Россия Украина ҳудудларидаги “сохта” референдумларда ютганини айтмоқда, бу урушни янада хавфли қиладими? Urush va tinchlik

Россия қўл остида бўлган Украинанинг 4 минтақасида референдум деб аталаётган жараён тугади. Ушбу овозларни расмий Москва янада кўпроқ ҳудудларни кўшиб олишда фойдаланиши мумкин.

Минтақаларга Кремл томонидан қўйилган расмийлар Россияга қўшилиш ҳақидаги баҳсли овоз беришлар иштирок этган аҳоли томонидан тўлиқ қўллаб-қувватловга эга бўлганини даъво қилмоқда.

Украина ва унинг иттифоқчилари овоз бериш жараёнини сохта, деб қоралашган.

Халқаро ҳамжамият томонидан тан олинмагани учун жараёнда мустақил кузатувчилар иштирок этмаган.

Овоз бериш Украинанинг шарқидаги Донецк ва Луҳанск вилоятларида ўтган.

Шунингдек Россия босиб олган жанубдаги Херсон ва Запарожье бўлгаларида ҳам бўлган.

Россия бўйлаб тарқаб кетган қочқинлар ҳам ташкил қилинган ўнлаб сайлов участкасида овоз берган. Бу каби участкалар Россия 2014 йили қўшиб олган Қримда ҳам ташкил қилинган.

Бу ерлардаги айрим овоз беришларнинг натижалари аксар сайловчилар Россияга қўшилишни дастаклашини кўрсатган.

Украинанинг 15 фоизи ерини ташкил қилувчи уруш давомида вайрон бўлган ерларда 4 миллионга яқин одамдан овоз беришда иштирок этиш сўралган.

Кремлпараст маъмурият томонидан бошқарилаётган Донецк ва Луҳанскдаги хабар агентликлари 99.23 фоиз одам Россияга қўшилиш учун овоз берганини айтмоқда. Бу каби овоз беришларда юқори фоиз ноодатий саналади.

Президент Владимир Путин 4 минтақанинг Россияга қўшилиши ҳақида жума куни Россия парламентининг қўшма мажлисида эълон қилиши мумкин, деган тасдиқланмаган хабарлар бор.

2014 йилнинг март ойида ҳозиргидек тан олинмаган референдумдан бир неча кун ўтиб Путин Қримнинг Россияга қўшилганини эълон қилганди.

Агар Россия ўзи тўлиқ назорат қилмаётган 4 минтақани қўшиб олса, бу урушни янги ва янада хавфли даражага олиб чиқади. Чунки Москва Украинанинг бу ерларни қайтариб олишга қиладиган ҳар қандай ҳаракатини ўзининг суверен ҳудудига ҳужум деб баҳолайди.

Украина Президенти Володимир Зеленский Россияни куч билан босиб олинган ерларни қўшиб олишга ҳаракат қилиб, "БМТ низомини қўпол равишда бузиш"да айблади.

"Босиб олинган ҳудудлардаги бу майнабозчиликни референдумга тақлид деб аташ ҳам мумкин эмас", деган Зеленский.

Зеленский "Украинанинг босиб олинган ҳудудларидаги эркакларни Россия армиясига сафарбар қилишга ҳаракат ва уларни она ватанига қарши урушга мажбурлаш ўта сурбетлик" деган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek