జార్జ్ ఫ్లాయిడ్: అమెరికాలో జరుగుతున్న నిరసనలకు ట్రంప్ కుమార్తె టిఫానీ ట్రంప్ మద్దతు

అమెరికాలో నల్ల జాతీయులపై పోలీసుల అరాచకత్వానికి వ్యతిరేకంగా జరుగుతున్న ‘బ్లాక్ లైవ్స్ మ్యాటర్’ నిరసనలకు ఆ దేశ అధ్యక్షుడు డోనల్డ్ ట్రంప్ చిన్న కూతురు టిఫానీ ట్రంప్ మద్దతు తెలిపారు.

జార్జి ఫ్లాయిడ్ అనే నల్ల జాతీయుడు పోలీసులు అరెస్టు చేసే క్రమంలో మరణించడంతో గత వారం నుంచి అమెరికాలో దేశవ్యాప్తంగా ఆందోళనలు జరుగుతున్న సంగతి తెలిసిందే.

దాదాపు 40 నగరాల్లో కర్ఫ్యూ విధించినా, జనాలు రోడ్లపైకి వచ్చి నిరసనలు తెలుపుతున్నారు.

సోషల్ మీడియాలోనూ సామాన్యుల నుంచి ప్రముఖుల వరకూ ఈ నిరసనలకు మద్దతు తెలుపుతూ పోస్ట్‌లు చేస్తున్నారు.

టిఫానీ కూడా పూర్తిగా నలుపు రంగుతో ఉన్న ఓ ఫొటోను ఇన్‌స్టాగ్రామ్‌లో పోస్ట్ చేశారు.

#BlackoutTuesday #justiceforgeorgefloyd హ్యాష్‌ట్యాగ్‌లను వాడుతూ... ‘‘ఒంటరిగా మనమేం సాధించలేం. కానీ కలిసికట్టుగా ఏదైనా చేయగలం’’ అని అర్థం వచ్చేలా ఓ వ్యాఖ్యను పెట్టారు.

అధ్యక్ష భవనం వైట్ హౌస్ బయట ఆందోళనకారులను అదుపు చేసేందుకు పోలీసులు టియర్ గ్యాస్ ప్రయోగించిన సమయంలోనే టిఫానీ ఈ పోస్ట్ చేశారు.

టిఫానీ తల్లి, డోనల్డ్ ట్రంప్ రెండో భార్య మార్లా మేపల్స్ కూడా నిరసనలకు మద్దతు ప్రకటిస్తూ ఇలాంటి ఫొటోనే సోషల్ మీడియాలో పోస్ట్ చేశారు.

టిఫానీ పెట్టిన పోస్ట్‌ను సమర్థిస్తూ చాలా మంది కామెంట్లు పెట్టారు. ఈ విషయంలో ముందుగా ఆమె తన తండ్రి డోనల్డ్ ట్రంప్‌తో మాట్లడాల్సిందని కూడా కొందరు వ్యాఖ్యానించారు.

అమెరికాలో సోషల్ మీడియాలో #blackoutTuesday హ్యాష్‌ట్యాగ్ ట్రెండ్ అవుతోంది.

ఏం జరిగింది?

మినెసోటా రాష్ట్రంలోని మినియాపోలిస్ నగరంలో మే 25న జార్జి ఫ్లాయిడ్ (46) అనే ఓ నల్ల జాతి వ్యక్తి పోలీసులు అరెస్టు చేస్తున్నప్పుడు చనిపోయారు.

ఫ్లాయిడ్ అరెస్టు వీడియో సోషల్ మీడియాలో వైరల్ అయ్యింది.

ఫ్లాయిడ్‌‌ను అరెస్టు చేసే క్రమంలో తెల్ల జాతికి చెందిన పోలీసు అధికారి డెరెక్ షావిన్... ఆయన్ను నెలకు అదిమిపట్టి, మెడను మోకాలితో నొక్కిపట్టి చాలా సేపు కూర్చోవడం ఆ వీడియోలో కనిపించింది.

జార్జ్‌తో పాటు అక్కడున్న మిగతా వాళ్లు కూడా పోలీసును అలా చేయొద్దని వారించడం అందులో రికార్డైంది.

‘‘ప్లీజ్, నాకు ఊపిరి ఆడటం లేదు’’ అంటూ జార్జి మొరపెట్టుకున్నా, పోలీసు వినిపించుకోలేదు. జార్జికి అవే ఆఖరి మాటలయ్యాయి.

జార్జి మరణంతో పోలీసుల తీరుపై అమెరికా వ్యాప్తంగా ఆగ్రహం వ్యక్తమవుతోంది. చాలా చోట్ల నిరసనలు జరుగుతున్నాయి.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)