Lagos bans street hawking: Ìjọba ìpìnlẹ̀ Eko fòfin de ọjà títà àti títọọrọ báárà lójú pópó

Ijọba ipinlẹ Eko ti ṣagbakalẹ igbimọ kan ti yoo fopin si ki kiri ọja laarin oju popo atawọn to n tọrọ baara nipinlẹ naa.

Ijọba Eko sọ pe awọn gbe igbesẹ yii nitori awọn adigunajle to maa n fara pamọ sabẹ irufẹ ọja tita tabi agbe lati lo ọna ẹburu ja awọn araalu lole.

Ikede igbimọ tuntun naa lo waye nibi ipade awọn akọroyin kan ti kọmiṣona fun ọrọ awọn ọdọ ati idagbasoke awujọ, Olusegu Dawodu, ṣe onigbọnwọ rẹ, eyii to waye ni Alausa.

Dawodu ni wọn gbe igbimọ naa kalẹ lati kapa iwa ọdaran nipinlẹ Eko, eyii ti awọn kọlọrọsi kan n wu labẹ asia pe awọn taja tabi tọrọ baara.

O ni igbimimọ naa yoo bẹrẹ iṣẹ laipẹ lati fopin iwa idigunjale bẹẹ.

Gẹgẹ bii ohun to sọ, awọn n fopin si ki kiri ọja laarin oju popo nitori iroyin ti awọn gbọ pe pupọ lara awọn onibara atawọn ọlọja bẹẹ lo ni oniruru ohun ija oloro lara wọn.

O ni "Ijọba yoo ṣe ọpọ itaniji lawọn ileeṣẹ iroyin ki awọn eeyan le mọ igbesẹ ti ijọba n gbe lori ọrọ naa."

Dawodu gba awọn olugbe ipinlẹ Eko nimọran lati maa ko awọn owo tabi dukia wọn lọ sile awọn ọmọ alaini iya tabi opo nibi ti wọn yoo ti lo owo naa bo ṣe yẹ ti ba fẹ fi ṣe saraa.

Ninu ọrọ rẹ, "Titọrọ baara laarin adugbo kii ṣe ohun to yẹ ki a gba laaye lawujọ wa, bẹẹ naa ni tita ọjsa loju popo."

Kọmiṣọna ọhun fi kun pe igbesẹ awọn ko lodi si ofin ipinlẹ Eko ti wọn gbe kalẹ lọdun 2015.

O ṣalaye pe igbese yii wa ni ibamu pẹlu ori 157, ati abala kinni ofin ipinlẹ Eko.

Lasiko to n sọrọ nibi ipade ọhun, kọmiṣona ọlọpaa ipinlẹ Eko, Hakeem Odumosu sọ pe "Opin ti de ba ọja tita loju popo nipinlẹ Eko."

Odumosu ni ileeṣẹ ọlọpaa yoo fọwọsowọpọ pẹlu ijọba lati ri daju pe asiko awọn kọlọrọsi a lọ kolohun kigbe di ohun itan ni ipinlẹ Eko.