Трамп: Путин келишувни хоҳламаётганга ўхшайди

АҚШ Президенти Доналд Трамп Украинадаги урушни тўхтатишни муҳокама қилиш учун Россия ва Украина президентларини учрашишга яна бир бор чақирган бир вақтда Кремл Зеленский билан Путин саммити ҳақидаги гап-сўзлар аҳамиятини пасайтирди.

Украина Президенти Володимир Зеленский билан Россия Президенти Владимир Путин учрашсинлар деган чақириқ АҚШ Президенти Доналд Трамп Путин билан Аляскада кўришгани ва Оқ Уйда Европа лидерлари ва Зеленский кутиб олингани ортидан янграмоқда.

19 август куни Президент Трамп YouTube даги The Mark Levin Show подкастига интервю берди.

Президент бўлиб сайланишидан олдин Украина урушини бир кунда тугатишга ваъда берган Трамп низони ҳал этиш "мураккаб эканини" тан олди.

Эҳтимолки, Россия президенти ҳозир урушни тўхтатишдан манфаатдор эмас, деди.

"Кейинги ҳафталарда Президент Путин нима қилишини билиб оламиз. У келишувга эришишни хоҳламаётган бўлиши мумкин", деди Президент Трамп.

Трамп қўшимча қилишича, агар шундай бўлса, Путин "оғир вазият" билан юзма-юз келиши мумкин, аммо Америка президенти бу "оғир вазият" нимадан иборат бўлиши мумкинлигини очиқламади.

Трамп сўзларига кўра, Путин билан Зеленскийнинг "менсиз учрашганлари яхши бўлади".

"Агар зарур бўлса, Зеленский ва Путин учрашувига мен ҳам қўшилишим мумкин, лекин кўрайликчи, нима бўларкин", деди Президент Трамп.

18 август куни Украина ва Европа раҳбарлари Оқ Уйда Президент Трамп билан учрашганларидан кейин АҚШ Президенти Россия Президенти Владимирга Путинга қўнғироқ қилди.

19 август. Путин Зеленскийни ҳам Москвага таклиф қилдими? "Хоҳишлилар иттифоқи" ва Трамп ҳаммавқелари ҳақида қандай фикрда?

Путин Зеленский билан Москвада учрашишни таклиф қилди

AFP агентлиги суҳбатнинг мазмунидан хабардор бўлган иккита манбага таяниб хабар беришича, Россия президенти Владимир Путин Доналд Трамп билан телефон орқали мулоқотда Украина президенти Владимир Зеленский билан Москвада учрашишни таклиф қилган.

"Путин Москвани тилга олди", — деди манбалардан бири. Агентлик суҳбатдоши қўшимча қилишича, суҳбат давомида Оқ уйда бўлган Зеленский бунга "йўқ" деб жавоб берган.

Илгари, Fox News телеканалига берган интервьюсида Трамп Зеленский ва Европа етакчилари билан музокаралар пайтида Путин қўнғироқ қилганида алоҳида хонага чиққанини айтган эди.

Кремль Путиннинг Зеленский билан учрашишга тайёрлигини расман тасдиқламади, гарчи Трамп ва АҚШ давлат котиби Марко Рубио Россия президенти бунга рози бўлганини таъкидлашган.

"Хоҳишли иттифоқи" яқин кунларда АҚШ билан Украинага хавфсизлик кафолатлари бўйича музокара олиб боради

"Хоҳишли иттифоқи" яқин кунларда АҚШ билан Украинага хавфсизлик кафолатлари бўйича музокара олиб боради

"Хоҳишли иттифоқи"даги режалаштириш гуруҳлари яқин кунларда АҚШдаги ҳамкасблари билан учрашиб, ишончли хавфсизлик кафолатларини бериш ва Украинадаги ҳарбий ҳаракатлар тугагач, ёрдам кучларини жойлаштиришга тайёргарлик кўриш режаларини кучайтиради.

Бу ҳақда Буюк Британия бош вазири Кир Стармернинг иттифоқининг виртуал учрашуви якунлари бўйича матбуот хизмати хабар берди.

Стармер ва Франция президенти Эммануэл Макрон раислигида ўтган учрашувда 30 дан ортиқ давлат етакчилари иштирок этди.

Улар хавфсизлик кафолатларидан ташқари, Владимир Путин ноқонуний босқинни тўхтатиш учун жиддий қадамлар қўйишга тайёрлигини кўрсатмагунча, Россияга босимни қандай кучайтириш, жумладан санкциялар орқали қандай таъсир қилишни муҳокама қилишди.

Учрашувда айнан қайси давлатлар иштирок этгани аниқланмаган. Илгари Полша бош вазири Доналд Туск онлайн коалиция йиғилишида бир қатор Европа давлатлари, Канада, Япония, Туркия ва Янги Зеландия етакчилари иштирок этганини айтган эди.

"Хоҳишли иттифоқи" — бу Украинани қўллаб-қувватлаш режасини ишлаб чиқаётган давлатлар гуруҳидир.

Трамп Fox News телеканалида яна нималар деди?

Владимир Путин ҳақида

Трампнинг фикрича, Путин урушдан чарчаган ва келишувга эришиш "муаммо бўлмаслиги керак". Шу билан бирга, Трамп Россия президентининг келишувга эришишни хоҳламаслик эҳтимолини ҳам истисно қилмаслигини таъкидлади. Агар шундай бўлса, Путинни "мураккаб вазият" кутмоқда.

Владимир Зеленский ҳақида

Трампнинг айтишича, Зеленский мослашувчанликни намойиш этиши керак, аммо у нимани назарда тутганига аниқлик киритмаган.

Путин ва Зеленский учрашуви ҳақида

Трамп Россия ва Украина президентлари ўртасидаги учрашувда иштирок этишни режалаштирмаяпти.

"Менимча, улар мен ўйлагандан бироз яхшироқ чиқишадилар, акс ҳолда мен икки киши учун учрашув ташкил қилмаган бўлар эдим. Мен уч киши учун, тр уч томонлама учрашув ташкил қилган бўлар эдим, лекин ўйлайманки, ишлари аввалгидан кўра яхшироқ кетмоқда", — деди у.

Ҳудудлар алмашинуви ҳақида

Fox News бошловчисининг ҳудудлар ҳақидаги саволига жавоб берар экан, Трамп Украинанинг "жуда кўп ерга эга бўлишини" айтди, лекин кейин Россия ҳарбий қудрати Украина ҳарбий қудратидан қанчалик кучли эканлиги ҳақида гапирди.

Хавфсизлик кафолатлари ҳақида

Франция, Германия ва Буюк Британия хавфсизлик кафолатлари доирасида Украинага ўз ҳарбий контингентини юборишга тайёр. АҚШ европаликларга, масалан, ҳаводан ёрдам бериши мумкин.

18 август 2025. "Украина НАТОга кирмайди, Қрим қайтарилмайди" - Вашингтондаги учрашувлар Украина келажаги учун қанчалик муҳим?

Жума куни Доналд Трамп ва Владимир Путин Аляскада учрашгандан сўнг, Оқ уй раҳбари Украина НАТО таркибига кирмаслиги ва Россия 2014 йил қўшиб олган Қрим Украинага қайтарилмаслигини билдирди.

Украина президенти Володимир Зеленский Доналд Трамп билан музокаралар ўтказиш мақсадида Вашингтонга келди.

Жума куни Оқ уй раҳбари Владимир Путин билан Аляскада суҳбатлашди ва тинчликка эришиш учун ўт очишни тўхтатиш ғоясидан воз кечди. Европа мамлакатларининг етакчи раҳбарлари Зеленскийни қўллаб-қувватлаш мақсадида АҚШ пойтахтига бирга боришини маълум қилдилар.

Оқ уйдаги шиддатли музокаралар Украина келажагини ўзгартириши мумкин

BBC мухбири Франк Гарднер таҳлили:

Душанба куни Оқ уйда бўлиб ўтадиган учрашув Украина тақдири учун – ва бутун Европанинг хавфсизлиги учун – ўтган жума куни Аляскада ўтган АҚШ-Россия саммитига қараганда ҳам муҳимроқ бўлиши эҳтимоли бор.

Ташқаридан Путин-Трамп учрашуви кутилганидик натижасиз якунланди.

Ўт очиш тўхтатилади деган эълон ҳам бўлмади, санкциялар масаласида ҳам янгилик йўқ, катта баёнотлар қилинмади.

Наҳотки, Украина ва Европа дунёдаги энг қудратли икки ядровий давлат ёпиқ эшиклар ортида тайёрлаган келишувдан четда қоладими?

Украина ва унинг ҳамкорлари бунга йўл қўймасликка ҳаракат қилаётгани кўриниб турибди.

Вашингтонда президент Зеленский билан бирга Британия бош вазири Кир Стармер, Франция президенти Макрон, Германия канцлери Мерц ва бошқа етакчиларнинг келиши Зеленский 28 февралда бўлганидек Овал офисда яна "қопқонга" тушиб қолмаслиги учун эмас.

Улар Доналд Трампга икки нарсани аниқ етказишга бел боғлашган: биринчиси – Украина иштирокисиз Украинага ҳеч қандай тинчлик битими бўлиши мумкин эмас; иккинчиси – у келишув "темирдек мустаҳкам" хавфсизлик кафолатлари билан таъминланиши шарт.

Энг аввало, Европанинг етакчилари АҚШ президентига Украина ва Европа ягона фронтда эканини кўрсатишни исташмоқда. Улар шунингдек, унинг Владимир Путин билан шахсий яқин муносабатлари Россия етакчисининг талабларига бўйсунишга олиб келмаслигига ишонч ҳосил қилишни хоҳлашади.

Мана шу ерда Кир Стармернинг дипломатик маҳоратлари жиддий синовдан ўтади.

Трамп Стармерни ёқтиради ва уни тинглайди. Бир ойдан кейин эса Трамп давлат ташрифи билан Британияга келади.

У, шунингдек, учрашувга бораётган НАТО бош котиби Марк Рютте билан ҳам яхши муносабатда. Рютте баъзан "Трампнинг шивирловчиси" деб ҳам аталади.

Аммо АҚШ президенти Франция раҳбари Макронни унчалик ёқтирмайди ва яқинда Оқ уй унинг БМТ Бош Ассамблеясида Фаластин давлатини шартсиз тан олиш ниятини қаттиқ танқид қилди.

Европа етакчилари халқаро чегаралар куч билан ўзгартирилиши мумкин эмаслигини таъкидлаб келади. Президент Зеленский эса ҳеч қачон ҳудуддан воз кечмаслигини ва буни Украина конституцияси ҳам тақиқлашини қайта-қайта айтиб келмоқда.

Бироқ Путин Донбассни хоҳлайди – у ерда Россия кучлари ҳозир 85 фоиздан ортиқ ҳудудни назорат қилади. Шу билан бирга у Қримни ҳеч қачон қайтариш ниятида эмас.

Бир вақтлар Эстония бош вазири бўлган ва ҳозир Европанинг олий даражадаги дипломати Кая Каллас айтганидек: Украина учун ғалаба фақат босиб олинган ерларни қайтаришдан иборат бўлиши шарт эмас.

Агар Украина НАТОнинг 5-моддасига ўхшаш хавфсизлик кафолатларини қўлга кирита олса, келгусида Россия тажовузини тийиб туришга ва давлат мустақиллигини таъминлашга етарли бўлса, у ҳам ғалаба шакли бўлиши мумкин.

Ҳозир АҚШ ва Россия муҳокама қилаётган таклиф Украина ҳудудининг бир қисмини хавфсизлик кафолатлари билан алмашишга ўхшайди.

Аммо саволлар жуда кўп.

Украина урушни тугатадиган, аммо ерларининг бир қисмини йўқотадиган келишувни қабул қила оладими, айниқса, минглаб инсонлар айнан ўша ерлар учун ҳалок бўлган бир пайтда?

Агар Украинадан Россия ҳали эгалламаган Донецк вилоятининг қолган 30 фоизидан воз кечиши сўралса, бу Киев томон йўлни ҳимоясиз қолдирмайдими?

Стармер мақтаётган "Кўнгиллилар иттифоқи"-чи?

Илгари муҳокама қилинган Украинага ўн минглаб аскар жойлаштириш режаларидан қайтилди.

Эндиликда асосий эътибор "ҳаво ва денгиз хавфсизлигини таъминлаш" ҳамда Украина армиясини тиклашга ёрдам беришга қаратилган.

Бироқ майдонда уруш тўхтаган тақдирда ҳам хавфли шароит сақланиб қолади.

Мен суҳбатлашган ҳар бир ҳарбий эксперт шу фикрдаки: жанговар ҳаракатлар тўхташи билан Путин армиясини қайта тузади, яна кўпроқ қурол ишлаб чиқаради ва эҳтимол, уч-тўрт йил ичида янги ҳудудларни босиб олиш имконига эга бўлади.

Агар бу ҳолат амалга ошса, Россия колоннасига қарши биринчи ракетани отишга тайёр турадиган жасур "Тайфун" ёки F-35 учувчиси керак бўлади.