Украина. Янгиликлар: Путин ўз шартини айтди – энди уруш тўхтайдими? Putin Rossiya Ukraina Yangiliklar

Путин тинчлик учун ўз шартини айтди. Россия президенти алал-оқибат ён бермоқчими?

Алоқадор мавзулар:

Шартлар

Президент Жо Байден Владимир Путин билан учрашишга тайёрлигини билдиргач, Россия томони таъкидлашича, Ғарбнинг Украинадан тортиб олинган "янги ҳудудларни" тан олишдан бош тортиши тинчлик ўрнатилишини қийинлаштиради.

Кремль музокараларга тайёрлигини, аммо бу музокаралар Ғарбнинг Украинадан чиқиб кетиш талаби асосида бўлмаслигини айтмоқда.

Россия сентябрь ойида, гарчи тўла назоратига олмаган бўлса ҳам, Украинанинг тўрт вилоятини ноқонуний аннексия қилди.

Босқин бошланганидан тўққиз ой ўтиб, Россия босиб олинган ҳудуднинг ярмидан кўпроғини йўқотди.

Пайшанба куни Президент Байден мухбирларга агар Россия президенти "урушни тўхтатишга истаги бўлса", у билан кўришишга тайёрлигини айтди.

Устма-уст мулоқотлар

Оқ уйда Байден ва Франция президенти Эммануэль Макрон ёнма-ён туриб, украиналикларни муросага боришга ҳеч қачон ундамасликлари ва "бу улар учун қабул қилиб бўлмас иш" эканлигини таъкидлашди.

Ойлаб давом этган дипломатик уринишларга қарамай, музокаралар учун иштиёқ асари деярли сезилмаяпти. Россия ҳарбийлари фуқаролик иншоотларига ҳужумларни кучайтириш манзарасида Украина жанубида чекинишга мажбур бўлишди.

Жума куни Германия канцлери Олаф Шолц сентябрдан бери илк марта Президент Путин билан гаплашган.

Бир соатлик мулоқотда, Берлин расмийлари билдиришича, Германия раҳбари Путинни Россия қўшинларини Украинадан "имкон қадар тез" олиб чиқиб кетиш ва вазиятга дипломатик ечим топишга ундаган.

Кремль томонининг айтишича, бу мулоқот немис томон ташаббуси билан бўлган ва Путин Берлинни Украинадаги воқеалар масаласида ўз муносабатини қайта кўриб чиқишга" чақирган.

Путин "Ғарб давлатларининг, шу жумладан, Германиянинг ҳалокатли линия танлаганликлари"га эътибор қаратган. Киев томон эса музокараларни буткул рад этди, деб қўшимча қилади Кремль.

Кремль сўзчиси Дмитрий Песков аввалроқ мухбирларга Путин "манфаатларимизни таъминлаш учун" музокараларга очиқ деб айтган эди.

Аммо Москва АҚШ қўйган шартларни қабул қилишга тайёр эмас: "Президент Байден нима деган эди? У Путин Украинадан чиқиб кетсагина музокаралар бўлишини айтганди".

Унинг айтишича, бу ҳолат, яъни АҚШнинг Украинадаги "янги ҳудудлар"ни тан олмагани музокаралар учун муштарак асос топишни мураккаблаштиради.

Сентябрь ойи охирида Президент Путин Украинанинг тўрт вилоятини Россияники, деб эълон қилди. Ваҳоланки, ўша вақтда Луганскнинг катта қисми Украина қўшинлари назоратида эди, Донецкда русларнинг илгарилаши тўхтаб қолган, жанубда, Херсон ва Запорожьеда чекинаётган эди.

Жума кунги Шолц Путин мулоқотидан олдин Россия ташқи ишлар вазири Сергей Лавров Ғарб музокаралар учун конкрет ҳеч нарса таклиф қилмаганидан нолиган эди.

"Ўтган икки ҳафта давомида Макрон Россия президенти билан музокара қилмоқчилигини айтиб келяпти", дея вазирдан иқтибос келтирилди ва у дипломатик каналлар орқали ҳеч қандай сигнал берилмаганини қўшимча қилган.

Лавров АҚШнинг собиқ давлат котиби Жон Керрини муаммо еча оладиган, ҳақиқий мулоқот қила оладиган шахс бўлганини айтган.

Италия ташқи ишлар вазири Антонио Таяни жума куни Украинада адолатли тинчлик ўрнатиш вақти келганини, аммо бу Киевнинг таслим бўлиши эмас, балки мустақиллиги орқали бўлишини айтганди. "Кремль аҳолини бомбаламасдан ҳозир аниқ сигнал бериши керак", деди у "La Republica" газетасига.

Туркия ташқи ишлар вазири Мевлут Чавушўғли келаси баҳоргача оташкесин ва сулҳ қандай бўлиши маълум бўлади деди. Аммо уруш майдонидаги аҳвол бу вазифани мураккаблаштиради.

Бу орада, Украинага сафар қилган Кентербери архиепископи Жастин Уэлби Россия Украинада қилаётган ишлари борасида алдашни тўхтатмагунча тинчлик бўлмайди деди.

Россия қўшинлари юзлаб тинч аҳолини ўлдиргани айтилган Бучада гапирар экан, архиепископ "Ёлғонга асосланиб олға юриб бўлмайди. Бу ерда шафқатсизликлар амалга оширилган", деди.

Украинанинг юқори мартабали расмийси Россия ишғоли бошлангандан бери 10 мингдан 13 минггача украин аскари ўлганини айтганди.

На Украина ва на Россия йўқотишлар ҳақида аниқ рақамларни бермоқда. Президент маслаҳатчиси Михайло Подоляк айтган гапларни Украина ҳарбийлари тасдиқламади.

Ўтган ойда АҚШ генерали Марк Миллей 100 минг рус ва 100 минг украин аскари урушда ё ўлган ё жароҳатланган деди.

Подоляк Украинанинг "Канал 24" телеканалига берган интервьюсида Киев "ўлдирилганлар сони ҳақида очиқ гапираётганини" айтди.

Унинг қўшимча қилишича, ҳалок бўлган тинч аҳоли сони "сезиларли" бўлиши мумкин. У, шунингдек, босқиндан кейин 100 000 га яқин рус аскари ҳалок бўлганини айтди.

Чоршанба кунги видеомурожаатда Европа Комиссияси президенти Урсула фон дер Ляйен 100 минг украиналик ҳарбий ҳалок бўлганини айтганди.

Бироқ, кейинроқ Еврокомиссия вакили бу хато бўлганини ва бу рақам ҳалок бўлганлар ва жароҳатланганларга тегишли эканлигини аниқлаштирди.

Фон дер Ляйн, шунингдек, 20,000 украиналик тинч аҳоли ўлими ҳақида гапирди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek