ਪਾਕਿਸਤਾਨ ਸਰਹੱਦ ਪਾਰ ਕਰਨ 'ਤੇ ਸਜ਼ਾ 2 ਮਹੀਨੇ ਪਰ ਵਾਪਸ ਆਉਣ ਨੂੰ ਲੱਗੇ 32 ਸਾਲ
ਤਸਵੀਰ ਸਰੋਤ, Ravinder Singh Robin
- ਲੇਖਕ, ਰਵਿੰਦਰ ਸਿੰਘ ਰੌਬਿਨ
- ਰੋਲ, ਬੀਬੀਸੀ ਪੰਜਾਬੀ ਲਈ
ਅਣਜਾਣੇ 'ਚ ਸਰਹੱਦ ਟੱਪਣ 'ਤੇ 2 ਮਹੀਨਿਆਂ ਦੀ ਸਜ਼ਾ ਹੋਣ ਦੇ ਬਾਵਜੂਦ ਗਜਾਨੰਦ ਸ਼ਰਮਾ ਨੂੰ ਭਾਰਤ ਵਾਪਸ ਆਉਣ 'ਚ 3 ਦਹਾਕੇ ਲੱਗ ਗਏ।
ਰਾਜਸਥਾਨ ਨਾਲ ਲਗਦੀ ਪਾਕਿਸਤਾਨ ਸਰਹੱਦ ਅੰਦਰ ਗ਼ਲਤੀ ਨਾਲ ਦਾਖ਼ਲ ਹੋਏ ਗਜਾਨੰਦ ਸ਼ਰਮਾ ਵਾਹਗਾ ਸਰਹੱਦ ਰਾਹੀਂ 32 ਸਾਲਾਂ ਬਾਅਦ ਆਪਣੇ ਮੁਲਕ ਪਰਤੇ ਹਨ।
ਉਨ੍ਹਾਂ ਨੂੰ ਪਾਕਿਸਤਾਨ ਵਿੱਚ ਗ੍ਰਿਫ਼ਤਾਰ ਕਰਕੇ ਲਾਹੌਰ ਦੀ ਕੋਟ ਲਖਪਤ ਜੇਲ੍ਹ ਵਿੱਚ ਰੱਖਿਆ ਗਿਆ ਸੀ।
ਸਦਭਾਵਨਾ ਦੇ ਤਹਿਤ ਸੁਤੰਤਰਤਾ ਦਿਵਸ ਤੋਂ ਇੱਕ ਦਿਨ ਪਹਿਲਾਂ ਪਾਕਿਸਤਾਨ ਵੱਲੋਂ ਰਿਹਾਅ ਕੀਤੇ ਗਏ 29 ਹੋਰ ਕੈਦੀਆਂ ਵਿੱਚੋਂ ਗਜਾਨੰਦ ਇੱਕ ਦਾ ਹੱਥ ਫੜੀ ਆਏ।
ਪਾਕਿਸਤਾਨੀ ਸਲਵਾਰ-ਕੁਰਤਾ ਪਹਿਨੇ ਗਜਾਨੰਦ ਥੋੜ੍ਹਾ ਜਿਹੇ ਪ੍ਰੇਸ਼ਾਨ ਲੱਗ ਰਹੇ ਸਨ।
ਇਹ ਵੀ ਪੜ੍ਹੋ:
ਤਸਵੀਰ ਸਰੋਤ, Ravinder Singh Robin
ਬਾਅਦ ਵਿੱਚ ਇੱਕ ਬੀਐਸਐਫ ਦੇ ਜਵਾਨ ਨੇ ਉਨ੍ਹਾਂ ਦਾ ਹੱਥ ਫੜ ਕੇ ਤੁਰਨ ਵਿੱਚ ਮਦਦ ਕੀਤੀ ਅਤੇ ਉਹ ਮੁਸ਼ਕਿਲ ਨਾਲ ਬੋਲ ਰਹੇ ਸਨ।
ਉਨ੍ਹਾਂ ਨੂੰ ਛੇਤੀ ਹੀ ਮੈਡੀਕਲ ਮਦਦ ਦਿੱਤੀ ਜਾਵੇਗੀ।
ਪਰਿਵਾਰ ਦਾ ਇੰਤਜ਼ਾਰ
ਗਜਾਨੰਦ ਬਾਰੇ ਇਸ ਸਾਲ ਪਰਿਵਾਰ ਨੂੰ ਪਤਾ ਲੱਗਾ ਅਤੇ ਉਨ੍ਹਾਂ ਨੇ ਇਹ ਮੁੱਦਾ ਸਥਾਨਕ ਸਿਆਸਤਦਾਨ ਅਤੇ ਵਿਦੇਸ਼ ਮੰਤਰਾਲੇ ਕੋਲ ਚੁੱਕਿਆ।
ਪਾਕਿਸਤਾਨ ਨੇ ਵੀ ਕੋਟ ਲਖਪਤ ਜੇਲ੍ਹ ਵਿੱਚ ਉਨ੍ਹਾਂ ਦੀ ਮੌਜੂਦਗੀ ਨੂੰ ਸਵੀਕਾਰਿਆ ਅਤੇ ਉਨ੍ਹਾਂ ਨੂੰ ਰਿਹਾਅ ਕਰਨ ਦਾ ਫ਼ੈਸਲਾ ਲਿਆ।
ਗਜਾਨੰਦ ਦੇ ਪੁੱਤਰ ਮੁਕੇਸ਼ ਨੇ ਫੋਨ 'ਤੇ ਦੱਸਿਆ ਕਿ ਗਜਾਨੰਦ ਦੀ ਪਤਨੀ ਅਤੇ ਹੋਰ ਪਰਿਵਾਰਕ ਮੈਂਬਰ ਉਨ੍ਹਾਂ ਦਾ ਇੰਤਜ਼ਾਰ ਕਰ ਰਹੇ ਹਨ।
ਤਸਵੀਰ ਸਰੋਤ, Ravinder Singh Robin
ਉਨ੍ਹਾਂ ਨੇ ਪਛਤਾਵਾ ਜ਼ਾਹਿਰ ਕੀਤਾ ਕਿ ਜੇਕਰ ਪਹਿਲਾਂ ਕਾਉਂਸਲਰ ਦੀ ਪਹੁੰਚ ਪ੍ਰਦਾਨ ਕੀਤੀ ਹੁੰਦੀ ਤਾਂ ਉਹ 30 ਸਾਲ ਪਹਿਲਾਂ ਜੇਲ੍ਹ 'ਤੋਂ ਰਿਹਾਅ ਹੋ ਜਾਂਦੇ।
ਹਾਲਾਂਕਿ ਦੁਵੱਲੇ ਸਮਝੌਤੇ ਦੇ ਤਹਿਤ ਭਾਰਤ ਅਤੇ ਪਾਕਿਸਤਾਨ ਦੋਵੇਂ ਦੇਸ ਸਮੇਂ-ਸਮੇਂ 'ਤੇ ਆਪਣੀ ਸਜ਼ਾ ਭੁਗਤ ਚੁੱਕੇ ਕੈਦੀਆਂ ਅਤੇ ਮਛੇਰਿਆਂ ਨੂੰ ਰਿਹਾਅ ਕੀਤਾ ਜਾਂਦਾ ਹੈ ਪਰ ਗਜਾਨੰਦ ਵਰਗੇ ਕੇਸ ਵਿੱਚ ਜਿਨ੍ਹਾਂ ਦੀ ਮਾਨਸਿਕ ਹਾਲਤ ਠੀਕ ਨਹੀਂ ਜਾਂ ਜੋ ਬੋਲ ਨਹੀਂ ਸਕਦੇ ਤਾਂ ਉਨ੍ਹਾਂ ਨੂੰ ਵਾਪਸ ਆਉਣ ਲਈ ਲੰਬਾ ਸਮਾਂ ਇੰਤਜ਼ਾਰ ਕਰਨਾ ਪੈਂਦਾ ਹੈ।
