EndSARS: Mẹ́ta lára àwọn òkú náà ni wọ́n rí he lágbègbè Lekki Toll Gate

Igbimọ oluwadii iwa ipa awọn ọlọpaa si awọn araaalu ni ipinlẹ Eko ti tẹwọ gba esi ayẹwọ oku eeyan mọkandilọgọrun run ti wọn ri he kaakiri ilu Eko lasiko iwọde EndSARS.

Awọn oku naa ti wọn ti wa ni ile igbokupamọsi ni wọn ri he kaakiri ipinlẹ Eko laarin ogunjọ, oṣu Kẹwaa ọdun 2020, si ọjọ kẹtadinlọgbọn, oṣu Kẹwaa, ọdun kan naa.

Onimọ sayensi to n ṣayẹwo ara eeyan, Ọjọgbọn John Obafunwa lo fi esi naa le adari igbimọ ọhun, Adajọ Doris Okwobi lọwọ.

Igbimọ naa gba awọn ẹri ọhun ti wọn ko sinu apo meji wọle lẹyin ti agbẹjọro awọn olufẹhonuhan EndSARS, Adeyinka Olumide-Fusika daba pe ki igbimọ ọhun tẹwọ gba awọn eri naa.

Awọn agbejọro atawọn ọmọ igbimọ naa si faramọ igbeṣe naa pẹlu.

Ṣaaju ni igbimọ naa ti kọkọ fiwe pe Ọjọgbọn Obafunwa lati wa ṣeranwọ fun un lori iwadii rẹ nipa iye ẹmi to sọnu lasiko iwọde EndSARS, paapaa ni iloro Lekki Toll Gate.

Laisko to kọkọ yọju siwaju igbimọ ọhun lọjọ karun un, oṣu Kẹfa ọdun yii ni igbimọ naa ni ko ko awọn eri naa wa siwaju rẹ.

Eyii to mu ki Ọjọgbọn nipa imọ eto ilera, to tun jẹ olukọ to dantọ nile ẹkọṣẹ iṣẹgun ti fasiti ijọba ipinlẹ Eko, LASU, sọ niwaju igbimọ naa pe lootọ ni awọn ti ṣiṣẹ lara awọn oku mọkandinlaadọrun un ọhun.

Gẹgẹ bi ohun ti Ọjọgbọn naa sọ, mẹta lara awọn oku naa ni wọn ri he lagbegbe lekki Toll Gate ti awọn mẹtẹta si jẹ ọkunrin, ṣugbọn awọn ko mọ irufẹ ẹni ti awọn oloogbe naa jẹ.

Ko din ni eeyan mẹrinla to ti fẹsun kan ileeṣẹ ọmọ ogun Naijiria atawọn ọlọpaa pe wọn yinbọn pa ọpọ awọn oluwọde EndSARS lasiko iwọde EndSARS naa.

Wọn fẹsun kan awọn agbofinro ọhun pe ọkẹ aimoye awọn miran lo farapa lasiko ti wọn ṣina ibọn bolẹ fun wọn lasiko ti wọn n ṣewọde lodi si iwa ipa awọn ọlọpaa si araalu.

Bo tilẹ jẹ ileeṣẹ ọmọ ogun sẹ pe awọn ko pa ẹnikẹni lọjọ naa lọhun, ileeṣẹ naa ti kọ lati maa yọju siwaju igbimọ naa bayii, ṣugbọn igbimọ ọhun ṣi n ba iṣẹ rẹ lọ.