ભારતની સૌથી ઝડપથી વિકસતી જતી પાંચ નોકરીઓ જે આપે છે લાખોની કમાણીની તક

ગુજરાત સહિત સમગ્ર ભારતમાં યુવાનો માટે નવી નોકરીની તકોની સ્થિતિ એક પડકાર બનીને સામે આવી છે.

પરંપરાગત કોર્સ કે કૌશલ્ય હાંસલ કરીને દર વર્ષે ઘણા યુવાનો માટે પૂરતું શિક્ષણ મેળવ્યા બાદેય નોકરીથી વંચિત રહી જવાની સ્થિતિ સર્જાય છે.

બેરોજગારીની સાથોસાથ શિક્ષિત બેરોજગારીની સમસ્યા પણ હવે ધ્યાન ખેંચવા લાગી છે.

સરકારી ભરતીઓમાં અમુક પદ માટે લાખો લોકોની અરજી આ સમસ્યાનો એક અંદાજ રજૂ કરે છે.

તેથી ઘણા નિષ્ણાતો યુવાનોને પરંપરાગત વ્યવસાયોને સ્થાને નવી તકોમાં હાથ અજમાવવાનો અને કૌશલ્ય મેળવવાની સલાહ આપતા જોવા મળે છે.

પરંપરાગત નોકરીઓની સામેની બાજુએ એવી પણ કેટલીક તકો છે, જે નોકરીવાંછુઓ માટે સારા પગાર સાથે ઉજ્જવળ ભવિષ્યના નિર્માણની સ્થિતિ ઘડી આપે છે.

ભારત સહિત સમગ્ર વિશ્વમાં એવી કેટલીક નોકરીઓ છે જે હાલમાં સૌથી ઝડપથી વૃદ્ધિ પામતી જઈ રહી છે અને આકર્ષક પગારની તક રજૂ કરે છે.

એક ઝડપથી વિકસતા જતા અર્થતંત્ર તરીકે ભારતમાં એવાં ઘણાં નવાં સૅક્ટરો છે, જે કૌશલ્યવાન લોકો માટે સારી એવી તકો સર્જી રહ્યાં છે.

આ સૅક્ટરો યુવાનો માટે વૃદ્ધિની તકો આપવા સાથે આર્થિક સ્વાવલંબનનાં દ્વાર ખોલી આપવાની શક્યતા નકારી શકાય એમ નથી.

ડેટા સાયન્સ અને ઍનાલિટિક્સ

ફોર્બ્સ ડોટ કૉમના એક અહેવાલ અનુસાર ડેટા સાયન્સ અને ઍનાલિટિક્સની જૉબનું વર્ષ 2021-2031 સુધીનો પ્રોજેક્ટેડ ગ્રોથ રેટ 29 ટકા છે.

આ સિવાય ડેટા સાયન્સ અને ઍનાલિટિક્સક્ષેત્રે નોકરી કરનારને સરેરાશ વાર્ષિક આઠથી 12 લાખ રૂપિયાનો પગાર મળે છે.

અહેવાલ પ્રમાણે ડેટા સાયન્સ અને ઍનાલિટિક્સનું ક્ષેત્ર ઇન્ડસ્ટ્રીમાં ગેમ-ચૅન્જર તરીકે સામે આવ્યું છે. આ ક્ષેત્રમાં કામ કરતા પ્રૉફેશનલ્સ કંપનીઓ ડેટાના આધારે મહત્ત્વપૂર્ણ નિર્ણય લેવામાં મદદરૂપ સાબિત થાય છે.

કૌશલ્ય ધરાવતા ડેટા સાયન્ટિસ્ટ અને ઍનાલિસ્ટની ખૂબ ડિમાન્ડ છે.

તેની મુખ્ય જવાબદારીઓમાં ડેટાસેટનું વિશ્લેષણ, અનુમાન આપતાં મૉડલનો વિકાસ અને બિઝનેસના પડકારોના ઉકેલ માટે જટિલ માહિતીને વ્યાખ્યાયિત કરવાનું સામેલ છે.

ડિજિટલ ક્ષેત્રમાં આવી રહેલી ક્રાંતિને કારણે આવનારાં વર્ષોમાં આ ક્ષેત્રમાં કૌશલ્ય ધરાવતા લોકોની ભારે માગ હોવાની શક્યતા છે.

આર્ટિફિશિયલ ઇન્ટેલિજન્સ અને મશીન લર્નિંગ

આ ક્ષેત્રનો વર્ષ 2021થી 2031નો વૃદ્ધિદર 31 ટકા હોવાનો અંદાજ છે.

આ ક્ષેત્રમાં નોકરી કરનારનો સરેરાશ પગાર વાર્ષિક દસથી 15 લાખ રૂપિયા છે.

આજકાલ લગભગ બધાં ક્ષેત્રોમાં આર્ટિફિશિયલ ઇન્ટેલિજન્સ (એઆઇ) અને મશીન લર્નિંગ (એમએલ)ને સામેલ કરાઈ રહ્યું છે. જેના કારણે આ ક્ષેત્રના નિષ્ણાતોની માગમાં સતત વધારો જોવા મળી રહ્યો છે.

આ ક્ષેત્રના જાણકારોની મુખ્ય જવાબદારીમાં આલ્ગોરિધમનો વિકાસ, ચૅટબોટની ડિઝાઇન, ઇમેજ અને સ્પીચ રેકગ્નિશન સિસ્ટમનો વિકાસ, સ્વચાલિત પ્રક્રિયાઓનો વિકાસ, ડ્રાઇવિંગ ઇનોવેશન અને વિવિધ ક્ષેત્રોમાં કાર્યક્ષમતા વધારવાની દિશામાં સંશોધન અને ડેવલપ કરવાનું કામ સામેલ હોય છે.

બ્લોકચેઇન ડેવલપર

ઉપરાંત બ્લોકચેઇન ડેવલપર પણ એક એવું ક્ષેત્ર છે જે યુવાનો માટે નવી અને ઉજ્જવળ ભવિષ્ય સુનિશ્ચિત કરતી તકો આપવાની ક્ષમતા ધરાવે છે.

ઇકૉનૉમિક ટાઇમ્સના એક અહેવાલ અનુસાર ભારતના શ્રમબજારમાં વર્ષ 2023માં બ્લોકચેઇન ડેવલપરની ભારે માગ છે.

તેથી એવું કહી શકાય કે હાલ ભારતમાં ઝડપથી વિકસી રહેલાં ક્ષેત્રો પૈકી તે એક છે.

બ્લોકચેઇન ડેવલપરને સામાન્ય ડેવલપર કરતાં 50થી 100 ટકા વધુ વળતર મળી શકે છે.

આવનારાં દસ વર્ષોમાં આધુનિક ક્રિપ્ટોકરન્સી અને બૅન્કિંગ ઍપ્લિકેશનમાં ઉપયોગી આ કૌશલ્યમાં રોજગારની ભારે તકો સર્જાશે.

રિન્યૂએબલ ઍનર્જી

રિન્યૂએબલ ઍનર્જી ક્ષેત્રનો વૃદ્ધિદર વર્ષ 2021થી 2031ના ગાળમાં 22 ટકા રહેવાનો અંદાજ છે.

આ ક્ષેત્રમાં કારકિર્દી ઘડનાર લોકોને છથી દસ લાખ રૂપિયાનો વાર્ષિક પગાર મળે છે.

હાલના સમયમાં ટકાઉ વિકાસ અને પર્યાવરણીય જાળવણીના વિષય પર ભાર અપાવાના વલણને કારણે આ ક્ષેત્રમાં રોજગારની ઘણી નવી તકો સર્જાઈ રહી છે.

સૌર, પવન અને હાઇડ્ર્રોઇલેક્ટ્રિક ઊર્જા ઉત્પાદનક્ષેત્રે સારો એવો વૃદ્ધિદર જોવા મળી રહ્યો છે.

આ ક્ષેત્રમાં કામ કરતા લોકોએ ડિઝાઇનિંગ, ઇમ્પ્લિમેન્ટેશ અને પુન:પ્રાપ્ય ઊર્જા સિસ્ટમની જાળવણી કરવાની જવાબદારીઓ સંભાળવાની હોય છે.

ડિજિટલ માર્કેટિંગ

વર્ષ 2021થી 2031 સુધીના ગાળામાં આ ક્ષેત્રના વૃદ્ધિદરનો અંદાજ 27 ટકા છે.

ઉપરાંત ક્ષેત્રમાં કામ કરનાર લોકોને સરેરાશ ચારથી આઠ લાખ રૂપિયાનો વાર્ષિક પગાર મળી શકે છે.

આજના ડિજિટલ યુગમાં તમામ વ્યવસાયો અને બિઝનેસ ડિજિટલ માર્કેટિંગ વ્યૂહરચના આધારે લોકો સુધી પોતાની પહોંચ વધારી રહ્યાં છે.

ડિજિટલ માર્કેટિંગમાં કામ કરતા લોકો ઓનલાઇન કૅમ્પેન બનાવી તેને લાગુ કરવાનું, સોશિયલ મીડિયા હાજરીની જાળવણી, સર્ચ એન્જિન રૅન્કિંગનું ઓપ્ટિમાઇઝેશન, ગ્રાહકના ડેટાના વિશ્વલેષણથી કસ્ટમર ઍન્ગેજમૅન્ટ વધારવા જેવી જવાબદારીઓ ભજવે છે.

તમે બીબીસી ગુજરાતીને સોશિયલ મીડિયા પર અહીં ફૉલો કરી શકો છો

Facebook પર સમાચાર વાંચવા અહીં ક્લિક કરો.

Instagram પર બીબીસી ગુજરાતીને અહીં ફૉલો કરો.

YouTube પર બીબીસી ગુજરાતીના વીડિયો જોવા માટે અહીં ક્લિક કરો.

Twitter પર બીબીસી ગુજરાતીની ફૉલો કરવા અહીં ક્લિક કરો.