US loltootaafi sirna ittisa haleellaa qilleensarraa Israa'eliif erguufi - Peentagon
Madda suuraa, Reuters
US loltootaafi sirna ittisa haleellaa misaa'elaa ammayyaa gara Israa'elitti erguuf akka jirtu beekisfte.
Sirna ittisa haleellaa misaa'elaa ammayyaafi loltoota sirnicha irra hojjatan gara Israa'elitti erguuf US kan murteessite gafaa Onkoloolessa 1 Iraan bilaastik misaa'eliidhaan Israa'el haleeluu hordofeeti.
Peentagoon akka beeksisetti, sirni ittisa misaa'ela fageenyaa dheeraa Terminal High-Altitude Area Defense (THAAD) jedhamu gara Israa'el geeffamee "Israa'el akka ittisu" Pirezidaant Joo Baayidan ajajaniiru.
Jalqaba ji'a kanaa, Onkoloolessa 1 "Iraan bilaastik misaa'elii fageenyaa dheeraa imaluu 200tti dhiyaatun Israa'el haleelunshee ni yaadatama.
Israa'el misaa'eloota Iraan heddu rukuttee kuffisuu ibsitus kaansaa giddu galaafi Kibba Israa'el haleelera.
Haleellaa Iraan gaggeessiteef deebii laalessaa ta'e akka kennitu Israa'el erga dhaadachuu jalqabdee torbee lama ta'eera. Garuu haleellaa akkamii Iraan irratti gaggeessuf akka karoorsite hin dubbanne.
Ministiirri Ittisaa Israa'el Yaa'ov Gaalanta, haleellaa "hamaa, qiyyaafannoo irratti hundaa'efi hundaa ol ammoo haleellaa tasaati" jechuun akeekkachiisan.
Iraan immoo haleellan Israa'el irraa irratti raawwatama taanan deebii cimaa akka kennitu akeekkachiistee turte.
Oduufi xiinxala kallattiin bilbila keessan irratti argachuuf ammuma
Asiin seenaa
End of podcast promotion
Haleellaa Israa'el gaggeessitu booda Iraan deebistee bilaastik misaa'elaan yoo Israa'el haleelte miidhan akka yeroo darbee akka hin qaqqabneef sirni ittisaa farra haleellaa misaa'eelaa THAAD erguuf akka murteessite US beeksiste.
Peentaagon akka beeksisetti, sirni ittisaa haleellaa misaa'elaa kun gara Israa'el akka geeffamu murtaa'unsaa "haleellaan balistik misa'elaa Iraan kan biraa Israa'el ittisuuf kaayyoo US yoomiyyuu hin jijjiiramne mirkaneessuf, akkasumas lammiilee US Israa'el keessa jiraatan ittisuufi."
US kanaan dura bara 2019 leenjif jecha sirna ittisa misaa'elaa ammayyaa kana gara Israa'elitti ergitee turte.
Bara 2023 Hezbollaan Israa'el haleeluu hordofee US sirna ittisaa misaa'elaa THAAD gara Baha Giddu Galeessatti erguunshee ni yaadatama.
Israa'el gaggeessaa Hezbollaa kan ture Hasan Nasrallaa Beerut keessatti, akkasumas qondaala olaanaa Hamaas Ismaa'el Haniyyaa Teehraan keessatti ajjeesuusheef haaloo bahuuf jecha baliistik misaa'elaan Israa'el haaleeluu beeksiftee turte.
