Боздиди маъмурони иттилоъотии Ғарб аз Сурия барои муқобила бо исломгароён
Image copyrightAPМуъовини вазири хориҷаи Сурия ба Би-би-сӣ гуфтааст барои мубориза бо рушди гурӯҳҳои исломгаро дар миёни ҷабҳаи мухолифони давлати Сурия маъмурони иттилоъотии кишварҳои ғарбӣ ба Димишқ рафтаанд.
Файсал Миқдод, муъовини вазири хориҷаи Сурия, рӯзи чаҳоршанбеи 15 январ (25 даймоҳ) ҳамчунин гуфт миёни мақомҳои амниятӣ ва сиёсатмадорони кишварҳои ғарбӣ бар сари канорагирии Башор Асад аз қудрат ихтилофи назари фоҳише вуҷуд дорад.
Дар ҳафтаҳои ахир интишори гузоришҳое аз рушд ва қудрат гирифтани гурӯҳҳои ҷиҳодӣ дар миёни мухолифони давлати Сурия нигарониҳои фаровоне ба вуҷуд овардааст.
Суханони оқои Миқдод дар ҳоле баён мешавад, ки намояндагони давлати Сурия худро омода мекунанд, то дар музокироти сулҳи Женев, ки қарор аст ҳафтаи оянда дар Суис баргузор шавад, ширкат кунанд.
Бо ин ҳол, аслитарин гурӯҳи мухолифи Башор Асад, яъне Эътилофи миллии Сурия, ҳануз эълом накарда, ки дар ин музокирот ҳузур хоҳад ёфт ё хайр.
Гузоришгарон мегӯянд амиқтар шудани шикофҳо миёни гурӯҳҳои мухолифи давлати Сурия кишварҳои ғарбиро мураддад карда ва дар баробари ин ба давлати Сурия эътимод ба нафс бахшидааст.
Муъовини вазири хориҷаи Сурия дар гуфтугӯи худ бо Би-би-сӣ таъкид кард, ки кишварҳои ғарбӣ акнун ба ин "воқеъият" пай бурдаанд, ки "ҳеч гузинае" барои ҷонишинии давлати Башор Асад "вуҷуд надорад."
Файсал Миқдод дар посух ба пурсиши Би-би-сӣ дар бораи мушаххасоти гурӯҳҳои иттилоъотии боздидкунанда аз Димишқ гуфт, ки асомии кишварҳоро фош нахоҳад кард, аммо гуфт "бисёре аз кишварҳои ғарбӣ маъмурони худро ба Димишқ фиристоданд."
Ӯ ҳамчунин дар посух ба эҳтимоли дархости давлатҳои ғарбӣ барои бозгушоии сафоратхонаҳои худ дар Димишқ гуфт: "Бале, бисёре аз кишварҳо ба суроғи мо меоянд. Албатта, баъзе аз онҳо мунтазири натоиҷи музокироти Женев ҳастанд ва баъзе дигар ҳам мегӯянд дар ҳоли баррасии роҳҳои мавҷуданд."
Вай афзуд: "Баъзе мегӯянд, ки омодаанд барои афзоиши амният (бо Димишқ) ҳамкорӣ кунанд, чиро ки муътақиданд он теруристҳое, ки аз ғарби Урупо ба Туркия ва сипас ба Сурия эъзом мешаванд, як таҳдиди ҷиддӣ маҳсуб мешаванд."
Вазорати хориҷаи Бритониё дар посух ба суоли Би-би-сӣ дар бораи эъзоми маъмурони иттилоъотии ин кишвар ба Сурия аз изҳори назар сар боз зад.
Бо ин вуҷуд, сардабири бахши байналмилалии Би-би-сӣ мегӯяд ба ӯ аз тариқи манобеъи огоҳ иттилоъ дода шуда, ки дидор миёни намояндагони ниҳодҳои иттилоъотии Ғарб ва давлати Сурия сурат гирифтааст.
Баъзе аз таҳлилгарон вуҷуди гуроишҳои исломгароёна ва шаклгирии гурӯҳҳои тундрави исломӣ дар миёни мухолифони давлати Башор Асадро яке аз илали "тардиди Ғарб" дар мувоҷеҳа бо буҳрони Сурия медонанд, ки акнун вориди севумин соли хунини худ мешавад.
