Путиннинг орзулари чилпарчин бўлмоқдами ё Россия ғалабаси чалами? Ukraina Rossiya Dunyo Yangiliklar

"Ҳақиқат биз томонда, ҳақиқат кучда!" деди Владимир Путин Украина ҳудудининг тўртта катта қисми Россиянинг бир бўлаги деб эълон қилинган тантанали маросимдан сўнг Москвадаги Қизил Майдонда ташкиллаштирилган маросимда.

"Ғалаба бизники бўлади!"

Аммо реал дунёда ҳамма нарса бошқача кўринади.

Россия президенти Кремлда ноқонуний аннексия ҳақидаги шартномаларни имзолаётган пайтда ҳам Украина қўшинлари у босиб олган ҳудудларга чуқур кириб бордилар.

Алоқадор мавзулар:

Юз минглаб эркаклар урушга бориш ўрнига Россиядан қочмоқда.

Ва жанг майдонида ишлар шу қадар пачаваки, Путин ва унинг тарафдорлари бир пайтлар Украинани "денацификация" қилиш ва русийзабонларни ҳимоя қилиш учун деб атаган ҳаракатларни бутун "коллектив" Ғарбга қарши экзистенциал кураш сифатида қайта кўриб чиқмоқда.

Бу ҳақиқат ва у Россия фойдасига эмас.

Ўзи яратган тизим қурбони

"У кўр нуқтада турибди. У ҳақиқатан ҳам нима бўлаётганини кўрмаётганга ўхшайди", дейди Россия президенти ҳақида Антон Барбашин, Riddle Russia муҳаррири.

Кўпчилик қатори, сиёсатшуноснинг фикрича, Путин ҳам Ғарбнинг Киевни кучли қўллаб-қувватлаши, шунингдек, Украинанинг ишғолга қаттиқ қаршилик кўрсатишини кутмаган.

Бугун, 20 йилдан ортиқ ҳокимиятда бўлган Россия раҳбари 70 ёшга тўлар экан, ўз тизими қурбони бўлган кўринади.

Унинг автократик услуби соғлом фикрга тўсқинлик қиларди.

"Унинг ғояларини шубҳа остига қўйиб бўлмайди", деб тушунтиради R.Politik таҳлил фирмаси раҳбари Татьяна Становая.

"Путин билан ишлайдиган ҳар бир киши унинг дунё ва Украина ҳақидаги тасаввурини билади, унинг умидларини билади. Улар унинг қарашларига зид бўлган маълумотларни бера олмайдилар".

Президентнинг зарҳал Кремль қандиллари остида сўзлаган сўнгги мурожаати унинг янги дунё тартиби ҳақидаги қарашларини такрорлади.

Бу қудратли Россия, ҳурматни ўрганишга мажбур бўлган Ғарб дунёси ва Москва томонидан бўйсундирилган Киев.

Бунинг учун Путин уруш майдони сифатида Украинани танлади.

Унинг амбициялари ўта хаёлий бўлиб кўринишига қарамай, у чекинишга мойил эмас.

"Кремлнинг кўплаб муҳим ҳисоб-китоблари самара бермади ва Путиннинг одамларни фронтга юборишда давом этишдан бўлак Б режаси борга ўхшамаяпди ва фақатгина рақамлар Украинани олдинга силжишига халақит беради деб умид қилади", дейди Антон Барбашин.

Ихтиёрсиз ёлланганлар

"Одамларни фронтга жўнатиш" ўз-ўзидан муҳим силжишдир.

Владимир Путин ўзининг босқинини "махсус ҳарбий операция" деб таърифлашда давом этиб, уни чегараланган ва қисқа муддатли деб атади.

Кўпгина руслар бу билан келиша олдилар ва ҳатто уни қўллаб-қувватладилар, гарчи бу уларга бевосита таъсир қилмаса ҳам. Аммо заҳирадаги ҳарбийларни сафарбар қилиш узоқдаги, қандайдир мавҳум бир нарсани одамлар учун шахсий хавфга айлантирди.

Мумлакат ҳудудларидаги сиёсатчилар советча йўл тутиб, имкон қадар кўпроқ эркакларни жўнатишга, режани ортиғи билан бажаришга ҳаракат қилади.

"Бу ҳал қилувчи дақиқа. Аксарият руслар учун уруш бир неча ҳафта олдин бошланган", дейди Антон Барбашин.

"Биринчи ойларда асосан чекка ва кичик марказлардан келган одамлар ўлди. Охир-оқибат тобутлар Москва ва Санкт-Петербург келишни бошлар экан, сафарбарлик вазиятни ўзгартиради".

"Шунчаки даҳшатли" шароитлар

Бу мобилизация ижтимоий тармоқларда чақирилувчиларнинг хотинлари ва оналари - сафарбарлик эълон қилинганда хорижга шошилмаганларнинг кўп гап-сўзларига сабаб бўлди.

Уларнинг баъзи постлари ва эркакларнинг ўзлари акс этган видеолар оғир шароитларни фош қилади: ёмон озиқ-овқат, эски қуроллар ва асосий тиббий жиҳозларнинг етишмаслиги. Аёллар эркаклар пойабзали учун гигиена прокладкалари ва яраларини ёпиш учун тампонлар юборишни муҳокама қилмоқда.

Курск вилояти губернатори бир неча ҳарбий қисмлардаги шароитни ҳатто кийим-кечак етишмаслигига қадар "шунчаки даҳшатли" деб таърифлади.

Бу каби хабарлар Владимир Путиннинг рус армиясини ватанпарвар фуқаролар хизмат қилишни хоҳлайдиган профессионал жанговар кучга айлантиргани ҳақидаги даъволарни пучга чиқаради.

Аммо ҳозирча, кўпчилик ёлланганларнинг хотинлари ўз қўшинларига эътибор қаратганга ўхшайди.

"Россия жамиятининг салмоқли қисми ҳанузгача Россияни Украинада НАТО билан урушаётган буюк давлат деб ҳисоблайдиган, сафарбар қилинганларга тампонлар, пайпоқлар ва тиш чўткаларини юбориш ватанпарварлик белгиси деб қараладиган, босқичда турибди", деб ёзади Антон Барбашин.

Цензура барбод бўлмоқда

Аммо сафарбарликдаги бетартибликлар ва Россиянинг ҳарбий шармандалиги таниқли арбобларни кўпроқ гапиришга мажбур қилмоқда.

Либераллар Украинага босқинни қоралаганларида, улар ҳибсга олинди ва кўплари ҳамон панжара ортида.

Ҳатто буни уруш деб аташ ҳам ноқонунийдир.

Бироқ, Кремлга яқин доираларда бу сўз, шунингдек, Россия ҳарбий қўмондонлигини кескин танқид қилиш одатий ҳолга айланди.

Яқинда депутат Андрей Картаполов Мудофаа вазирлигини Россиянинг қийинчиликлари ҳақида "ёлғон гапиришни бас қилишга" чақирди, чунки "бизнинг халқимиз аҳмоқ эмас" деди.

RT телеканали муҳаррири Маргарита Симонян Сталиннинг "қўрқоқлар" ва "қобилиятсиз" генералларни отиб ташлаганини эслатди.

Аммо Владимир Путин у ёқда турсин босқиннинг ўзи жамоатчилик сўровига тутилмаган.

Маргарита Симонян Путинни «Босс» деб атайди ва кўзлари ёниб, Украина ҳудудининг аннексия қилинишини тарихий ютуқ сифатида гапиради.

"Урушга қарши сиёсий ҳаракат йўқ, - дейди Татьяна Становая, - айниқса, сиёсий репрессив муҳитда.

Ҳатто сафарбарликка қарши бўлганлар ҳам қочишни афзал кўради. Кимдир мамлакатни тарк этмоқчи, кимдир яширинмоқда. Лекин биз ҳеч қандай сиёсий қаршилик кўрсатишга уринишларни кўрмаяпмиз".

Вазият ўзгариши мумкин, дейди у, агар Россия йўқотишда ва қўшимча аскар олишда давом этса.

"Путин баъзи ғалабаларни қўлга киритиши керак", дейди у.

Ғарбга қарши "муқаддас" уруш

Ҳатто президент муаммоларга шама қилиб, аннексия қилинган ҳудудлардаги вазиятни «барқарор» деб атади.

Аммо Россиянинг муваффақиятсизликларида Украинани қўллаб-қувватлаётган «коллектив» Ғарбни айблаш учун катта туртки бор.

Ҳозирда етакчи давлат ОАВлари Украинадаги ҳудуд эгаллаб олинишини халқни каттароқ курашга ундайдиган каттароқ сабаб қилиб кўрсатмоқда.

"Бу бизнинг тотал сатанизмга қарши урушимиз", деди Владимир Соловёв Россия телетомошабинларига.

"Бу Украина ҳақида эмас. Ғарбнинг мақсади аниқ. Режимни ўзгартиринг ва Россияни парчаланг, шунда Россия бўлмасин ", дейди у.

Бу Владимир Путин ишонадиган «ҳақиқат», шунинг учун Россия учун бу объектив заифлик лаҳзаси ҳам хавф-хатардир.

"Бу уруш Россия учун экзистенциал, шунинг учун Путин ғалаба қозониши керак", дейди Татьяна Становая.

Камига "унинг ядровий қуроли бор", дейди у очиқчасига.

"Менимча, у ядровий таҳдид кучайишининг қайсидир босқичида Ғарб Украинадан орқага чекинишига умид қилмоқда".

У Путиннинг радикалроқ, деярли мессианча оҳангига урғу берган ягона одам эмас.

"У ҳақиқатан ҳам бунга ишонаётганга ўхшайди: бу Россия империясининг сўнгги жанги, Ғарб билан умумий уруш", дейди Антон Барбашин.

"Россиянинг вақти борми ёки йўқлигидан қатъи назар, биз марра чизиғидамиз."

Албатта, бу Владимир Путин Ғарб ҳар қачонгидан ҳам кўпроқ ишонишини истаган «ҳақиқат».

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek