Қирғизистон ва Тожикистон Токио Олимпиадасида гап бўлди, Ўзбекистондан рекорд ва антирекорд, Тошкентга Moderna келади - O‘zbekiston dunyo yangiliklar

Икки Марказий Осиё давлатининг тантанали очилиш маросими чоғидаги чиқиши ҳамманинг эътиборини ўзига тортди. Ҳатто етакчи Ғарб нашрларида ҳам сарлавҳаларга чиққан янгиликка айланди. Японлар таажжуб ва тушунмовчиликда.

Токио Ёзги Олимпиадасига расман 23 июль куни старт берилган, Ўйинларнинг очилиш маросими Токионинг Миллий стадионида бўлиб ўтганди.

Кўпчиликнинг катта эътиборини тортгани эса, ҳар икки давлат Олимпия терма жамоаларининг маросимда деярли юз ниқобларисиз кўриниш берганликлари бўлган.

Юз ниқоби ҳатто уларнинг байроқдорларида бўлмагани эса, хабарларнинг илк қаторларига чиққан.

Ўтиб боришаркан, уларнинг очиқ юз билан яна қўл силтаб, табассум қилиб қўйишгани ҳам алоҳида тилга олиб ўтилган.

Мазкур ҳолат ижтимоий тармоқларда мезбон японияликларнинг ҳам танқид, таажжуб ва тушунмовчиликларига сабаб бўлган.

Улардан айримлари бу спортчиларнинг юз ниқобларисиз ҳолати ҳатто очилиш маросимини телевизор орқали кўриб ўтирган болаларида савол туғдирганини айтишган.

Бошқалари бу икки Марказий Осиё давлати вакиллари юз ниқоби тақиш тўғрисидаги эслатмани унутиб қўйган-қўймаганликларини савол остига олишган.

Яна бирлари эса, ҳалича коронавирус "аниқланмаган" Туркманистон Олимпия терма жамоаси тўлиқ юз ниқобида чиқиб, Қирғизистон ва Тожикистоннинг "орқасидан зарба бергани"ни айтиб, ҳазиллашишган.

Қирғизистон ва Тожикистондан ташқари яна Покистон Олимпия терма жамоаси ҳам худди шундай қилган.

Қолган барча иштирокчи давлатлар терма жамоаларининг мутлақ юз ниқобида бўлишгани эса, уларнинг очиқ юз билан юрганликлари, кўзда тутилган расмий тартиб-қоидаларга риоя қилишмаганини янада яққол намойиш этиб қўйган.

Токио Олимпиадаси ва коронавирус

Бу каби аҳвол эса, глобал коронавирус пандемияси боис Токио Ёзги Олимпиадаси бир йилга кечиктирилган, Ўйинлар деярли томошабинсиз ва фавқулодда вазият остида ўтказилаётган бир пайтда кузатилган.

Токио Олимпиадаси ташкилотчилари эса, мавжуд ҳолат юзасидан изоҳ сўраб қилинган мурожаатларга ҳалича жавоб беришмаган.

Ҳар икки давлат Миллий Олимпия қўмиталарининг ҳам бу хусусда бирор бир расмий баёнот билан чиқишгани ҳалича матбуотда кўзга ташланмаган.

Японияда жами коронавирус ҳоллари ҳозирга келиб 870 мингдан ортган.

Кундалик рақамлар эса, кеча, 26 июль куни 5020 тани ташкил этган.

Аммо шу пайтгача мамлакат аҳолисининг бор-йўғи учдан бир қисми ковидга қарши ярим эмланган.

Бу Ўйинлар Японияни коронавирус ўчоғига айлантиради, деган жиддий хавотирларни ҳам пайдо қилмай қўймаган.

Олимпиада Ўйинларига алоқаси бўлган юздан ортиқ кишида эса, аллақачон коронавирус ҳам аниқланган.

Ҳатто очилиш маросими куни ҳам юзлаб одам пандемия боис, Ўйинларга қарши ўз норозиликларини изҳор этишган.

Яқинда ўтказилган сўров японлар ярмидан кўпроғининг ўзлари мезбонлик қилаётган Олимпиаданинг ўтказилишига қарши кайфиятда эканликларини кўрсатган.

Сўров иштирокчиларининг 70 фоизга яқини ташкилотчилар коронавирусни жиловлай олишмайди, деган фикрда эканликлари маълум бўлган.

Ташкилотчиларнинг коронавирусни жиловлашга қаратилган қатъий чора-тадбирларига мувофиқ эса, мезбон Токиода барчанинг спорт иншоотлари ичкариси ва ташқарисида юз ниқобида юришлари шарт, деб кўрилади.

Марказий Осиё ва коронавирус

Қирғизистон Қозоғистондан кейин Марказий Осиёнинг коронавирус энг кўп тарқалган иккинчи давлати бўлади.

Тожикистонда эса, шу кунларда коронавирус ҳолларининг яна ортиб бораётгани кузатилади.

Куни-кеча бу минтақа давлатига ҳам коронавируснинг дельта - ҳиндча штамми кириб келганига оид хабарлар ҳам олинган.

Кеча, 26 июль куни Токиода янги Олимпиада рекордини ўрнатган Ўзбекистонда эса, яна антирекорд қайд қилинган.

Коронавирус ва пневмонияга оид кундалик кўрсаткичлар жами 1410 тани ташкил этган.

Бу мамлакат пандемия тарихидаги энг юқори кунлик кўрсаткич экани айтилмоқда.

Муаттар Набиева эса, даст кўтариш машқида 98 кг. тошни кўтара олди.

Ўзбекистон оғир атлетикачисининг бу ютуғи ортидан, Токио Олимпиадасида рекорд ўрнатган биринчи Марказий Осиё давлати бўлди.

Муаттарнинг ўзи эса, тошни силтаб кўтариш машқидаги натижаси ортидан, Ўйинларнинг тўртинчи ўрни билан кифояланишга мажбур бўлди.

Худди шу манзарада олинаётган хабарларга кўра, 29 июль куни пойтахт Тошкентга АҚШдан 3 миллион доза Moderna вакцинаси келтирилади.

Бу ҳақда куни-кеча Ўзбекистон Президенти Шавкат Мирзиёевнинг ўзи ҳам шахсан маълум қилганди.

Бу Pfizer ва Oxford-AstraZeneca дан сўнг Ўзбекистонга олиб келинаётган Ғарбда ишланган учинчи вакцина бўлади.

Маълум бўлишича, Moderna ҳам Ўзбекистонга Бирлашган Миллатлар Ташкилотининг COVAX дастури доирасида ажратилган.

Расман эълон қилинган янги маълумотларга таянилса, Ўзбекистонда шу пайтгача коронавирусга қарши тўлиқ эмланганларнинг сони бир миллиондан ошган.

Ўзбекистон минтақанинг аҳолиси энг йирик давлати бўлади, сони 35 миллион атрофида экани айтилади.

BBCUZBEK.COM билан Telegram орқали +44 7858860002 номери билан боғланинг.Telegram каналимиз: https://t.me/bbcuzbek