తెలంగాణ ఆవిర్భావ దినోత్సవం: సీఎం రేవంత్ రెడ్డి, బీఆర్ఎస్ అధినేత కేసీఆర్ ఏమన్నారంటే..

తెలంగాణ అస్తిత్వానికి, ఆత్మగౌరవానికి పట్టాభిషేకం జరిగి దశాబ్ద కాలం పూర్తయిందని రాష్ట్ర ముఖ్యమంత్రి రేవంత్ రెడ్డి అన్నారు. తెలంగాణ ప్రజలు బానిసత్వాన్ని భరించరని వ్యాఖ్యానించారు.

సికింద్రాబాద్‌లోని పరేడ్ గ్రౌండ్‌లో నిర్వహించిన తెలంగాణ ఆవిర్భావ దినోత్సవం, దశాబ్ది వేడుకల్లో ఆయన పాల్గొన్నారు. ఈ సందర్భంగా రాష్ట్ర సాధన కోసం ప్రాణాలు అర్పించిన అమరులకు నివాళి అర్పించారు.

తెలంగాణ ప్రజల ఆరు దశాబ్దాల కలను నిజం చేసిన నాటి ప్రధాన మంత్రి మన్మోహన్ సింగ్, యూపీఏ ఛైర్ పర్సన్ సోనియాగాంధీలకు ఆయన కృతజ్ఞతలు తెలిపారు.

అంతకుముందు జాతీయ పతాకాన్ని ఆవిస్కరించి పోలీసుల నుంచి గౌరవ వందనం స్వీకరించారు. తర్వాత రాష్ట్ర గీతం ‘జయ జయమే తెలంగాణ’ను రేవంత్ రెడ్డి విడుదల చేసి ప్రజలను ఉద్దేశించి ప్రసంగించారు.

రేవంత్ రెడ్డి ప్రసంగంలోని ముఖ్యాంశాలు ఆయన మాటల్లోనే...

తెలంగాణ భవన్‌లో రాష్ట్ర ఆవిర్భావ వేడుకలు, కేసీఆర్ ఏమన్నారంటే..

రాష్ట్ర ఆకాంక్షను పూర్తిచేయడంలో వెంట నిలిచిన తెలంగాణ ప్రజలకు రాష్ట్ర ఆవిర్భావ దినోత్సవ శుభాకాంక్షలు అని భారత రాష్ట్ర సమితి (బీఆర్‌ఎస్) అధినేత కల్వకుంట్ల చంద్రశేఖర్ రావు అన్నారు. ఇదొక గొప్ప ఉద్విగ్నభరిత క్షణమని పేర్కొన్నారు.

బీఆర్‌ఎస్ ఆధ్వర్యలో తెలంగాణ భవన్‌లో రాష్ట్ర ఆవిర్భావ దశాబ్ది వేడుకలు జరిగాయి.

బీఆర్‌ఎస్ వర్కింగ్ ప్రెసిడెంట్ కేటీఆర్, జాతీయ జెండాను ఆవిష్కరించారు.

ఉద్యమంలో ఎన్నో ఆటంకాలు, అవమానాలు ఎదురయ్యాయని, అన్నింటినీ ఎదుర్కొని రాష్ట్రాన్ని సాధించామన్నారు. ఉద్యమం సమయంలో తన అనుభవాలను ఆయన పంచుకున్నారు. తొమ్మిదేళ్ల తమ పాలనలో రాష్ట్రాన్ని ఎంతో అభివృద్ధి చేశామన్నారు.

ఎన్నికల ముందు కాంగ్రెస్ పార్టీ ఇచ్చిన హామీలను అధికారంలోకి వచ్చాక అమలు చేయట్లేదని కేసీఆర్ విమర్శించారు. ఎన్నికల ఫలితాలు ఎలా వచ్చినా తాత్కాలికమేనని, ప్రజా సమస్యలపై ఇక నుంచి నూతన పంథాలో పనిచేస్తామన్నారు.

తెలంగాణ ప్రజలే పోరాటమే నాకు ప్రేరణ: సోనియా గాంధీ

తెలంగాణ ఆవిర్భావ దినోత్సవం సందర్భంగా కాంగ్రెస్ అగ్ర నాయకురాలు సోనియా గాంధీ తెలంగాణ ప్రజలకు శుభాకాంక్షలు తెలుపుతూ ఒక వీడియో విడుదల చేశారు.

రాష్ట్ర సాధన కోసం ప్రాణ త్యాగం చేసిన అమరులను ఈ సందర్భంగా ఆమె గుర్తు చేసుకున్నారు.

‘‘తెలంగాణ ప్రజల ప్రత్యేక రాష్ట్ర సాధనను కాంగ్రెస్ పార్టీ పూర్తి చేస్తుందని 2004లో కరీంనగర్ వేదికగా తెలంగాణ ప్రజలకు నేను మాట ఇచ్చాను. ఆ తర్వాత మా సొంత పార్టీలోనూ అసమ్మతి ఎదురైంది. కొందరు పార్టీని వీడారు.

కానీ మీ పోరాటం, సంకల్పం ప్రత్యేక రాష్ట్ర ఏర్పాటుకు కావాల్సిన ధైర్యాన్ని, సాహసాన్ని, ప్రేరణను నాకు అందించాయి. గత పదేళ్లుగా తెలంగాణ ప్రజల నన్ను గౌరవిస్తున్నారు.

తెలంగాణలో రేవంత్ రెడ్డి నేతృత్వంలోని కాంగ్రెస్ పార్టీ మీ ఆకాంక్షలకు పూర్తి చేయడంలో వెనుకడుగు వేయదు’’ అని సోనియా పేర్కొన్నారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)