عبدالحئی کاکڑ بی بی سی اردوڈاٹ کام، پشاور

	گزشتہ سال طالبان اور حکومت کے درمیان ایک امن معاہدے پر دستخط کیے گئے تھے۔

شمالی وزیرستان سے ملنے والی اطلاعات کے مطابق سنیچر اور اتوار کی درمیانی شب دو بجے بعض نامعلوم افراد نے افغانستان کی سرحد کے قریب سیدگئی کے علاقے نرئی ڈوک میں قائم فوجی چیک پوسٹ پر راکٹ داغے تھے۔تاہم کوششوں کے باوجود حکومتی سطح پر اس واقعے کی تصدیق نہیں ہوسکی ہے۔

ایسی اطلاعات بھی ملی ہیں کہ فوج نے جوابی حملہ بھی کیا لیکن اس میں کوئی جانی نقصان نہیں ہوا۔

شمالی وزیرستان کے سیدگئی علاقے میں گزشتہ روز حکومت کے مطابق ایک گھر میں بم دھماکہ ہوا تھا جس میں تین افراد ہلاک اور تین زخمی ہوگئے تھے تاہم مقامی لوگوں نے دعویٰ کیا تھا کہ ہلاکتیں فضائی حملے کے نتیجے میں ہوئی تھیں۔

واقعے کے بعد مقامی طالبان نے برہمی کا اظہار کرتے ہوئے کہا تھا کہ اگر اس قسم کے حملے جاری رہے تو وہ حکومت کے ساتھ کیے گئے امن معاہدے پر نظر ثانی کریں گے۔

جمعہ کی رات کو بھی میران شاہ میں فوجی ٹھکانوں پر راکٹ داغے گئے تھے۔شمالی وزیرستان میں گزشتہ چند دنوں کے دوران ایک بار پھر تشدد کے واقعات میں اضافہ ہوا ہے۔یاد رہے کہ گزشتہ سال ستمبر میں مقامی طالبان اور حکومت کے درمیان ایک امن معاہدے پر دستخط کئے گئے تھے۔