احمد رضا بی بی سی اردو ڈاٹ کام، اسلام آباد

	پولیس اہلکار چارسدہ دھماکے کے بعد شواہد جمع کر ہے ہیں

اس سے قبل ملک کے مختلف علاقوں میں اس سال سات خود کش بم دھماکے ہوئے جن میں مجموعی طور پر اڑتالیس افراد جاں بحق اور لگ بھگ ڈیڑھ سو زخمی ہوئے۔

ان دھماکوں میں ہلاک ہونے والوں میں ڈی آئی جی پولیس پشاور، کوئٹہ کے سول جج اور سات وکلاء کے علاوہ کم سے کم 16 سکیورٹی اہلکار بھی شامل تھے۔

سنہ 2007 کے پہلے ہی ماہ میں چار خود کش حملے ہوئے۔ پہلا خود کش حملہ بائیس جنوری کو شمالی وزیرستان کے شہر میر علی کے قریب فوجی گاڑیوں کے قافلے پر ہوا جس میں حملہ آور، چار فوجی اور ایک عورت جاں بحق جبکہ تیئس زخمی ہوئے۔

اس حملے کے چار دن بعد 26 جنوری کو وفاقی دارالحکومت اسلام آباد میں میریٹ ہوٹل کے باہر خودکش حملے میں حملہ آور اور سکیورٹی گارڈ ہلاک جبکہ 5 لوگ زخمی ہوئے۔

ایک دن بعد ہی یعنی27 جنوری کو پشاور کے قصہ خوانی بازار میں ایک مسجد کے قریب خود کش حملہ ہوا جس میں ڈی آئی جی پولیس پشاور، ڈی ایس پی سمیت اور دو یو سی ناظمین سمیت 13 افراد جاں بحق اور 30 زخمی ہوئے۔

ماہ جنوری کا آخری خودکش حملہ انتیس جنوری کو صوبہ سرحد کے علاقے ڈیرہ اسماعیل خان میں ہوا جس میں ایک مرتبہ پھر پولیس نشانہ بنی۔ پولیس چیک پوسٹ کے قریب ہونے والے خودکش حملے میں 2 پولیس اہلکار اور حملہ آور جاں بحق ہوئے۔

فروری کے مہینے میں بھی خود کش حملوں کے تین واقعات پیش آئے۔ تین فروری کو صوبہ سرحد کے ضلع ٹانک کے علاقے بارہ خیل میں فوجی گاڑیوں کے قافلے پر خودکش حملہ ہوا جس میں حملہ آور اور دو فوجی مارے گئے۔

تین دن بعد 6 فروری کو اسلام آباد ایئرپورٹ کے احاطے میں ایک اور خود کش حملہ ہوا جس میں صرف حملہ آور ہلاک ہوا جبکہ 3 سکیورٹی اہلکار زخمی ہوئے۔

سترہ فروری کو کوئٹہ میں ایک بڑا خود کش حملہ سینئر سول جج کی عدالت میں ہوا جس میں سول جج اور چھ وکلاء سمیت سترہ افراد ہلاک اور پینتیس زخمی ہوئے۔

اس کے بعد 29 مارچ کو صوبہ پنجاب کے علاقے کھاریاں میں فوجی چھاؤنی کے قریب فوجی تربیتی مرکز میں ہونے والے خودکش حملے میں دو فوجی اور حملہ آور مارے گئے جبکہ سات لوگ زخمی ہوئے۔