دلاور خان وزیر بی بی سی اردو ڈاٹ کام، ڈیرہ اسماعیل خان

	حملہ آور کی گاڑی بھی مکمل طور پر تباہ ہوگئی(فائل فوٹو)

ادھر جنوبی وزیرستان انتظامیہ نے جمعرات کو سکیورٹی فورسز اور مقامی طالبان کے درمیان ہونے والی جھڑپ میں سات سکیورٹی اہلکاروں کی ہلاکت کی تصدیق کر دی ہے۔

ٹانک پولیس کے مطابق فوجی قافلے پر حملے کا واقعہ جمعہ کو دوپر دو بجے اس وقت پیش آیا جب ٹانک سے منزئی جانے والے فوجی قافلے کو ڈبرہ کے مقام پر ایک خود کش حملہ آور نے نشانہ بنایا۔

پولیس کے مطابق حملہ آور نے اپنی جیپ فوجی قافلے میں شامل گاڑی سے ٹکرا دی جس کے نتیجے میں دھماکے سے حملہ آور ہلاک اور پانچ سکیورٹی اہلکار زخمی ہوگئے۔ دھماکے میں حملہ آور کی گاڑی بھی مکمل طور پر تباہ ہوگئی۔

زخمی فوجیوں کو بذریعہ ہیلی کاپٹر بنوں کے فوجی ہسپتال منتقل کر دیا گیا ہے۔

ادھر قبائلی علاقے شمالی وزیرستان کے صدر مقام میران شاہ میں شدت پسندوں نے ایک فوجی چوکی پر حملہ کیا ہے۔مقامی انتظامیہ کے مطابق اس حملے کے دوران فائرنگ کے تبادلے میں ایک حملہ آور ہلاک ہوا ہے۔

علاوہ ازیں جنوبی وزیرستان کی انتظامیہ نے جمعرات کو سکیورٹی فورسز اور مقامی طالبان کے درمیان جھڑپ میں سات اہلکاروں کی ہلاکت اور گیارہ کے زخمی ہونے کی تصدیق کر دی ہے۔ انتظامیہ نے یہ دعوٰی بھی کیا ہے کہ اس جھڑپ میں پندرہ شدت پسند بھی مارے گئے ہیں۔

یا د رہے کہ یہ جھڑپ جنوبی وزیرستان میں وانا جنڈولہ روڈ پر گشت کرنے والی فوجی قافلے کی ایک حفاظتی گاڑی پر چگملائی کے مقام پر حملے کے بعد شروع ہوئی تھی۔

شمالی اور جنوبی وزیرستان میں گزشتہ ایک سال سے فوج نے غیرملکیوں اور مقامی طالبان کے خلاف زمینی آپریشن کا سلسلہ بند کردیا ہے اور صرف فضائی کارروائی سے کام لیا جا رہا ہے لیکن اس کے باوجود فوجی قافلوں اور سکیورٹی فورسز کی چوکیوں پر حملوں میں کمی نہیں آئی ہے۔