కరోనావైరస్: సోషల్ డిస్టెన్సింగ్ కోసం కోళ్ల పెంట చల్లుతున్న అధికారులు

కరోనావైరస్ సమయంలో ప్రజలు ఒకే చోట గుమిగూడకుండా, సోషల్ డిస్టెన్సింగ్ పాటించేలా ప్రపంచ దేశాలన్నీ చర్యలు చేపడుతున్నాయి. అయినా, ఉత్సవాలు, వేడుకల పేరుతో అక్కడక్కడా ప్రజలు పోగవుతున్నారు.

స్వీడన్‌లోనూ ఓ ఉత్సవం సందర్భంగా జనాలు గుమిగూడే అవకాశాలు ఉండడంతో అక్కడి అధికారులు ఎవరూ ఊహించని చర్యలు తీసుకున్నారు.

వేడుకల కోసం ఒక్కచోట గుమిగూడకుండా జనాలను కట్టడి చేసేందుకు స్వీడన్‌లోని లుండ్ పట్టణం సెంట్రల్ పార్కులో కోళ్ల రెట్టను చల్లాలని అధికారులు నిర్ణయించారు.

ఉత్తర ఐరోపాలోని స్కాండినేవియా ప్రాంతంలో వాల్‌పూర్గిస్ నైట్‌ వేడుకల కోసం దక్షిణాదిన ఉన్న లుండ్ పట్టణానికి ఏటా వేలాది మంది తరలివస్తుంటారు.

అయితే, ఈసారి కరోనావైరస్ వ్యాప్తి కారణంగా ప్రజలందరూ ఈ సామూహిక వేడుకలకు దూరంగా ఉండాలని అధికారులు కోరుతున్నారు.

స్వీడన్‌లో లాక్‌డౌన్ అమలు చేయడంలేదు. అయినా, ఇక్కడి ప్రజల్లో అత్యధిక శాతం మంది స్వచ్ఛందంగా సామాజిక దూరం పాటిస్తున్నారు.

వాల్‌పుర్గిస్ నైట్ వేడుకలు ఏప్రిల్ 30 రాత్రి నుంచి మే 1 వరకు చేసుకుంటారు.

"ఈ వేడుకల కోసం జనాలు పెద్దఎత్తున గుమిగూడితే కరోనావైరస్ వ్యాప్తికి లుండ్ పట్టణం కేంద్రంగా మారే ప్రమాదం ఉంది" అని పట్టణ పర్యావరణ కమిటీ చైర్మన్ గుస్తావ్ హెచ్చరించారు.

అందుకే, జనాలు గుమిగూడకుండా చేసేందుకు ఒక టన్ను కోళ్ల పెంటను తీసుకొచ్చి సెంట్రల్ పార్కులో చల్లాలని స్థానిక కౌన్సిల్ నిర్ణయించింది.

"పార్కులో గడ్డికి, మొక్కలకు ఎరువు వేసే అవకాశం మాకు దొరికింది. కోళ్ల పెంట వల్ల పార్కులో దుర్వాసన వస్తుంది. కాబట్టి అందులో కూర్చుని బీరు తాగడం అంత మంచిది కాకపోవచ్చు" అని గుస్తావ్ అన్నారు.

కరోనావైరస్ హెల్ప్‌లైన్ నంబర్లు: కేంద్ర ప్రభుత్వం - 01123978046, ఆంధ్రప్రదేశ్, తెలంగాణ - 104. మానసిక సమస్యల, ఆందోళనల పరిష్కారానికి హెల్ప్‌లైన్ నంబర్ 08046110007

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)