Россия ва Европа: Норвегия 15 рус дипломатини нега ҳайдаб чиқарди? Dunyo Yangiliklar

Норвегия 15 россиялик расмийни жосусликда айблаб мамлакатдан чиқариб юборди.

Ташқи ишлар вазири Анникен Хуитфелдт Норвегия Москвага ўз элчихонасидан "махфий жосуслик фаолияти"ни олиб боришига рухсат бермаслигини айтди.

Россия Европага газ етказувчи қувурини ўзи портлатяптими? Норд Стрим 1 ва 2да янги ёриқлар

Қандай қилиб жосуслар Украина уруши олдини олишга ҳаракат қилдилар?

Ғарб ва Ўзбекистон қамоқхоналари: Норвегия жиноятчиларни қандай қилиб яхши одамларга айлантирмоқда?

Россия ўтган йили Украинага бостириб кирганидан бери бир нечта давлатлардан россиялик ҳукумат вакиллари чиқариб юборилганлар.

Россиянинг Тасс агентлигига кўра, Кремль ҳозирда Норвегия қарорига қандай "маъқул" жавоб беришни ўйлаб кўряпти.

Расмий Осло баёнотида айтилишича, Норвегия ҳукумати 15 шахсни "персона нон грата" дея эълон қилишдан аввал маълум муддат кузатиб келган.

Уларнинг айнан қандай яширин фаолият олиб борганлари тафсилоти очиқланмади.

Норвегияга кўра, Россия унинг "хавфсизлигига энг йирик таҳдид" бўлиб қоляпти ва бу таҳдид Европада ёмонлашаётган хавфсизлик манзарасида янада ошяпти.

Норвегия Россия билан Арктикада 197 километрлик чегарага эга. Уларнинг ўзаро алоқалари Украина можароси бошланганидан бери ёмонлашган.

Европа Иттифоқи аъзоси бўлмаса-да, Норвегия Европанинг Россияга қарши санкцияларини қўллаб-қувватлаган.

2022 йил апрелида Осло уч россияликни жосуслик зобити бўлишда айблаб мамлакатдан чиқариб юборганди. Россия ўшанда бунга жавобан уч норвегиялик дипломатни чиқариб юборган.

2022 йил октябрида Норвегия полицияси Москва фойдасига жосуслик қилишда айблаб университет ўқитувчисини ҳибсга олган.

Норвегия матбуотида Россия фуқароси Михаил Валерьевич Микушин дея хабар қилинган ўқитувчи ўзини бразилиялик дея таништириб келаётган бўлган. У барча айбловларни рад этади.

Охирги ҳайдашларни изоҳлар экан, Норвегия ташқи ишлар вазири ўз ҳукумати Москва билан нормал дипломатик алоқаларни юритишни исташини айтди.

"Аммо, биз дипломатик миссиялар яширин жосуслик фаолиятларини олиб боришлари учун суиистемол қилинишига йўл қўя олмаймиз", - деди Хуитфелдт хоним.

Охирги ойларда Европанинг бир нечта давлатлари, жумладан Ирландия, Голландия, Австрия, Чехия ва Бельгиядан жосусликда айбланган Россия дипломатлари чиқариб юборилган.

Telegram каналимиз: https://t.me/bbcuzbek

BBC.COM/UZBEK билан Telegram орқали +44 7858860002 номери билан боғланинг.