అవెంజర్స్ ఎండ్‌గేమ్: భారీ తారాగణం, స్పెషల్ ఎఫెక్ట్స్.. సూపర్ హీరో సినిమాల సక్సెస్‌కు కారణాలివేనా

బాక్సాఫీసు రికార్డులు బద్దలుకొట్టడం ఖాయమనే అంచనాల మధ్య అవెంజర్స్ ఎండ్‌గేమ్ సినిమా ఏప్రిల్ 25న ప్రపంచవ్యాప్తంగా విడుదలైంది. ఇలాంటి సూపర్ హీరో తరహా చిత్రాలు బాగా ప్రజాదరణ పొందుతున్నాయి. మరి ఇలాంటి సినిమాల విజయానికి కారణాలేంటి?

నిజానికి సూపర్ హీరో చిత్రాలు కొత్తేమీ కాదు. 1940ల నుంచి ఇలాంటి సినిమాలు ప్రేక్షకుల ముందుకొస్తున్నాయి. కానీ, గత దశాబ్ద కాలంగా ఇలాంటివి మరింత ప్రజాదరణ పొందుతున్నాయి. అత్యధికంగా కలెక్షన్లు రాబట్టిన పది సినిమాల్లో నాలుగు సూపర్ హీరో సినిమాలే ఉన్నాయంటే వీటికి ఎలాంటి ప్రజాదరణ ఉందో అర్థమవుతుంది.

అవెంజర్ ఎండ్‌గేమ్ సినిమా.. గత ఏడాది వచ్చిన 'అవెంజర్స్ ఇన్ఫినిటీ వార్'కు సీక్వెల్. 'అవెంజర్స్ ఇన్ఫినిటీ వార్' ప్రపంచవ్యాప్తంగా 200 కోట్ల డాలర్లు వసూలు చేసింది. కాల్పనిక, సైంటిఫిక్ ఫిక్షనల్ సినిమాలు నిజానికి కొత్తేమీ కావు. స్టార్‌వార్స్ వంటివి దీనికి ఉదాహరణ.

విజువల్ ఎఫెక్ట్స్

1978లో వచ్చిన సూపర్‌మేన్ అమెరికాలో అత్యధిక కలెక్షన్లు రాబట్టిన సినిమాల జాబితాలో రెండో స్థానంలో ఉంది. ఆ సినిమా విజువల్ ఎఫెక్టులు ప్రత్యేకం. కానీ, ఆ సినిమాకు వచ్చిన మూడు ఆస్కార్ అవార్డులలో ఒక్కటి కూడా విజువల్ ఎఫెక్టులకు సంబంధించింది కాదు.

గత నాలుగు దశాబ్దాల్లో సినిమాలు సాంకేతికంగా బాగా ప్రగతి సాధించాయి. ప్రస్తుత సాంకేతిక పరిజ్ఞానంతో సంక్లిష్ట సన్నివేశాలు కూడా సులభరీతిలో, వాస్తవానికి దగ్గరగా సృష్టించగలుగుతున్నారు.

సూపర్ హీరోలు, విలన్లు అంతా కంప్యూటర్లలో సృష్టించినవారే కావడం దీనికి ఉదాహరణ.

వైవిధ్యం

సూపర్‌హీరో సినిమాలకు విభిన్న వర్గాల నుంచి ఆదరణ ఉంటోంది. వండర్ ఉమన్, బ్లాక్ పాంథర్‌లే దీనికి ఉదాహరణలు. మహిళ ప్రధాన పాత్రలో ఉన్న మొట్టమొదటి సూపర్ హీరో మూవీ వండర్ ఉమన్ కాగా... అందరూ నల్లజాతి నటులే ఉన్న సినిమా బ్లాక్ పాంథర్. అమెరికాలో బ్లాక్ పాంథర్‌ ప్రేక్షకుల్లో 53 శాతం ఆఫ్రికన్ అమెరికన్లు, హిస్పానిక్‌లు. మోషన్ పిక్చర్ అసోసియేషన్ ఆఫ్ అమెరికా లెక్కల ప్రకారం 2018లో ఈ వర్గం సగటు ప్రేక్షకుల సంఖ్య 37 శాతం.. కానీ, బ్లాక్ పాంథర్‌ను 53 శాతం మంది చూశారు.

స్క్రిప్ట్

ఎక్స్ మన్ సిరీస్‌లోని లోగాన్ వంటి సినిమాలు ప్రపంచవ్యాప్తంగా ఒకేలాంటి ఆదరణ పొందలేదు. కానీ, 2017లో జాక్‌మన్ ప్రధాన పాత్రధారిగా వచ్చిన ఈ సినిమా ఆస్కార్‌లో ఉత్తమ స్క్రీన్‌ప్లేకు నామినేట్ అయిన మొట్టమొదటి సూపర్ హీరో మూవీగా చరిత్ర సృష్టించింది.

అగ్రశ్రేణి నటులు

జెన్నిఫర్ లారెన్స్, క్రిస్టియన్ బాలె, జార్జ్ క్లూనీ, రాబర్ట్ డౌనీ జూనియర్, నటాలియా పోర్ట్‌మన్, గ్వినిత్ పాల్‌త్రో వంటి భారీ తారాగణం ఇలాంటి సూపర్ హీరో మూవీలలో కనిపిస్తుంటారు.

అగ్రశ్రేణి నటులున్నప్పుడు ఆ సినిమాలపై అంచనాలూ అంతేస్థాయిలో ఉంటాయి. అది ఆ సినిమా కలెక్షన్లపై ప్రభావం చూపిస్తుంది.

ఎస్కేపిజమ్

బాగా ఆదరణ పొందిన సూపర్ హీరో మూవీల్లో కొన్ని కామన్ పాయింట్స్ ఉన్నాయి. విపరీతమైన ప్రేక్షకాదరణ పొందిన సూపర్ హీరో చిత్రాలన్నీ 2008 తరువాత విడుదలైనవే. ప్రపంచవ్యాప్తంగా ఆర్థిక మాంద్యం ప్రభావం ఉన్న సంవత్సరంలో అలాంటి పరిస్థితుల నుంచి బయటపడాలన్న ప్రజల్లోని ఒక బలమైన కోరికకు దీనికి సంబంధం కనిపిస్తుంది.

ప్రపంచం ఆర్థిక ఇబ్బందుల్లో పడినప్పటికీ సినీ రంగం మాత్రం లాభాలు చవిచూసింది. అంతేకాదు.. 2008 నుంచి లాభాలు అంతకంతకూ పెరిగాయే తప్ప తగ్గలేదు.

ప్రజలు తమ కష్టాలను మర్చిపోవడానికి సినిమాలను ఆశ్రయించారని సదరన్ కాలిఫోర్నియా యూనివర్సిటీలోని ఎంటర్‌టైన్‌మెంట్ విభాగ ప్రొఫెసర్ మార్టీ కాప్లాన్ అభిప్రాయపడ్డారు.

పుంజుకొన్న చైనా మార్కెట్

అమెరికా కాకుండా చూస్తే ప్రపంచంలో చైనా కూడా సినిమాకు పెద్ద మార్కెట్. మోషన్ పిక్చర్ అసోసియేషన్ ఆఫ్ అమెరికా లెక్కల ప్రకారం 2018లో చైనాలో 900 కోట్ల డాలర్ల సినిమా వ్యాపారం జరిగింది. జపాన్‌తో పోల్చితే ఇది నాలుగు రెట్ల కంటే ఎక్కువ.

చైనాలో మంచి కలెక్షన్లు సాధించే సినిమాల్లో సూపర్ హీరో మూవీస్ ముందుంటున్నాయి. అందుకే ముందుముందు ఆసియా సూపర్ హీరో మూవీస్ సినిమాలు తీయాలని హాలీవుడ్ బుర్రలు ఆలోచిస్తున్నాయట. ఇది చైనా మార్కెట్‌ను మరింత ఆకర్షించడానికేనంటోంది హాలీవుడ్ రిపోర్టర్ అనే సినీ పత్రిక.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)