సిరియా భూకంపం: శిథిలాల్లో జన్మించిన శిశువును ఎవరు దత్తత తీసుకున్నారంటే...

సిరియాలో భూకంపం శిథిలాల్లో జన్మించిన శిశువును ఆమె పిన్ని, బాబాయిలు దత్తత తీసుకున్నారు.

ఫిబ్రవరి 6న సంభవించిన భారీ భూకంపంలో ఇద్రిస్ ప్రావిన్స్‌లోని జిందేరిస్ పట్టణంలో కుప్పకూలిన భవనాల్లో ఈ చిన్నారి కుటుంబం కూడా కన్నుమూసింది.

ఆ శిథిలాల్లో చనిపోయిన తల్లికి బొడ్డు పేగుతో అలాగే అనుసంధానమై ఉన్న ఆడపిల్లను సహాయ సిబ్బంది రక్షించారు.

భూకంపం వచ్చిన వెంటనే ఆమె తల్లికి పురిటినొప్పులు వచ్చాయని, ఆమె శిథిలాల కిందే బిడ్డకు జన్మనిచ్చి కన్నుమూశారని ఒక బంధువు చెప్పారు.

భూకంపంలో ఈ శిశువు తల్లిదండ్రులతో పాటు.. నలుగురు తోడబుట్టువులు, ఒక పిన్ని అందరూ చనిపోయారు.

అయితే ఈ శిశువు తల్లి సోదరి హాలా కుటుంబం ఈ భూకంపం నుంచి బయటపడింది. ఆమెకు డీఎన్ఏ పరీక్షలు నిర్వహించి, ఈ శిశువుతో రక్తసంబంధం ఉందని నిర్ధారించుకున్న అధికారులు శిశువును వారికి అప్పగించారు.

దీంతో ఆ శిశువు తన పిన్ని, బాబాయిల దగ్గరికి చేరినట్లయింది. ఈ శిశువుకు చనిపోయిన ఆమె తల్లి పేరైన ఆఫ్రా అని పేరు పెట్టారు.

శిథిలాల నుంచి బయటకు తీసినపుడు ఈ శిశువుకు అధికారులు అయా అని పేరు పెట్టారు. ఆ అరబిక్ పేరుకు అర్థం ‘అద్భుతం’ అని.

ఈ శిశువును వెలికితీసే సమయానికి శిథిలాల కింద 10 గంటల కన్నా ఎక్కువ సేపు ఉందని.. ఆమె ఒంటి నిండా గాట్లు, దోక్కుపోయిన గాయాలతో పరిస్థితి తీవ్రంగా ఉందని వైద్యులు చెప్పారు.

శిథిలాల నుంచి ఈ శిశువును వెలికితీస్తున్న వీడియో వైరల్‌గా మారింది. ప్రపంచం నలుమూలల నుంచీ వేలాది మంది ఈ శిశువును తాము దత్తత తీసుకుంటామంటూ ముందుకు వచ్చారు.

ఈ పాపను శిథిలాల నుంచి వెలికి తీస్తున్నపుడు ఆమె బాబాయ్ ఖలీల్ అల్-సవాది కూడా అక్కడే ఉన్నారు.

ఆమెను దత్తత తీసుకుంటామని ప్రపంచం నలుమూలల నుంచీ వినతులు వెల్లువెత్తటంతో.. ఆ పాపను ఆస్పత్రి నుంచి కిడ్నాప్ చేసి ఎత్తుకెళ్లిపోతారేమనని తను ఆందోళన చెందినట్లు ఆయన వార్తా సంస్థలతో చెప్పారు.

శిథిలాల్లో హలా, ఖలీల్‌ల నివాసం కూడా ధ్వంసమైంది. ప్రస్తుతం వారు తమ బంధువుల వద్ద ఉంటున్నారు.

ఈ శిశువును బంధువులమైన తమకే అప్పగించాలని వారు కోరారు. భూకంపంలో తమ నివాసం దెబ్బతిన్నా, తమ పరిస్థితి ఎలా ఉన్నా.. ఆ శిశువు తన బంధువుల దగ్గర ఉండటమే మంచిదన్నారు.

దీంతో ఈ బాలికను ఆస్పత్రి నుంచి డిశ్చార్జ్ చేసి, ఆమె రక్తసంబంధీకులకు అప్పగించారు. ప్రస్తుతం బాలిక పూర్తి ఆరోగ్యంగా ఉన్నట్లు వైద్యులు తెలిపారు.

ఈ చిన్నారి.. ఆమె తల్లిదండ్రులు, ఆమె కుటుంబానికి జ్ఞాపకంగా తమకు, తమ ఊరి వారందరికీ మిగిలిపోతుందని.. ఆమెను అపురూపంగా చూసుకుంటామని పిన్ని, బాబాయ్ చెప్తున్నారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)