కరోనావైరస్: బ్రిటన్‌లో ఎన్‌హెచ్ఎస్ కోసం రూ.180 కోట్ల విరాళాలను సేకరించిన 99 ఏళ్ల మాజీ సైనికుడు

బ్రిటన్ నేషనల్ హెల్త్ సర్వీస్ కోసం 19 మిలియన్ పౌండ్లు (దాదాపు రూ.180 కోట్లు) విరాళాలు సేకరించిన 99 సంవత్సరాల మాజీ సైనికుడిని "వన్ మాన్ ఫండ్ రైజింగ్ మెషిన్" గా డ్యూక్ ఆఫ్ కేంబ్రిడ్జ్ ప్రశంసించారు.

కెప్టెన్ టామ్ మూర్ తన 100వ పుట్టిన రోజుకు ముందు తన గార్డెన్ విస్తీర్ణం ఎంత ఉందో దాని కన్నా వంద రెట్లు ఎక్కువ దూరం నడిచి కేవలం 1000 పౌండ్లు అంటే (సుమారు రూ.96000) మాత్రమే సేకరించాలని లక్ష్యంగా పెట్టుకున్నారు. ఏప్రిల్ 30 ఆయన పుట్టిన రోజు.

కానీ ఆయన ప్రారంభించిన ‘జస్ట్ గివింగ్’ పేజీకి ఇప్పటికే 8,90,000 మంది విరాళాలు అందచేశారు. ఆయన్ను వీరుడిగా సత్కరించాలని ఐదు లక్షల మందికి పైగా ప్రజలు ఆనర్స్ కమిటీకి విజ్ఞప్తి చేశారు.

గురువారంతో ఆయన ఫండ్ రైజింగ్ ఛాలెంజ్ ముగిసింది. సేకరించిన విరాళాలను చూసి ఆయన ఎంతో ఆనందించారు.

శుక్రవారం కాస్త తక్కువ సమయం నడుస్తాను కానీ, అమెరికా, అర్జెంటీనా, యూరప్, పశ్చిమాసియాలో కొన్ని టీవీ ఛానెళ్ల వారితో మాట్లాడతానని టామ్ మూర్ ట్వీట్ చేశారు.

ఇంత ఎక్కువ మొత్తంలో విరాళాలు వస్తాయని ఊహించలేదని ఆయన బీబీసీ-2తో అన్నారు. విరాళాలిచ్చిన వారందరికీ ఆయన కృతజ్ఞతలు తెలిపారు.

"నిజంగా చాలా ధన్యవాదాలు. అవసరమైన సమయంలో విరాళాలు ఇవ్వడాన్ని నేను ప్రశంసిస్తున్నాను. మీరంతా దయ గలవారని అనుకుంటున్నా" అని అన్నారు.

టామ్ మూర్‌కు డ్యూక్ ఆఫ్ కేంబ్రిడ్జి కూడా కొంత మొత్తాన్ని విరాళంగా అందించారు. అయితే, అది ఎంత అనే వివరాలు వెల్లడించలేదు.

ఆయన డచెస్ ఆఫ్ కేంబ్రిడ్జ్‌తో కలిసి టామ్ మూర్ కోసం ఒక వీడియో సందేశాన్ని రికార్డు చేసి పంపించారు. 99 సంవత్సరాల వయసులో కూడా యుద్ధ సైనికుడిగా ఆయన ఈ పని చేయడం చాలా అద్భుతంగా ఉందని ప్రిన్స్ విలియం అన్నారు.

"ఆయనకి చాలా విషయాలు తెలుసు. ఆయన సంకల్పంతో చాలా మంది ప్రభావితులవ్వడం చాలా అద్భుతంగా ఉంది. ఆయన వన్ మాన్ ఫండ్ రైజింగ్ మెషిన్. విరాళాల మొత్తం ఎంతో దేవుడొక్కడికే తెలుసు. ఇది ఆయన మంచితనానికి నిదర్శనం" అని ఆ సందేశంలో పేర్కొన్నారు.

ఈ సందేశాన్ని విన్న టామ్ మూర్ హర్షం వ్యక్తం చేశారు. ఈ క్షణాన్ని ఎప్పటికీ మర్చిపోలేనని అన్నారు.

వెస్ట్ యార్క్‌షైర్‌లోని కెగ్లీకి చెందిన టామ్ మూర్ ఒక్కసారిగా దేశవ్యాప్తంగా ప్రముఖుడైపోయారు. టామ్ మూర్ సేవలను గుర్తించి, గౌరవిస్తామని కెగ్లీ టౌన్ కౌన్సిల్ ట్వీట్ చేసింది. క్రీడాకారులు, సెలబ్రిటీలు ఆయనను అభినందిస్తూ సందేశాలు పంపారు.

నేషనల్ హెల్త్ సర్వీస్‌కి టామ్ మూర్ చేసిన సహాయం స్ఫూర్తిదాయకమని ఇంగ్లండ్ ఫుట్ బాల్ టీం కెప్టెన్ హ్యారీ కేన్ ట్వీట్ చేశారు.

కాన్సర్‌కి చికిత్స చేసిన నేషనల్ హెల్త్ సర్వీస్ ఉద్యోగుల కోసం విరాళాలు సేకరించాలని కెప్టెన్ టామ్ మూర్ అనుకున్నారు. వాకర్ సహాయంతో బెడ్ఫర్డ్ షైర్లో ఉన్న ఆయన తోటలో 100 రౌండ్లు నడిచారు. ఆయన ప్రయత్నాన్ని ఎన్‌హెచ్ఎస్ చారిటీస్ ప్రశంసించింది.

కరోనావైరస్ హెల్ప్‌లైన్ నంబర్లు: కేంద్ర ప్రభుత్వం - 01123978046, ఆంధ్రప్రదేశ్, తెలంగాణ - 104

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)