Украина. Янгиликлар: Россияда катта янгилик ёки Путин барибир айтганини қилди Putin Rossiya Ukraina Yangiliklar

Путин Украинада яна кўпчилик кутмаган бир ишга қўл урди. Зеленский Украина Хавфсизлик ва мудофаа кенгашининг фавқулодда йиғинини чақирган. АҚШ кескин баёнот билан чиқди. Москвада шу соатларда нималар бўлаяпти?

Алоқадор мавзулар:

Янги келишувлар

Президент Путин ҳали тўлиқ босиб олмаган эсалар-да, Украинанинг тўрт минтақасини ўзлариники, аҳолисини Россия фуқаролари, деб эълон қилди.

"Донецк, Луганск, Херсон ва Запорожье яшовчилари бизнинг фуқароларимизга айланишади. Бир умрга", - дея баён қилди Россия президенти.

Унинг бу сўзлари шу соатларда Кремлда бўлиб ўтаётган махсус маросимдаги катта чиқиши чоғида янгради.

Бугунги тадбирда Украинанинг босиб олинган ерларини Россияга қўшиб олиш бўйича келишувлар расман имзоланди.

Путин аннексия сўзсиз ва доимий эканини баён қилди.

Ўзбеклар-чи, улар Путиннинг зиддиятли аннексияси борасида нима деб ўйлашади?

Чиқиши аввалида Путин Запорожье ва Херсоннинг Украинадан мустақиллигини расман тан олувчи фармонларга ҳам имзо чекди.

Бу уларнинг аннексияси учун лозим бўлган расмиятчилик ҳисобланади.

Худди шу манзарада Запорожьеда қонли ҳужум содир этилганига оид хабарлар ҳам олинмоқда.

Маълум бўлишича, Россия кучлари инсонпарварлик ёрдами юкланган карвонга ракетадан зарба берган.

Ҳужум натижасида 20 дан ортиқ киши қурбон бўлгани, яна ўнлабининг яралангани айтилаётир.

Путин Қрим ярим оролидан кейин Донецк, Луганск, Херсон ва Запорожьени Россияга қўшиб олмоқчи.

Сўз бораётган тўрт ҳудуднинг ҳеч бири жорий пайтда Россиянинг тўлиқ назорати остида эмас.

Россия парламенти ҳар икки палатасининг ҳам бу борада келаси ҳафта овоз бериши кутилаётир.

Буни Давлат думасидан ташқари, ҳали яна Россиянинг Конституциявий суди ва Федерал кенгаши ҳам маъқуллаши керак бўлади.

Шундан сўнг конституцияга киритилаётган тегишли ўзгартиришларни Путиннинг ўзи тасдиқлайди.

Хабарларга кўра, бутун жараён 4 октябргача якунланади.

Аммо бу Россиянинг расмиятчиликлари, Путиннинг аннексияси халқаро ҳамжамият томонидан тан олинмаган.

Матбуот котибига кўра, бугунги чиқиши Россия президентининг Федерал кенгашга мурожаати эмас, Путин бу ишни кейинроқ қилади.

Матбуот котибининг қўшимча қилишича, Путин Кремлдаги бугунги маросим теграсида яна Донецк, Луганскнинг етакчилари ҳамда Херсон ва Запорожьенинг Россия томонидан тайин этилган маъмурлари билан учрашади.

Хабарларга кўра, бугун мазкур тўрт минтақадаги ўзбошимча референдумлар натижаларини қўллаб-қувватлаш мақсадида Қизил майдонда митинг-концерт ўтказиш ҳам режаланган.

Ушбу тадбирда ҳам Путиннинг иштирок этиши кутилаётир.

Москвада бўлган Би-би-си мухбирининг хабар беришича, шаҳар кўчаларидаги кайфият байрамона эмас.

Мен суҳбатлашган одамлар қўрқув ва хавотирда экандек кўринишди, дейди у.

Шунингдек, Путин Киевни ҳарбий ҳаракатларни зудлик билан тўхтатиш ва музокаралар столига қайтишга чақирган.

Президент Зеленский бундан аввал ҳар қандай аннексия Россия билан мулоқот имкониятининг тугашини англатиши ва Украина ҳозир Россия қўлида бўлган барча ҳудудларини қайтариб олиш учун ўз ҳужумларини давом эттиришини айтган.

Зеленский нима қилмоқчи?

Украина президенти матбуот котибининг маълум қилишича, Кремлдаги бугунги маросим олдидан Володимир Зеленский Миллий Хавфсизлик ва мудофаа Кенгашининг фавқулодда йиғинини чақирган.

Кеча, пайшанба куни тунда эса, унинг маслаҳатчиси мазкур тадбирни "ажабтовур шоу", деб атаган.

Михайло Подольяк Кремль қилаётган ишнинг бирор бир ҳуқуқий асосга эга эмаслигини таъкидлаган, у бу ҳақда твит қилган.

Бирлашган Миллатлар Ташкилоти Бош котиби ҳам Кремлнинг мазкур ишини қоралаган.

Унга кўра, бу режа минтақада тинчлик ўрнатиш истиқболларини хавф остига қўйувчи "хавотирли эскалация"ни англатади.

Кремлдаги тадбир арафасида АҚШ Президенти Жо Байден Россиянинг аннексия ҳаракатларини ҳеч қачон тан олмасликларини айтиб чиққан.

АҚШ аннексия сабаб Россияга яна санкциялар қўлламоқчи.

Европа Иттифоқи лидерларининг расман баён қилишларича, улар "бу ноқонуний аннексияни ҳеч қачон тан олишмайди".

Аннексия режаси

Украинанинг босиб олинган ҳудудларини Россия таркибига қўшиб олиш бўйича ўтказилган беш кунлик халқаро меъёрларга зид референдум 27 сентябрь куни якунланган.

Путин эса, 21 сентябрь куни мазкур зиддиятли референдумлар режасини дастаклаб чиққан.

Россия президенти худди шу куни Украина уруши учун қисман сафарбарлик ҳам эълон қилган.

Путин ўзининг мазкур қарори сабабини "Ватан ҳимояси, унинг хавфсизлиги ва ҳудудий яхлитлигини таъминлаш" истаги билан изоҳлаган.

Чоршанба куни кечқурун эса, Россия ишғоли остидаги ҳудуд раҳбарларининг Москвага етиб келишгани айтилган.

Бунгача уларнинг ҳар бири ўз минтақаларини Россия таркибига қўшиб олишини сўраб, Владимир Путинга мурожаат билан чиқишган.

Марказий Осиё давлатлари орасидан ҳозирча фақат Қозоғистон Россия таъбиридаги мазкур референдумларни тан олмаслигини расман баён қилган.

Украина ва унинг ғарблик иттифоқчилари овоз бериш жараёнини сохта, нодемократик, деб қоралашган.

Халқаро ҳамжамият томонидан тан олинмагани учун жараёнда мустақил кузатувчилар иштирок этмаган.

Айрим ҳудудларда одамларнинг қурол остида овоз беришга мажбур бўлишганига оид хабарлар ҳам олинган.

2014 йилнинг март ойида ҳозиргидек тан олинмаган референдумдан бир неча кун ўтиб, Путин Қримнинг Россияга қўшилганини эълон қилганди.

Агар Россия ўзи тўлиқ назорат қилмаётган тўрт минтақани қўшиб олса, бу - урушни янги ва янада хавфли даражага олиб чиқади, деган жиддий хавотирлар бор.

Путин Украинада очган уруш ҳозир ўзининг саккизинчи ойига кириб бормоқда.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek