Украина уруши: Россиядан нохуш хабар, АҚШ Украинани янада кучайтирмоқчи, Путин қўрққан иш амалга ошадиган ва энди россияликларга қийин бўладими? Ukrainа Rossiya Putin Yangiliklar
Сурат манбаси, ANADOLU AGENCY
Энди Россиянинг кейинги қадами кутилмаган бўлиши мумкин. АҚШ Украинага яна $1 миллиард долларлик ҳарбий кўмак бермоқчи. Президент Байден Путинни қўрқитган ҳужжатларни имзолайди. Зеленский россияликларни қўрқитиб қўйдими?
Таҳлил:
Алоқадор мавзулар:
"Нохуш хабар"
АҚШ энди Россиянинг ядровий объектларини текшира олмайди.
Россия ядровий қуролларни назорат қилиш тўғрисидаги шартномадан чиқишини эълон қилди.
Расмий Москва ҳозирча бунинг вақтинчалик қадам эканини айтди.
Россия бунинг сабабини расман мамлакатлар ўртасида тўғридан-тўғри авиақатновлар йўқлиги ва АҚШда коронавирус билан касалланишнинг кўплиги билан изоҳлади.
Аммо Россиянинг бу қароридан ҳатто маҳаллий ҳарбий таҳлилчиларнинг ўзлари ҳам хавотирда.
Уларга кўра, халқаро ҳамжамият Украина можароси, АҚШ иштирокидаги Хитой ва Тайвань орасида бўй кўрсатиб турган мавжуд тангликдан қанчалик асабий экани фонида бу ёмон хабар.
Ядро иншоотларини текшириш - икки давлат ўртасидаги кескинликни юмшатишнинг воситаларидан бири бўлади.
Бу каби текширувлар ўзаро алоқаларни янада шаффоф қилади.
Рақибнинг ҳаракатларини олдиндан айтиш мумкин бўлади.
Шу тариқа бу ҳар икки давлатга ҳам фойда келтиради.
АҚШ ва Россия дунёнинг глобал қудратлари саналишади.
Яқинда БМТ Бош котиби дунё ядровий уруш ёқасида экани билан огоҳлантирганди.
АҚШ Украинани янада кучайтирмоқчи
Сурат манбаси, The Washington Post via Getty Images
АҚШ Украинага яна $1 миллиард долларлик ҳарбий ёрдам бермоқчи, янги кўмак пакетини расман маъқуллади.
Пентагоннинг расман маълум қилишича, бу АҚШ томонидан сўнгги бир йил ичида Украинага кўрсатилаётган 18-ҳарбий ёрдамдир.
Расмий Вашингтонга кўра, сўнггиси, бундан ташқари, АҚШ Мудофаа вазирлиги заҳирасидан Украинага етказиб берилаётган бир марталик энг йирик миқдордаги қурол-яроғ ва ҳарбий техника ҳам бўлади.
Украина бу гал, хусусан, HIMARIS тизимлари учун ўқ-дорилар, артиллерия ва миномётлар, Javelin ва AT4 танкка қарши тизимлар, зирҳли "Тез ёрдам" машиналари ва тиббий ёрдам тўпламларини олади.
АҚШ Давлат котибининг айтишича, Жой Байден қудратга келиши ортидан Украинага етказиб берган ҳарбий кўмакларининг жами миқдори қарийб 10 миллиард долларга етган.
Энтони Блинкен "Украина билан бирдам" эканликларини баён қилган.
Унга кўра, АҚШ 50 дан ортиқ иттифоқчиси ва ҳамкори билан бирга Украинани қўллаш, унинг суверенитети, ҳудудий яхлитлигини ҳимоя қилиш, жанг жабҳасида ўзгариш ясаш ва музокаралар столида расмий Киевнинг мавқеини кучайтириш учун Украинага ҳаётий муҳим ёрдамларини етказишда давом этишади.
НАТО расман кенгаяди
Сурат манбаси, Getty Images
АҚШ президенти бугун, 9 август куни Финландия ва Швециянинг НАТОга киришига оид ҳужжатларни имзолайди.
Бу Жо Байденнинг Оқ Уй томонидан тарқатилган бугунги иш жадвалидан ўрин олган масалалардан биридир.
Унда айтилишича, АҚШ президенти куннинг иккинчи ярмида нутқ сўзлайди ва кейин бу хусусдаги протоколларни ратификация қилади.
НАТО дунёдаги энг йирик ҳарбий иттифоқ бўлади.
Россия президенти иттифоқнинг кенгайиб, ўз чегараларига яқинлашишидан жиддий хавотирда эканинини расман ва ошкора баён этиб келган.
Украина урушига ҳам асосан худди шу нарса - расмий Киевнинг НАТОга кириш истаги сабаб бўлган.
Washington Post: Зеленский Ғарбга янги даъват билан чиқди
Сурат манбаси, EPA
Украина президенти улардан Россия фуқароларининг ҳаммаси учун ўз чегараларини ёпишларини сўради.
Янги тафсилотлар Володимир Зеленскийнинг Американинг нуфузли Washington Post газетасига берган суҳбати ортидан ўртага чиқди.
Унинг баён қилишича, Россиянинг Украинага босқинини фақат шу йўл билан тўхтатиш мумкин.
"Энг муҳим санкциялар - бу чегараларни ёпишдир. Чунки россияликлар бировларнинг ерларини босиб олишмоқда", - дея баён қилган Украина президенти.
Володимир Зеленскийга кўра, Россия фуқаролари ёндошувларини ўзгартирмагунларича, ўз Ватанларида яшашлари керак.
Танқидчиларнинг фикрича, бунга ўхшаш тақиқ Владимир Путин сиёсатига норозилик сифатида мамлакатни тарк этган россияликлар учун адолатсизлик бўлади.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
