Янгиликлар: Бегона эркакни ўпди, 'тошбўрон қилинсин' - Dunyo Ayollar Yangiliklar

Суданлик аёл

Сурат манбаси, Getty Images

Сурат тагсўзи, Жувоннинг ҳимоячиси Абдулла Интизорга кўра, ҳакамнинг "мижозини ҳукм этишдан бошқа чораси бўлмаган"
    • Author, Зайнаб Муҳаммад Солиҳ
    • Role, Хартум

20 ёшли жувон маъшуқини ўпганлиги учун зинода айбланган. Маъшуқининг ўзини эса амакиваччаси ўлдирган.

Аввалги турмуши бўлмаган жувон шу қотиллик ортидан ҳибсга олинган.

Жувон бегона эркакни ўпганлигини тан олган.

Мавзуга алоқадор:

Иш тафсилоти

Ҳодиса Суданнинг Оқ Нил штатидаги Кости шаҳрида юз берган.

Шаҳар маҳкамаси уни "зино"да айбдор, деб топган ва тошбўрон қилиб ўлдиришга ҳукм этган.

Аммо маҳкама ҳукми халқаро миқёсда кескин норозиликларга сабаб бўлган.

Жувоннинг ҳимоячиси Абдулла Интизорга кўра, ҳакамнинг "мижозини ҳукм этишдан бошқа чораси бўлмаган".

Skip Энг кўп ўқилган and continue reading
Энг кўп ўқилган

End of Энг кўп ўқилган

"У судда бир эркак билан бўлганини тан олган, ёш экани боис, бунинг оқибатларини англаб етмаган".

Ишга Африканинг Адолат ва Тинчлик Тадқиқотлари маркази ҳам ўз эътиборини қаратган.

Марказ маҳкама ҳукмини "халқаро қонунларнинг қўпол равишда бузилиши", деб топган.

Бунинг ортидан, Оқ Нил штати маҳкамаси ишни қайта кўриб чиққан.

Маҳкама дастлабки айбловни "зино"дан "ахлоқсизлик"ка ўзгартирган.

Тошбўрон ҳукмини олти ойлик қамоқ жазосига ўзгартирган.

Африканинг Адолат ва Тинчлик Тадқиқотлари марказига кўра, дастлабки ишда жувоннинг "ҳимоячи олишига рухсат берилмагани ва йўл қўйилган процессуал хатолар тошбўрон ҳукмининг бекор қилинишига сабаб бўлган".

Жувон гаров эвазига озод этилган, аммо энди қамоқ жазосини ўташга киришган.

"Ҳудуд" жиноятлари ва жазо

Суданда ҳозир ҳам баъзи "ҳудуд", яъни Қуръонда тилга олинган жиноятлар, жумладан, ўғрилик ва зино учун ўлим жазоси қўлланилади.

Мамлакат қонунчилиги дарралаш, қўл ва оёқларни кесиш, осиш ва тошбўрон қилиш каби жазо чораларини ҳам кўзда тутади.

Тошбўрон ҳукми асосан аёлларга қарши чиқарилади, аммо кўп ҳолларда ижро топмайди, Судан Олий маҳкамаси томонидан бекор қилинади.

Аввалроқ ҳукумат вазирининг ўзи ҳам "тошбўрон қилиб ўлдириш" ҳукмини "ҳазил", деб атаган.

Аммо бу ишга бирор бир вазир аралаша олмасликларини ҳам тан олганди.

2021 йилги давлат тўнтаришидан бери Суданни ҳарбий хунта бошқаради.

BBC.COM/UZBEK билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek