Эътироф: Нуфузли британ нашри Ўзбек шахматчиларини 'қўрқмас', деб атади, президент Мирзиёев тақдирлади, Бош вазир кутиб олди - Ўзбекистон ва дунё O‘zbekiston Dunyo Sport Yangiliklar

Президент Шавкат Мирзиёев ғолиб шахматчиларни "Ўзбекистон фахри"га айлантирди. Яна пул мукофоти ва қимматбаҳо машина билан тақдирлади. Чемпион Ўзбекистон терма жамоаси Тошкентга қайтди. Уларни Ўзбекистон Бош вазирининг ўзи кутиб олди. The Guardian ўзбекистонлик ёш шахматчиларни жаҳон шахматининг келажаги, деб атади. Уларга "юксак марраларни кўзлаган" ва "қўрқмас", дея таъриф берди.

Шахмат бўйича Ўзбекистон эркаклар терма жамоаси 44-Бутунжаҳон Олимпиадасининг мутлақ ғолиблигини қўлга киритган, ўзининг оламшумул ютуғи билан шахмат оламидаги манаман, деган рақибларини ҳам ҳайратда қолдирганди.

600 миллион сўмдан иборат пул мукофоти ва "Equinox" русумидаги машиналар калитлари шахматчиларга Тошкент халқаро аэропортининг ўзидаёқ топширилди.

Уларга "Ўзбекистон фахри" унвонини бериш тўғрисидаги фармонни эса, президент Шавкат Мирзиёев ҳали кеча, 10 август куни имзолаганди.

Алоқадор мавзулар:

Тарихий ютуқ

Ҳиндистоннинг Ченнайида бирор бир мағлубиятсиз оламшумул ютуққа эришган жамоа Ўзбекистон шахмати тарихига ҳам кирган.

Ўзбекистон тарихида кузатилмаган бу каби воқеълик мамлакат президентининг эътиборидан ҳам четда қолмаган.

Шавкат Мирзиёев кечанинг ўзидаёқ шахсан сим қоқиб, уларни эришган ғалабалари билан номма-ном қутлаган.

Худди шу телефон мулоқоти чоғида Ўзбекистон президентининг ўзбекистонлик ёш шахматчилар иштирокидаги Нидерландияга қарши финал беллашувини ҳам томоша қилгани маълум бўлган.

Ўзбекистон президентининг Ченнайга сим қоқиши ўша соатлардаёқ маҳаллий ва минтақавий нашрларда сарлавҳаларга чиққан хабарга айланган.

Ижтимоий тармоқларнинг ўзбек сегментини ларзага келтирган.

Шавкат Мирзиёев буни Ўзбекистон тарихида "жуда катта из қолдирадиган" воқеъликка қиёс берган.

Ўзбекистонлик шахматчилар мамлакат "тарихида ўзбек миллати нимага қодирлигини яна бир бор намоён этганликлари"ни айтган.

The Guardian мақоласи

The Guardian ўз мақоласини дунё рейтингида 14-ўринда бўлган Ўзбекистоннинг 180 давлат иштирокидаги турнирда ютиб чиққанини алоҳида таъкидлаш билан бошлаган.

Кейин Ченнай Олимпиадаси шок натижа билан якунланганига ўтган.

Бунинг ортидан эса, ўртача ёши 20 да ва дунё рейтингида бор-йўғи 14-ўринда бўлган Ўзбекистон турнирнинг уч карра ғолиби Арманистон ва ҳиндистонлик ўсмирларни ортда қолдирганини алоҳида эътироф этган.

Худди шу ўринда рейтинг пешқадами АҚШ Бутунжаҳон шахмат Олимпиадасини бирор бир медалсиз якунлаганини ҳам хосан таъкидлаб ўтган.

The Guardian ўзбекистонлик ёш шахматчи Нодирбек Абдусатторов ва унинг ҳиндистонлик рақиби Гукеш Доммаражуни жаҳоннинг юқори шоҳсупаларини эгаллаяжак тез ўсиб бораётган истеъдод соҳиблари сифатида тилга олган.

Икковлон 1-тахтада олтин ва кумуш медалларини қўлга киритишган, жаҳон чемпиони Магнус Карлсенни бронза медали билан кифояланишга мажбур қилишганди.

The Guardian, ўз навбатида, Ўзбекистон аллақачон шахмат учун йилига $4 миллион доллардан ажратаётгани, Тошкент Бутунжаҳон шахмат Олимпиадасига мезбонли қилажак 2026 йилда бу маблағнинг янада ортишига ҳам тўхталган.

Нашр ўзбекистонлик ёш шахмат юлдузларининг Рустам Қосимжоновдан илҳомланган бўлишлари мумкинлиги эҳтимоли ҳақида ҳам сўз юритган.

Ўзбекистонлик номдор шахматчи Рустам Қосимжонов эса, ФИДЕ таснифида 2004 йилги жаҳон чемпиони бўлади.

Нуфузли британ нашри ўз мақоласи сўнггида "юксак марраларни кўзлаган", "қўрқмас" ўзбек ва ҳинд ўсмирлари шахматнинг келажаги бўлишлари ҳақида ёзган.

Ўзбекистонда, қарийб икки йилдирки, шахматни ривожлантириш давлат дастури амалда.

Дастурда Ўзбекистоннинг шахмат бўйича жаҳон рейтингидаги ўрнини мустаҳкамлаш ва 2025 йилгача унинг кучли ўнталикка кириши вазифа этиб белгиланган.

BBCUZBEK.COM билан Telegram орқали +44 7858860002 номери билан боғланинг.Telegram каналимиз: https://t.me/bbcuzbek