رضا ہمدانی بی بی سی اردو ڈاٹ کام، اسلام آباد

	راولپنڈی میں ہونے والا ایک خود کش حملہ

پاکستان میں رواں سال میں اب تک اٹھارہ خودکش حملے ہو چکے ہیں جن میں دو سو پچاس سے زائد افراد ہلاک ہوئے۔ اس کے مقابلے میں وہ دونوں ممالک یعنی عراق اور افغانستان صورتحال جنگ کی سی ہے، پاکستان سے کم خودکش حملے ہوئے ہیں۔

عراق میں رواں سال کے دوران تیرہ خودکش حملے ہوئے ہیں جن میں دو سو چوہتر افراد ہلاک ہوئے ہیں۔ جبکہ افغانستان میں اس سال کی پہلی سہ ماہی میں تین خودکش حملے ہوئے جن میں ہلاک ہونے والوں کی تعداد پندرہ ہے۔

سنہ دو ہزار سات کے دوران خودکش حملوں اور ان میں ہلاک ہونے والوں کے اعتبار سے ان تین ممالک میں عراق پہلے نمبر پر تھا جہاں ایک سو پچاس سے زائد خودکش حملے ہوئے۔

رواں سال میں عراق کے ایک خودکش حملے میں اوسطً اکیس افراد ہلاک ہوئے۔ عراق میں سب سے مہلک حملہ دو فروری کو ہوا جس میں دو خودکش بمباروں نے ننانوے لوگوں کو ہلاک کر دیا۔ اس کے علاوہ تین دیگر حملوں میں ہلاک ہونے والوں کی تعداد تیس سے زائد تھی۔

	سیکیورٹی اہلکار راولپنڈی میں خود کش حملے کا نشانہ بننے والی منی بس کا جائزہ لے رہے ہیں

سنہ دو ہزار سات میں خودکش حملوں کی تعداد کے حوالے سے دوسرے نمبر پر افغانستان تھا جہاں ایک سو سے زائد حملے جبکہ پاکستان میں چھپن ہوئے۔ تاہم ان حملوں میں ہلاکتوں کے اعتبار سے پچھلے سال پاکستان دوسرے نمبر پر تھا کیونکہ پاکستان میں ساڑھے چھ سو زائد ہلاکتیں ہوئیں جبکہ افغانستان میں دو سو پچیس۔

مبصرین کے مطابق عراق کے مقابلے میں پاکستان میں کیے گئے خودکش حملے زیادہ مہلک ہیں کیونکہ عراق میں حملہ آور آسان ہدف کے لیے جاتا ہے اور ان کا مقصد زیادہ سے زیادہ تباہی اور ہلاکتیں کرنا ہے۔ دوسری طرف پاکستان میں خودکش حملہ آور زیادہ تر سیکیورٹی اہلکاروں کو نشانہ بناتے ہیں۔

ان کا کہنا ہے کہ سنہ دو ہزار سات میں بھی ساڑھے چھ سو ہلاکتوں میں سے پینسٹھ فیصد ہلاکتیں سیکیورٹی اہلکاروں کی ہوئیں۔ ان کا مزید کہنا ہے کہ اسی طرح رواں سال میں ہونے والے خودکش حملوں میں بھی سیکیورٹی ایجنسیوں کو ہی ہدف بنایا گیا ہے۔

	لاہور میں خود کش حملہ جس کا نشانہ بننے والوں میں پولیس اہلکار زیادہ تھے

پچھلے سال عروج پر رہنے والی اس خونریزی کو مدِنظر رکھتے ہوئے کچھ مغربی ممالک نے پاکستان میں نومبر کو لگنے والی ایمرجنسی کے نفاذ کے بعد اپنے شہریوں کو پاکستان کا سفر نہ کرنے اور پاکستان میں موجود اپنے باشندوں کو محتاط رہنے کی تاکید کی ہے۔ اور یہ ٹریول ایڈوائزری ابھی بھی اتنی ہی لاگو ہے جتنی کہ نومبر دو ہزار سات میں تھی۔

ان ممالک میں کینیڈا، برطانیہ، امریکہ اور آسٹریلیا جیسے ممالک شامل ہیں۔ پاکستان کا سفر نہ کرنے کی وجوہات میں تین نومبر کو ایمرجنسی کا نفاذ، سوات کی موجودہ صورتحال اور خودکش حملے شامل ہیں۔

	لاہور میں ایک خود کش حملے کا نشانہ بننے والا ایک شہری

آئندہ حکومت کے لیے ملک میں امن و امان کی صورتحال کو قابو کرنا سب سے بڑا اور دشوار گزار چیلنج ہے۔ اس کی ایک وجہ یہ ہے کہ ان حملوں کے پیچھے عناصر نہ صرف اپنے حملوں میں بے باک ہو رہے ہیں بلکہ نئی تکنیکیں بھی آزما رہے ہیں جیسے کہ لاہور میں واقع ایف آئی اے کے دفتر پر خودکش کار بم حملہ تھا۔