Путин нега Украина масаласида мутлақо муроса қилмоқчи эмас?

Баъзан энг катта таассуротни айтилган гап эмас, балки унга бўлган муносабат қолдиради.

Россиянинг Узоқ Шарқида туриб, Владимир Путин Ғарбга мурожаат қилди: Украинага қўшин юборишни хаёлингизга ҳам келтирманг – ҳатто улар тинчликпарвар кучлар бўлса ҳам.

"Агар у ерда қўшинлар пайдо бўлса, – деди Россия президенти, – айниқса ҳозир жанглар давом этаётган бир паллада, биз уларни йўқ қилиш учун қонуний нишон сифатида кўрамиз".

Унинг сўзларига Владивостокдаги иқтисодий форум иштирокчилари гулдурос қарсаклар билан жавоб бердилар.

Россия расмийлари ва бизнес етакчилар Ғарб аскарларини «йўқ қилиш» таҳдидини олқишлаётгандек кўриндилар.

Бу қарсаклар, айниқса, Киев иттифоқчилари – «Истовчилар коалицияси» Украинага урушдан кейин хавфсизлик кучларини жойлаштиришга ваъда берганидан бир кун ўтиб янграгани билан диққатга сазовор.

Залда яна қарсак бўлди. Бу сафар Путин Украина президенти Володимир Зеленский билан учрашишга тайёрлигини билдирди – аммо фақат Россияда.

"Бундай учрашув учун энг муносиб жой – Россия пойтахти, Қаҳрамон шаҳар Москва", деди у.

Россия ташқарисида бу таклиф жиддий қабул қилинмади. Умуман амалга ошмайдиган сиёсий «троллинг» сифатида баҳоланди.

Бироқ бу Кремлнинг позициясини яққол кўрсатди: «Ҳа, биз тинчликни хоҳлаймиз, лекин фақат ўз шартларимиз асосида. Агар шартларимизни қабул қилмасангиз – тинчлик бўлмайди».

Бу муросасиз ёндашувни бир нечта омиллар қувватламоқда. Аввало, Кремл Россия қўшинлари фронтда ташаббусни қўлда сақлаб турганига ишонади.

Иккинчидан, дипломатик манзара.

Яқинда Хитойда Путин қатор дунё етакчилари билан қўл бериб кўришди, табассум улашди.

Бу Россиянинг Хитой, Ҳиндистон ва Шимолий Корея каби қудратли дўстлари борлигини кўрсатишга қаратилган эди.

Учинчидан, АҚШ билан боғлиқ омил.

Ўтган ой АҚШ Президенти Доналд Трамп Путинни Аляскада саммитга таклиф қилди.

Россияда буни Ғарбнинг Россияни яккалаш уринишлари барбод бўлгани далили сифатида талқин қилишди.

Трамп аввал ҳам Кремлни жангни тўхтатишга кўндириш учун ултиматумлар қўйган, санкциялар билан таҳдид қилган.

Аммо таҳдидлар амалга ошмагани Россиянинг ишончини янада мустаҳкамлади.

Путин омма олдида Трампнинг тинчлик ҳаракатларини мақтайди, аммо унинг оташкесим таклифларини рад этади.

У Украина масаласида ҳеч қандай муросага тайёр эмаслигини кўрсатиб турибди.

Шундай экан, тинчлик истиқболлари қандай? Путин яқинда, "туннел охирида ёруғлик кўряпман", деди.

Аммо аслида Россия бир йўлдан, Украина ва Европа (қисман АҚШ ҳам) бошқа йўлдан бормоқда – улар турли туннелларда, турли манзилларга қараб ҳаракат қилаяптилар.

Украина ва Европа учун асосий мақсад – жангни тугатиш, хавфсизлик кафолатларини шакллантириш ва Киевни яна бир босқиндан ҳимоя қилиш.

Путин эса «туннел охиридаги ёруғлик»ни Россия ғалабаси ва кенгроқ маънода Россия манфаатига хизмат қиладиган янги глобал тартибда кўрмоқда.

Тинчлик нуқтаи назаридан эса, бу икки йўлнинг қаерда ва қачон кесишиши ҳозирча мутлақо ноаниқ.