Россия: Мигрантлар "импорти" асосан Ўзбекистондан - Россия ва мигрантлар, дайжест Rossiya O‘zbekiston yangiliklar

Карантинда ватанларига кетган мигрантлар Россияга қайтди. Сўнгги бир йилда уларнинг сони 3 баробар ортди. Россия нашрлари «одам импорти асосан Ўзбекистондан» эканини ёзмоқда.

Россия расмийлари эса мигрантларни камайтиришни ўйлай бошлади. Ва тартиббузар муҳожирларга 40 йиллаб тақиқлар қўлланила бошланди.

Меҳнат муҳожирлари эса Россияда ишлаб, ўз ватанларига пул юборишда рекорд қўйишда давом этишмоқда.

Алоқадор мавзулар:

Бир йилда 2 млнга яқин патент

Россияда жорий йилнинг ўн ойида меҳнат муҳожирларига берилган патентлар сони ўтган йилнинг шу даврига нисбатан қарийб икки баравар кўпайди. Буни Ички ишлар вазирлигининг 2021 йил январь-октябрь ойларидаги миграция бўйича маълумотлари тасдиқлайди.

Расмий маълумотга кўра, шу вақт ичида хорижий фуқаролар ва фуқаролиги бўлмаган шахсларга 1 853 395 та патент берилган. Ўтган йилнинг 10 ойида бу кўрсаткич 971 854 нафарни ташкил этганди;

Аввалроқ ЕвроOсиё иқтисодий комиссиясининг Меҳнат миграцияси ва аҳолини ижтимоий муҳофаза қилиш департаменти директори Олтинай Омурбекова 2021 йилда Россияда бир йил аввалгига нисбатан уч баробар кўп мигрантлар борлигини маълум қилган эди.

Мутахассисларнинг фикрича, бу 2020 йилда коронавирус пандемияси туфайли Россияни тарк этган ишчилар оммавий равишда қайтиб кела бошлаганини англатади.

10 ойда 10 миллион муҳожир келган

Ички ишлар вазирлиги маълумотларига кўра, Россия Федерациясида 2021 йилнинг 10 ойи давомида миграция учун рўйхатга олинган чет эл фуқаролари сони ҳам ошган.

2020 йилда уларнинг сони 8 327 024 нафарни ташкил этган бўлса, жорий йилда бу кўрсаткич 2,3 миллионга ошиб, 10 616 980 нафарга етди.

Ҳисоботга кўра, Россия фуқаролигини олган чет эл фуқаролари сони ҳам ўсган, ўтган йилнинг ўн ойида 504 782 нафардан 2021 йилнинг шу даврида 609 905 нафарга етган.

Бу барча йиллар учун рекорд кўрсаткичдир.

Россия паспортини олганларнинг ярмидан кўпи Украина фуқароларидир.

Патент сотуви гуриллаяпти

Ички ишлар вазирлигининг 2021 йил январь-октябрь ойларидаги миграция бўйича маълумотларига кўра, Россияда жорий йилнинг ўн ойида меҳнат муҳожирларига берилган патентлар сони ўтган йилнинг шу даврига нисбатан қарийб икки баравар кўпайган.

Шу вақт ичида хорижий фуқаролар ва фуқаролиги бўлмаган шахсларга 1 853 395 та патент берилди. Ўтган йилнинг 10 ойида бу кўрсаткич 971 854 нафарни ташкил этган.

Россияда чет эл фуқароларига ишлаш ҳуқуқини берувчи меҳнат патенти ЕОИИ га аъзо бўлмаган мамлакатлар фуқаролари учун амалда бўлиб, ўзбекистонликлар энг кўп сонли патент солиғи тўловчилардан ҳисобланади.

Мигрантларни камайтириш режаси

Россия эса мигрантлардан олаётган фойдаларга қарамай, уларнинг сонини камайтириш ҳақида бош қотира бошлади.

Қурилиш ва уй-жой коммунал хўжалиги вазири Ирек Файзуллин Россиянинг исталган минтақаси қурилиш майдончаларида мигрантларсиз ишлай олишини айтди.

"Албатта, ҳар бир минтақа уларсиз ишлашга тайёр бўлади. Лекин бунга яхши тайёргарлик кўриш, кадрлар тайёрлаш ва фақат ўз кучимиз билан ишлашга тайёр бўлиш керак. Буни бир кунда қилиб бўлмайди", - дея иқтибос келтиради РИА Новости вазирнинг сўзидан.

Файзуллиннинг айтишича, қурилиш майдонларида мигрантлар сонини камайтириш ғояси қандай амалга оширилиши 2022 йилда аниқ бўлади.

Бундан аввал Москва мэри Сергей Собянин ҳам Москвадаги реконструкция дастури бўйича қурилиш майдонларида муҳожирлар сонини камайтириш кераклигини айтган эди.

400 мигрантга 40 йиллик депортация

Кейинги йилда Россия миграция қонунчилиги меҳнат мигрантларига нисбатан ўта қаттиқлашиб бормоқда.

Ички ишлар вазирлигининг ҳисоботига кўра, 400 га яқин муҳожирнинг Россияга кириши 40 йилга тақиқланган.

Бу муҳожирлар майда безорилик - жанжаллардаги иштироки учун узоқ йилларга мамлакатдан ҳайдалишган.

ИИВ Бош бошқармасининг Москва миграция бўлими масъул ходими Татьяна Дмитриевага кўра, муҳожирларнинг номақбул хулқ-атвори тўғрисидаги масала суд мажлисида кўтарилган.

Аввалроқ Россия президенти ҳузуридаги Инсон ҳуқуқлари кенгаши раҳбари Валерий Фадеев Россия қонунчилигини бузган мигрантлар мамлакатдан чиқариб юборилиши кераклигини айтган эди.

Олти йиллик рекорд

Россиядаги меҳнат мигрантларига нисбатан ҳуқуқлар чекловларининг турли кўринишларига қарамай, Марказий осиёлик муҳожирлар оила боқиш ва тирикчилик учун Россияга оқиб келишда давом этишмоқда. Энг оғир шароитлар ва юмушларда ишлаб, оилаларига пул жўнатиб кун кўришмоқда.

Россия Банкининг маълумотларига кўра, жорий йилнинг учинчи чорагида жисмоний шахслар томонидан Россиядан МДҲга тўлов тизимлари орқали валюта ўтказмалари бўйича олти йиллик рекорд ўрнатилди.

Ўзбекистон, Тожикистон ва Қирғизистон етакчилар бўлиб, иккинчи чоракга нисбатан 22 фоиздан 35 фоизга ошган.

«Ўсиш сабабларидан бири МДҲ давлатларидан мигрантлар оқимининг кўпайиши, биринчи навбатда, қурилиш, уй-жой коммунал хўжалиги ва бошқа тармоқларда ишчи кучи тақчиллигини тўлдириш учун Ўзбекистон ва Тожикистондан ишчи кучининг ташкиллаштирилган импорти ҳисобига бўлди», деб ёзди маҳаллий нашрлар.

Мутахассисларнинг фикрича, рубль курсининг барқарорлашуви ҳам бунда муҳим роль ўйнаган, бу манзарада меҳнат муҳожирларининг иш ҳақи сезиларли даражада ошган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek