీ చీటెల్ తన పదవికి రాజీనామా చేశారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)