دلاور خان وزیر بی بی سی اردو ڈاٹ کام، ڈیرہ اسماعیل خان

	زخمیوں کو بنوں کے فوجی ہسپتال منتقل کردیا گیا ہے (فائل فوٹو)

واقعہ میرانشاہ سے دس کلومیٹر دور مغرب کی جانب افغان سرحد کے قریب بویا چوکی پر ہوا۔ ہلاک ہونے والوں میں ٹوچی سکاؤٹس کا ایک اہلکار، خودکش حملہ آور اور ایک راہ گیر جبکہ زخمیوں میں ٹوچی سکاؤٹس کے دو اہلکار اور تین شہری شامل ہیں۔

میرانشاہ کی پولیٹیکل انتظامیہ کے مطابق سفید کار میں سوار خودکش حملہ آور نے اپنی گاڑی چیک پوسٹ سے ٹکرادی۔ زخمیوں کو ہیلی کاپٹر کے ذریعے بنوں کے فوجی ہسپتال منتقل کردیا گیا ہے۔

یہ واقعات ایک ایسے موقع پر ہو رہے ہیں جب گورنر کی جانب سے بھیجا ہوا جرگہ میرانشاہ سکاؤٹس قلعہ میں موجود ہے اور اطلاعات ملی ہیں کہ جرگے میں شامل پانچ رکنی وفد نے دتہ خیل کے مقام پر مقامی طالبان کے ساتھ مذاکرات شروع کردیے ہیں۔