Дунё: Гуруҳ секс ва бокиралик - аёлларни жинсий қулга айлантирган секта

АҚШ прокурорлари ўзини «дунёдаги энг закий ва одобли инсон» ўлароқ тасвирлаган секта асосчиси Кейт Ренйр ўзи ташкил этган махфий жамиятга аъзо аёлларнинг миясини ювгани ва уларни секс қулларга айлантиргани, шунингдек, шахсга сиғиниш муҳитини яратганини таъкидлаган.

Нью-Йорк штатида ташкил этилган Nxivm (нексиум, деб ўқилади) гуруҳи ўзини «одамларга куч берувчи инсонпарварлик тамойилларга асосланган жамият» эканини иддао қилади.

Гуруҳ 16 мингдан зиёд одам билан яқиндан ишлагани ва АҚШ, Канада, Мексика ҳамда Марказий Америкада марказлари ташкил этилганини айтади.

58 яшар Ренйр ўзи ва ташкилотини "янада яхшироқ дунё қуриш йўлида ишлаган"ини даъво қилиб келган.

Қуйида ушбу махфий жамият билан боғлиқ кишини ҳайратга солувчи олтита ҳолат ҳақида билиб олишингиз мумкин.

Етакчининг туғилган куни учун $2,000 бадал

Суд ҳужжатларига кўра, ўзларини "Никсианлар" деб атаган жамият аъзолари ҳар август ойида етакчининг туғилган кунини нишонлаш учун $2,000 бадал пули тўлаб, Нью-Йоркга йиғилганлар.

Гувоҳлар берган кўрсатмаларда «туғилган кун тантаналари» бир ҳафта давом этгани айтилади.

Базм иштирокчилари Кейт Ренйр номига ҳамдлар айтган, машҳур қўшиқчилар ушбу «буюк инсон» шарафига куйлаган

Федерал Қидирув Бюроси Ренйр 15-20 аёлдан иборат гуруҳни шакллантириб, уларни фақат ўзи билан секс қилишга мажбурлагани ва аёлларга бошқалар билан жинсий алоқага киришишни тақиқлаганини кўрсатувчи далиллар топган.

Nxivm йўриқномаларида кўпхотинлик тарғиб қилингани, аёлларга эса фақат бир эркакка содиқ қолиш таъкидланганини кўриш мумкин.

Етакчига бахшида бокиралик

Прокурорлар томонидан Даниелла, дея аталган гуруҳнинг собиқ аъзоси 18 ёшга тўлишига бир неча ҳафта қолганда, ўз бокиралигини Ренйр учун бахшида қилишга тайёрланганини маълум қилган.

Ренйр ва Nxivm жамияти тўғрисида эшитганидан сўнг Даниелла оиласи билан Мексикадан АҚШга кўчиб келган. Ўшанда, қиз энди 16 ёшда бўлган. Олти кишидан иборат оила Нью-Йорк штати пойтахти Албанидаги икки хонали уйга жойлашиб, гуруҳнинг йўриқномаларини ўргана бошлаган.

«Мени ҳеч ким ўпмаган ва ҳеч ким билан жинсий яқинлик қилмаган эдим,» деган Даниелла суд маҳкамасида.

Туғилган кун маросимларида Ренйр билан илк бор учрашган Даниелла улар ўртасида ишқий муносабатлар бошлангани, аммо, кейинчалик, эркак ўзини бошини айлантирганини тушуниб етгани ҳақида гапирган.

«У ўзининг жинсий қувватини фақат мен баҳам кўриши мумкинлигини айтди,» дейилади қизнинг кўрсатмасида.

Даниелла 18 ёшга тўлиш арафасида Ренйр унга «вақт келгани»ни айтган. Сўнг улар қовушишган.

«Висол оқшоми»дан кейин Ренйр қизни ноодатий жинсий алоқага мажбурлай бошлаган.

«Мен оғзим билан унинг ҳирсини бир кунда, ҳатто, бир неча бор қондиришга мажбур эдим.»

Даниелланинг бир синглиси Ренйрдан фарзанд кўрган. Секта етакчиси опа-сингилни бир вақтнинг ўзида ўзи билан секс қилишга мажбурлаган.

«Семириб кетдинг, икки йил уйдан чиқмайсан!»

Судда кўрсатма берган Лорен Салзман исмли 42 яшар аёл гуруҳ етакчиси Даниелла, дея аталаётган ёш қизни «семириб кетгани» учун икки йил ётоқхонадан чиқармаганини маълум қилган.

Ренйр гуруҳ аъзоларига бундай усул Даниелланинг «хулқини тўғрилаши»ни таъкидлаган.

Салзман хоним етакчининг сўзларига ишонган ўзи ва гуруҳнинг бошқа аъзолари Даниеллага нисбатан ноинсоний муносабатда бўлганини тан олган.

Оқибатда, Даниелла қайта Мексикага қочиб кетишга қарор қилган.

«Хожа ва қул» тизими

Суд ҳужжатларига кўра, Nxivm таркибида «DOS» ёки "Vow" номли махфий жамият фаолият юритиб келган.

Ушбу жамиятнинг тузилмаси эҳром шаклида бўлиб, «хўжайинлар» қуйи бўғиндаги «қуллар»ни назорат этган.

Ҳар бир бўғин аъзоларининг шахси бошқалардан сир тутилган. Ҳужжатлар Ренйрнинг ушбу жамиятдаги ягона эркак аъзо бўлганини кўрсатади.

Барча «қуллар» Ренйрга «олий зот» сифатида қараган.

«Қуллар»га ўз «қуллари»ни топиш буюрилган ва уларнинг бари, табиий равишда, Ренйрга хизмат қилган.

Жамиятга қўшилишдан олдин аёллардан «хўжайинлар»га ўзи ҳақида «нозик материаллар» тақдим этиш талаб этилган.

Бундай материаллар «қул»нинг ўзи ва унинг яқинларига зарар келтирувчи яланғоч суратлар ва уят видеолар каби маълумотлардан иборат бўлган. Бундан мақсад, агар «қул» жамиятни фош этишга урингудек бўлса, уни тийиб қўйишда материаллардан фойдаланиш бўлган.

Пировардида, «қуллар» махфий жамиятни тарк эта олмаган ёки у ҳақида жамоатчиликка хабар беролмаган.

«Қуллар»нинг вазифалари ўз «хўжайинлари» учун қаҳва олиб келиш ва уйни тозалашдан тортиб, Ренйр секс қилишни истаган қизларни қовушишга тайёрлашгача юмушлар бўлган.

«Олий етакчи»га аталган қизларнинг парҳезга қатъий амал қилишини назорат этиш «қуллар» зиммасида бўлган. Қизлар ҳар бир истеъмол қилган таоми тўғрисида ҳисобот беришга мажбурланган.

Суд кўрсатмаларида Ренйр «ўта озғин» қизларни хуш кўргани қайд этилади.

Танадаги «олий етакчи»нинг исми

Жамият аъзолари куйдириш йўли билан ўз танасига етакчи Кейт Ренйр исми-шарифининг бош ҳарфларини туширишга даъват этилган.

Nxivm сектаси «қуллари» махсус «тамғалаш маросими»га жалб этилиб, етакчининг олдида қип-яланғоч ечинишга мажбурланган ва уларнинг танасига куйдирувчи асбоб ёрдамида «KR» ҳарфларидан иборат махсус белги чизилган.

Бутун жараён тасвирга тушириб борилган.

Жамиятнинг айрим аъзоларига бу белги сув, ҳаво, тупроқ ва оловни тамсил этиши айтилган.

Бироқ прокурорлар ўрганишлар натижасида белгининг Кейт Ренйр исми бош ҳарфларидан иборат эканини аниқлаган.

Гуруҳ сексга тайёргарлик

Салзман хоним полиция ходимлари Ренйрнинг Мексикадаги уйига бостириб кирган вақтда, етакчи бир гуруҳ юқори табақа «қул-аёллар» билан гуруҳ сексга тайёргарлик кўраётган бўлгани борасида кўрсатма берган.

Лорен Салзман полицияга қаршилик кўрсатиб, Ренйрни муҳофаза қилишга уринган.

"Бор мақсадим Кейтни ҳимоя қилиш эди. У ўргатгандек, севгини ҳамма нарсадан устун қўйдим," сўзлаган ўн йил давомида Ренйр билан ишқий муносабатда бўлиб келган Салзман хоним.

Аёл ўзи ва таниқли актриса Элисон Макнинг «биринчи бўғин қуллари» бўлганини айтган. Улар ўзларининг Nxivm ва Ренйрга садоқатини яна бир исботлаш учун етакчи билан гуруҳ сексга киришишга қарор қилганлар.

Nxivm гуруҳи асосчиларидан бирининг қизи бўлмиш Лорен Салзман полиция бостириб киргандан сўнг Ренйрнинг асл қиёфасини кўрганини таъкидлаган.

«У шунча йил ўзи таъкидлаб келгандек халоскор эмас, балки қўрқоқ экан.»

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek