కరోనావైరస్‌: కోవిడ్-19తో మరణించిన ముస్లిం శవాన్ని దహనం చేయడంపై శ్రీలంకలో వివాదం

కోవిడ్-19 మహమ్మారి రోజూ వందల మందిని బలి తీసుకుంటోంది. రోజురోజుకూ కరోనా పాజిటివ్ కేసులు కూడా పెరుగుతున్నాయి. వీటికితోడు ఈ వైరస్‌తో చనిపోయినవారి అంత్యక్రియలు ప్రభుత్వాలకు పెను సవాలుగా మారాయి.

కానీ ఈ సమస్య ఒక దేశానిది కాదు. శ్రీలంక నుంచి ఇటలీ వరకూ ప్రపంచవ్యాప్తంగా ఎన్నో దేశాలు ఈ సమస్యను ఎదుర్కుంటున్నాయి.

ప్రపంచ ఆరోగ్య సంస్థ కోవిడ్-19ను మహమ్మారిగా ప్రకటించింది. ఇది వేగంగా వ్యాపిస్తుండడం వల్ల ఈ వైరస్ సోకిన వారిని బంధువులు, సన్నిహితులు ఎవరూ కలవడానికి అనుమతించరు.

చాలాకేసుల్లో కరోనా పాజిటివ్ రోగులు ఆస్పత్రుల్లోనే మరణించారు. ఆ సమయంలో వారి బంధువులకు చివరిచూపు కూడా దక్కదు. వారు అంత్యక్రియల్లో కూడా పాల్గొనలేరు. కుటుంబ సభ్యుడికి తమ ఆచారాల ప్రకారం వాటిని నిర్వహించలేకపోవడం అనేది వారికి ఒక పెద్ద షాక్ లాంటిది.

కరోనావైరస్‌తో మరణించిన వారి మృతదేహాలను ఖననం చేయాలా, లేక దహనం చేయాలా? అనేది ఇప్పుడు వివాదాస్పదం అవుతోంది.

ఇప్పటివరకూ కరోనా మృతుల శవాల అంత్యక్రియలు వారి, వారి మతాచారాల ప్రకారమే జరిగేది. కానీ, శ్రీలంకలో కరోనావైరస్ వల్ల చనిపోయిన ఒక వ్యక్తి మృతదేహానికి అంత్యక్రియలు తన మతాచారాలకు విరుద్ధంగా చేయడం వివాదం సృష్టించాయి.

శ్రీలంకలో ఇప్పటివరకూ 167 పాజిటివ్ కేసులు బయటపడ్డాయి. దేశంలో కోవిడ్-19 వల్ల ఐదుగురు మృతిచెందారు. 29 మంది కోలుకున్నారు.

శ్రీలంక పశ్చిమ తీరం దగ్గర ఉన్న నెగోంబో నగరంలో ఒక కరోనా మృతుడు ముస్లిం అయినా, అతడి అంత్యక్రియలు ఇస్లాం ఆచారాలకు భిన్నంగా చేశారు.

శ్రీలంక ముస్లిం కాంగ్రెస్ పార్టీ నేత రవూఫ్ హకీమ్ దీనికి సంబంధించి ఫేస్‌బుక్‌లో ఒక పోస్ట్ కూడా చేశారు.

మార్చి 31న ఈ పోస్ట్ పెట్టిన రవూఫ్ మృతుడి అంత్యక్రియలను అతని మతాచారాల ప్రకారం ఖననం చేసేందుకు అనుమతి లభించకపోవడంపై విషాదం వ్యక్తం చేశారు.

“ఇది చాలా దురదృష్టకరం, ఖండించాల్సిన విషయం. కోవిడ్-19 వల్ల నెగోంబోలో చనిపోయిన వ్యక్తి మృతదేహాన్ని ఖననం చేయడానికి అనుమతించలేదు. మా ఆచారాలకు విరుద్ధంగా అంత్యక్రియలు నిర్వహించారు. హడావుడిగా జరుగుతున్న వాటిని ఆపడానికి మేం చాలా ప్రయత్నించాం. నెగోంబోలోనే ఖననం చేసే అవకాశాలు కూడా పరిశీలించాం. కానీ ఖననం చేయడానికి భూమిలో పది అడుగుల లోతు తవ్వితే, గొయ్యిలోకి ఊటనీరు వచ్చేస్తాయని చెప్పారు. శవం కొలంబోకు తీసుకెళ్లడానికి కూడా మాకు అనుమతి లభించలేదు” అని చెప్పారు.

రవూఫ్ తన పోస్టులో ప్రభుత్వం హడావుడి చేసి, కుటుంబ సభ్యుల మనోభావాలను దెబ్బతీసిందని ఆరోపించారు.

కానీ ఆయన పోస్టుకు స్పందించిన కొందరు “ప్రజల భద్రతకు సంబంధించిన విషయాల్లో, ఇలాంటి మత సంప్రదాయాలను పక్కన పెట్టాలి” అని ఆయనకు సూచించారు.

మృతదేహాలకు సంబంధించి గైడ్‌లైన్స్

మృతదేహాల అంత్యక్రియలు ఎలా?

శ్రీలంక ఎపిడమాలజీ యూనిట్(మహమ్మారి విజ్ఞాన విభాగం) కోవిడ్-19 మృతుల అంత్యక్రియలకు దిశానిర్దేశాలు జారీ చేసింది

“ప్రపంచ ఆరోగ్య సంస్థ మార్గదర్శకాలు అమలు చేయడానికి శ్రీలంక కట్టుబడి లేదు. మా దేశంలో ఎలాంటి చర్యలు తీసుకోవాలి అనేది స్థానిక ఆరోగ్య సేవలే నిర్ణయిస్తాయి” అని ఆ దేశ ఆరోగ్య సేవల డైరెక్టర్ జనరల్ డాక్టర్ అనిల్ జసింఘే మీడియాకు చెప్పారు.

కరోనావైరస్ హెల్ప్‌లైన్ నంబర్లు: కేంద్ర ప్రభుత్వం - 01123978046, ఆంధ్రప్రదేశ్, తెలంగాణ - 104

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)