రాందేవ్ బాబా: అల్లోపతీ వైద్యాన్ని కించపరిచారంటూ ఐఎంఏ లీగల్ నోటీసులు

అల్లోపతీ, శాస్త్రీయ వైద్యాన్ని కించపరిచారంటూ యోగా గురు రాందేవ్ బాబాకు ఇండియన్ మెడికల్ అసోసియేషన్ (ఐఎంఏ) లీగల్ నోటీసులు పంపింది.

అల్లోపతీ ఒక ‘‘పిచ్చి శాస్త్రం’’ అంటూ రాందేవ్ వ్యాఖ్యలు చేసినట్లు ఓ వీడియో వాట్సాప్‌లో వైరల్ అవుతోంది.

రెమెడెసివిర్, ఫావిఫ్లూ సహా డ్రగ్ కంట్రోలర్ జనరల్ ఆఫ్ ఇండియా (డీసీజీఐ) ఆమోదించిన ఔషధాలు కోవిడ్-19 రోగులకు సాంత్వన చేకూర్చడం విఫలమయ్యాయని వీడియోలో రాందేవ్ వ్యాఖ్యానించారు.

ఆధునిక వైద్యులను హంతకులుగానూ గతంలో ఆయన వ్యాఖ్యానించారు.

రాందేవ్ వ్యాఖ్యలపై చర్యలు తీసుకోవాలని ఐఎంఏ, ఎయిమ్స్‌లోని రెసిడెంట్ డాక్టర్ అసోసియేషన్ కేంద్ర ఆరోగ్య మంత్రి హర్షవర్ధన్‌ను కూడా కోరారు.

రాందేవ్‌పై ఆరోపణలను ఖండించిన పతంజలి

రాందేవ్‌పై వస్తున్న ఆరోపణలను పతంజలి యోగాపీఠ్ ఖండించింది. రాత్రి, పగలు తేడా లేకుండా ఆరోగ్య సేవలు అందిస్తున్న వైద్యులు, ఇతర సిబ్బందిపై రాందేవ్‌కు చాలా గౌరవముందని తెలిపింది.

తనకు వచ్చిన ఓ వాట్సాప్ ఫార్వార్డ్ మెసేజ్‌ను కార్యక్రమంలోని ఇతర సభ్యుల ముందు చదివి వినపిస్తుండగా ఆ వీడియో తీశారని పతంజలి ట్రస్ట్ వివరించింది.

''ఆధునిక వైద్యం విషయంలో స్వామీజీకి ఎలాంటి దురుద్దేశాలు లేవు. వైద్యుల విషయంలోనూ ఆయనకు మంచి అభిప్రాయమే ఉంది. ఆయనపై వస్తున్న ఆరోపణల్లో నిజంలేదు''అని ప్రకటనలో పేర్కొన్నారు.

ప్రజలను తప్పుదోవ పట్టించేలా రాందేవ్ ఎలాంటి వ్యాఖ్యలూ చేయలేదని పతంజలి ట్రస్టు జనరల్ సెక్రటరీ ఆచార్య బాలకృష్ణ ప్రకటనలో వివరించారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)