رفعت اللہ اورکزئی بی بی سی اردو ڈاٹ کام، پشاور

	شہر کے پیشتر علاقوں میں ووٹ ڈالنے کی شرح کمی رہی

پشاور شہر میں مختلف پولنگ سٹیشنوں کے باہر امیدواروں کی طرف سے بڑے بڑے انتخابی کیمپ بنائے گئے ہیں جہاں پر لوگوں کے ہجوم نظر آئے۔

انتخابی مہم میں ایسی خونریزی پہلے نہیں دیکھی گئی

آخری لمحات میں الیکشن کی تیاریاں

نواز لیگ کے امیدوار سمیت چار ہلاک

پشاور میں قومی اسمبلی کی چار اور صوبائی اسمبلی کی گیارہ نشستوں کے لیے کل 149 امیدوار مدمقابل ہیں۔ شہر میں 833 پولنگ سٹیشن اور 2355 پولنگ بوتھ بنائے گئے ہیں۔

شہر کے پیشتر علاقوں میں ووٹ ڈالنے کی شرح کمی رہی جبکہ بعض دیہاتی علاقوں میں ووٹ ڈالنے کی شرح شہری علاقوں کے نسبت بہتر رہی۔

شہر کے امیرانہ علاقوں ڈیفنس، یونیورسٹی روڈ، صدر، حیات آباد اور یونیورسٹی ٹاؤن میں سڑکیں اور بازار سنسان دکھائی دیے جبکہ پولنگ عملے کے مطابق یہاں ووٹ ڈالنے کی شرح بھی کم رہی۔

حلقہ این اے چار پشاور میں گورنمینٹ ہائی سکول ہزار خوانی میں میں بنائے گئے ایک پولنگ سٹیشن میں دوپہر دو بجے تک کل سو کے قریب ووٹ ڈالے گئے تھے جبکہ یہاں کل رجسٹرڈ ووٹوں کی تعداد 2200 ہے۔

خواتین کے بعض پولنگ سٹیشنوں پر دن بارہ بجے کے وقت چار سے دس ووٹ ڈالے گئے تھے جبکہ بعض علاقوں میں یہ تعداد پچیس سے پچاس کے درمیان رہی۔

شہر میں انتہائی حساس قرار دیے گئے پولنگ سٹیشنوں پر پولیس کی سخت سکیورٹی رہی۔ ان مراکز کے چاروں اطراف میں خار دار تاریں بچھائی گئیں جہاں گاڑیوں کا داخلہ بند کردیا گیا۔

پشاور شہر میں دوپہر چار بجے تک پولنگ بغیر کسی ناخوشگوار واقعہ کی جاری رہی۔ چند علاقوں میں عوامی نیشنل پارٹی اور پاکستان پیپلزپارٹی پارلمینٹرینز کے خواتین پولنگ ایجنٹوں میں تلخ کلامی کے واقعات ہوئے۔ اس کے علاوہ سرحد کے شورش زدہ ضلع سوات کے علاوہ باقی تمام اضلاع سے کسی قسم کے ناخوشگوار واقعہ کی اطلاع نہیں ملی۔

سوات میں پولیس ذرائع کے مطابق تین مختلف مقامات پر بم دھماکے ہوئے جس میں کوئی جانی نقصان نہیں ہوا ہے۔ہنگو میں نامعلوم مسلح افراد کی طرف سے ایک پولنگ سٹیشن کو بم دھماکے میں نشانہ بنایا گیا ہے۔