Россия Украина ҳудудининг бешдан бирини босиб олган - Видео Ukraina Rossiya AQSh

Россиянинг Украинага ҳужум бошлаганига 100 кун тўларкан, Украина тупроқларининг 20 фоизини Россия босиб олгани айтилмоқда.

Бу Кремль босқин бошида эълон қилган мақсадларга тўғри келмайди.

24 февраль куни Россия Президенти Владимир Путин Украинани "демилитаризация қилиш ва денацификациялаш" мақсадида "махсус ҳарбий амалиёт" бошлашга буйруқ берганини эълон қилди.

Сўнг Россия расмийлари Украинага бостириб киришдан қандай мақсад кўзлангани ҳақидаги баёнотларини бир неча марта ўзгартирдилар.

Февралнинг охирги кунлари ва март ойида Гостомель аэропорти ва Киев вилоятига катта куч ташланганига қарамасдан, пойтахт Киевни босиб ололмадилар, кейин бундай мақсадлари бўлмаганини айтишди.

Сўнг Донбасс аҳолисини "нацистлардан ҳимоя қилиш" ҳарбий амалиёт мақсади деб айтилди.

Халқаро ҳарбий таҳлилчилар ва кузатувчилар Россиянинг Украина бўйича режаси барбод бўлгани, қисқа вақтда бутун мамлакатни босиб олиб, ўзининг қўғирчоқ ҳукуматини ўрнатиш мақсадига етолмаганидан кейин имкони борича кўпроқ Украина ҳудудини қўлида ушлаб қолишга ҳаракат қилаётганини айтадилар.

Апрель ойида Украина шимолидаги Харков йўналишидаги қўшинларини шарққа ташлаган Россия Донецк ва Луганск вилоятларининг маъмурий ҳудудларини тўла қўлга киритиш ҳаракатларини бошлади, аммо бир ой давомида бунинг ҳам уддасидан чиқолмади.

3 июнь куни Россия Украинага бостириб кирганига роппа-роса 100 кун бўлди.

"100 кун ичида қанча ҳудуд босиб олинди", "ўзи бундан муддао нима эди?"

Кўпчилик, ҳатто, Россиянинг ўзидаги урушни қўллаб-қувватлаётган одамлар ҳам шу саволларни бера бошлаганлар, бу саволларнинг қўйилишининг ўзи Россия раҳбарияти учун ёқимсиз жавобларга етаклайди.

Шунинг учун россиялик оммавий ахборот воситалари таҳририятларига таяниб тарқатилаётган хабарларга кўра, Кремль матбуотга урушнинг 100 кунлигини эслатмаслик лозимлиги ҳақида кўрсатма берган.

Охирги кунларда Россия қўшинлари жон-жаҳди билан Северодонецк шаҳрини қўлга киритишга ҳаракат қилмоқда, шаҳарни босиб олиш учун катта куч ташланган.

Луганск вилояти ҳокими Серҳий Ҳайдай Северодонецк шаҳрини қўлдан бой беришлари мумкинлигини айтади, бироқ Северодонецк Россия армиясига қарши мустаҳкам қалъа вазифасини бажариб берди, дейди.

"Россиянинг ҳужумларини қайтариш билан биз нафақат уларни илгарилашдан тўсаяпмиз, балки одами ва қуролини ҳам йўқ қилаяпмиз", деди Би-би-сига Серҳий Ҳайдай.

Президент Зеленский Украина босиб олинган ерларини қайтариб олиши учун Ғарбдан қурол-яроғ юборишни тезлаштиришни сўради.

Россия: Америка ракеталари уруш оловига ёғ пуркамоқда - Видео

Куни-кеча АҚШ HIMARS (High Mobility Artillery Rocket Systems) бирваракайига ўт очиш тизимини Украинага беришга қарор қилди.

HIMARS бир вақтнинг ўзида бир неча ракетани 70 километр узоқликдаги нишонга қарши ота олади. Бу ҳозир Украина ихтиёридаги ракета тизимларидан анча узоқ.

Шунингдек, бу тизим нишонни Россия ракета тизимларига нисбатан анча аниқ олади.

АҚШнинг Украинага янги тайинланган элчиси Бриджит Брик Президент Зеленский ва матбуот вакиллари билан учрашди.

Шунингдек, у ўзининг биринчи халқаро интервьюсини Би-би-сига берди.

Брик хоним айтишича, АҚШ Украинага бераётган ракета тизими Украина қўлини баланд қилиш мақсадини ҳам кўзлайди.

"Барча хавфсизлик кўмакларимизнинг мақсадларимиздан бири - Украинанинг музокарада қўлини баланд қилишдир. Бу нарса Украинага бу можарони тугатиш мақсадида излаётган вазиятини юзага келтириши мумкин", дейди АҚШ элчиси.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek