ట్రెన్ డెరావురా: జైలునే నైట్ క్లబ్‌గా మార్చేసిన ఈ వెనెజ్వెలా నేరముఠా కథేంటి, ట్రంప్‌ ఎందుకు టార్గెట్ చేశారు?

వెనిజ్వెలా దేశంలోని అరగువా రాష్ట్రంలో ఉన్న టోకోరాన్ జైలుపై దాడికి 11 వేల మంది సైనికులను పంపారు ఆ దేశ అధ్యక్షుడు నికోలస్ మదురో.

ఆ జైలులో అల్లర్లను అణచివేసేందుకు వాళ్లను పంపలేదు. అత్యంత శక్తిమంతమైన ముఠా నియంత్రణలో ఉన్న జైలును తిరిగి తమ నియంత్రణలోకి తెచ్చుకోవడానికి ఈ బలగాలను పంపారు.

లాటిన్ అమెరికాలో అత్యంత భయానకమైన క్రిమినల్ గ్రూపుల్లో ఒకటైన 'ట్రెన్ డెరావువా' వెనిజ్వెలాలోని టొకోరాన్ జైలులో భారీ స్థావరాన్నే ఏర్పాటుచేసుకుంది.

జూ, రెస్టారెంట్లు, నైట్‌క్లబ్, బెట్టింగ్ షాప్, స్విమ్మింగ్ పూల్‌తో ఈ జైలును ఒక రిసార్ట్‌గా మార్చేసింది ఆ ముఠా. దీంతో ఈ ముఠాను అణచివేసి, జైలును తమ నియంత్రణలోకి తెచ్చుకోవడానికే నికోలస్ మదురో సైన్యాన్ని పంపారు.

కానీ, ఈ ముఠా నేత హెక్టర్ గెర్రెరో ఫ్లోర్స్ తప్పించుకున్నారు.

అమెరికా అధ్యక్షుడు డోనల్డ్ ట్రంప్‌ అక్రమ వలసదారులను పెద్ద ఎత్తున దేశం నుంచి బహిష్కరిస్తామంటూ చేసిన వాగ్దానంలో భాగంగా ట్రెన్ డెరావువా సంస్థ కూడా ట్రంప్ లక్ష్యంగా మారింది.

అసలింతకీ ఈ సంస్థకు, అమెరికాకు సంబంధం ఏమిటి? ట్రెన్ డెరావువా నేర ముఠా ఎలా పురుడుపోసుకుంది, ఎలా ఎదిగింది?

ఈ ముఠా ఎలా ప్రారంభమైంది?

తొలుత ట్రెన్ డెరావువా జైళ్ల గ్యాంగ్‌గా ప్రారంభమైంది. ఈ ముఠాను హెక్టర్ గెర్రెరో ఫ్లోర్స్ అంతర్జాతీయ నేర సంస్థగా మార్చినట్లు అమెరికా స్టేట్ డిపార్ట్‌మెంట్ తెలిపింది.

ఎవరైనా ఆయన సమాచారం ఇస్తే 5 మిలియన్ డాలర్ల (రూ.43 కోట్ల) రివార్డు ఇస్తామని ప్రకటించింది.

41 ఏళ్ల గెర్రోరో ఫ్లోర్స్, దశాబ్దానికి పైగా టోకోరాన్ జైలుకు వెళ్లి వస్తున్నారు.

గార్డుకు లంచం ఇచ్చి 2012లో జైలు నుంచి తప్పించుకున్నారు.

ఆ తర్వాత 2013లో తిరిగి అరెస్ట్ అయ్యారు. ఆయన తిరిగి వచ్చిన తర్వాత, జైలును లీజర్ కాంప్లెక్స్‌గా (సేద తీరే ప్రాంతంగా) మార్చేసినట్లు ఆరోపణలు ఉన్నాయి.

ఈ ముఠా పలుకుబడిని జైలు గేట్లను దాటి విస్తరించారు. బోలివర్ రాష్ట్రంలోని బంగారు గనులను, కరేబియన్ తీర ప్రాంతంలో డ్రగ్ కారిడార్లను, వెనిజ్వెలా కొలంబియా మధ్యలో రహస్య సరిహద్దు క్రాసింగ్‌లను తన ఆధీనంలోకి తీసుకున్నట్లు అమెరికా స్టేట్ డిపార్ట్‌మెంట్ తెలిపింది.

ఈ ముఠా పేరును 'ట్రైన్ ఆఫ్ అరగువా'గా అనువాదం చేశారు. అంటే, రైలురోడ్డు కార్మికుల సంఘం నుంచి ఇది ఉద్భవించి ఉండొచ్చు.

అరగువా మీదుగా వెళ్లే రైల్వే సెక్షన్‌ను ఈ యూనియన్ నియంత్రించేదని వెనిజ్వెలాలోని సెంట్రల్ యూనివర్సిటీ క్రిమినాలజీ ప్రొఫెసర్ లూయిస్ ఇజ్క్విల్ చెప్పారు. కాంట్రాక్టర్లను దోచుకుని, పని ప్రదేశాల్లోనే ఉద్యోగాలను అమ్మేదని తెలిపారు.

గెర్రోరో ఫ్లోర్స్ నేతృత్వంలో ట్రెన్ డి అరగువా ముఠా కొలంబియా, ఈక్వెడార్, పెరూ, చిలీ ప్రాంతాలకు విస్తరించింది. సెక్స్-ట్రాఫికింగ్‌లో వలసదారులను దోచుకోవడం, కాంట్రాక్ట్‌ హత్యలు , కిడ్నాపులు వంటి పలు నేర కార్యకలాపాల్లోకి విస్తరించింది ఈ ముఠా.

ఈ ముఠా ఎంత పెద్దది?

2014లో వెనిజ్వెలా మానవతా సంక్షోభం, ఆర్థిక అత్యవసర పరిస్థితిలో కూరుకుపోవడంతో ట్రెన్ డెరావువా ఇతర ప్రాంతాలకు విస్తరించింది. ప్రస్తుతం అమెరికా సహా ఎనిమిది ఇతర దేశాలలో ఈ ముఠా నేర కార్యకలాపాలు సాగిస్తున్నట్టు భావిస్తున్నారు.

ఆయా ప్రాంతాలలో స్థానిక నేరముఠాలతో కలిసి పనిచేస్తుంది.

ఈ గ్రూపుపై పుస్తకం రాసిన ఒక జర్నలిస్ట్.. ఈ సంస్థలో 5 వేల మంది సభ్యులు ఉన్నారని అంచనావేశారు. అంతేకాక, 10 మిలియన్ డాలర్ల (రూ.86 కోట్ల) నుంచి 15 మిలియన్ డాలర్ల (రూ.129 కోట్ల) వరకు వార్షిక సంపాదన ఉండొచ్చని ఆ పుస్తకంలో రాశారు.

ట్రెన్ డెరావువా అత్యంత క్రూరమైన సంస్థగా చిలీలోని ఒక ప్రాసిక్యూటర్ వర్ణించారు. తమ లక్ష్యాలను సాధించుకునేందుకు హత్యలు, చిత్రహింసలకు తెగబడుతుందన్నారు.

లాటిన్ అమెరికాలో ఉన్న ఇతర నేర ముఠాలతో పోలిస్తే ఈ సంస్థ చిన్నదేమీ కాదు. ఎల్ సాల్వడార్‌లోని అత్యంత హింసాత్మక ఎంఎస్-13 గ్యాంగ్‌తో ట్రెన్ డి అరగువా తరచూ పోల్చుకుంటూ ఉంటుంది.

ఈ నేర ముఠా సభ్యులు చిలీ పోలీసు అధికారుల యూనిఫాం ధరించి వెనిజ్వెలా విపక్ష సైనిక అధికారిక రోనాల్డ్ ఒజెడాను కిడ్నాప్ చేశారని ఆరోపణలు ఉన్నాయి. ఆయన మృతదేహం 2024 మార్చిలో చిలిలోని శాంటియాగోలో గుర్తించారు.

అమెరికా సరిహద్దుల్లో ఈ ముఠా సెక్స్-ట్రాఫికింగ్‌కు పాల్పడుతోందంటూ ట్రెన్ డి అరగువాను మునపటి అమెరికా అధ్యక్షుడు జో బైడెన్ నేతృత్వంలోని యూఎస్ ట్రెజరీ నిషేధించింది.

అమెరికాకు ముప్పా?

18వ శతాబ్దానికి చెందిన ఏలియన్స్ ఎనిమీస్ యాక్ట్‌ను ప్రయోగించిన ట్రంప్.. అమెరికా భూభాగంలో ట్రెన్ డెరావువా చొరబాటులకు, బెదిరింపులకు పాల్పడుతున్నట్లు ఆరోపించారు.

వెనిజ్వెలా అధ్యక్షుడు నికోలస్ మదురో నేతృత్వంలో అమెరికాకు వ్యతిరేకంగా యుద్ధం చేసేందుకు ప్రయత్నిస్తున్నట్లు చెప్పారు.

డోనల్డ్ ట్రంప్ పదవిలోకి వచ్చిన వెంటనే.. ఇస్లామిక్ స్టేట్, బోకో హారమ్, నైజీరియా ఇస్లామిస్ట్ మిలిటెంట్ల కేటగిరీలోకి ట్రెన్ డి అరగువాన్ కూడా చేరుస్తూ.. దీన్ని విదేశీ ఉగ్రవాద సంస్థగా ప్రకటించారు.

ఇటీవల టెక్సస్, ఫ్లోరిడా, న్యూయార్క్, ఇల్లినాయిస్ ప్రాంతాల్లో ట్రెన్ డెరావువా సభ్యులు అరెస్ట్ అయ్యారు. హత్యల నుంచి కిడ్నాప్‌ల వరకు పలు అభియోగాలు వారిపై ఉన్నాయి.

అమెరికాలోకి వచ్చిన 600 మంది వెనిజ్వెలా వలసదారులకు ఈ ముఠాతో సంబంధం ఉందని డిపార్ట్‌మెంట్ ఆఫ్ హోమ్‌ల్యాండ్ అంచనావేసినట్లు గత వేసవిలో ఎన్‌బీసీ న్యూస్ నివేదించింది. వారిలో 100 మంది ఈ ముఠా సభ్యులని పేర్కొంది.

2023 నాటికి అమెరికాలో 7,70,000 మంది వెనిజ్వెలా ప్రజలు నివసిస్తున్నారు. ఇతర వలసదారులతో పోలిస్తే స్వల్పంగా 2 శాతం కంటే తక్కువని మైగ్రేషన్ పాలసీ ఇన్‌స్టిట్యూట్ తెలిపింది.

అమెరికా ప్రభుత్వం వీరిలో చాలామందికి రక్షణ హోదాను కల్పించింది.

2024లో 3,13,500 మంది వెనెజ్వెలా వలసదారులు సరిహద్దులోకి వచ్చినట్లు కస్టమ్స్, బోర్డర్ ప్రొటెక్షన్ రిపోర్టులు వెల్లడించాయి.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,డి ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయం.)