Украина – Россия: Путиннинг Украинада кейинги режаси нима? Таҳлил Ukrainа Rossiya Putin Yangiliklar

Россия ҳарбийлари "чарчади"ми? Путин "махсус ҳарбий операция"сини тугатадими? Буёғи нима бўлади?

Таҳлил:

Украина ўзини Россия тажовузидан қандай ҳимоя қила олади?

Алоқадор мавзулар:

Ва яна Россия олдинга силжиди. Украина яна чекинди.

Лисичанск учун башорат қилинган шиддатли ва узоқ давом этган жангнинг олди, минтақа губернатори сўзларига кўра, стратегик чекиниш орқали олинган.

Сергей Гайдай менга шундай деди: "Россия артиллерия ва ўқ-дориларда катта устунликка эга. Улар уни узоқдан йўқ қилишарди, шунинг учун қолишдан фойда йўқ эди."

Бу шаҳарнинг қўлга олиниши ҳақидаги рус маълумотларига мос келадиган кўринади, у ҳеч қандай қаршиликсиз шаҳарни эгаллаган. Якшанба куни ижтимоий тармоқларда чоп этилган видеоларда чечен жангчилари марказий ҳудудларда рақс тушаётгани акс этган.

Улар байрам қилишлари мумкин. Лисичанскнинг эгалланиши Россиянинг бутун Луганск вилоятини амалда эгаллаб олганини англатади, бу президент Путиннинг Украинага бостириб киришининг асосий стратегик мақсадидир.

Хўш, бу Донбасс учун ва умуман уруш учун нимани англатади?

Келинг, Украина нуқтаи назаридан бошлайлик. Улар учун асосий нарса, Мариуполда бўлгани каби, қамалдан қочиш эди. Уларнинг жанубий порт шаҳарни мудофаа қилишлари кўп ҳафталар давомида Россиянинг олдинга силжишини секинлаштирган бўлса да, якуний натижа Украина армиясининг минглаб энг қобилиятли аскарларини ўлиши ёки асирга олиниши бўлди.

Украина ҳар қандай ҳолатда ҳам бундан қочишни хоҳлайди.

Бу ҳақда президент Зеленский тунги мурожаатида аниқ таъкидлади. "Биз деворларни тиклаймиз, ерни қайтариб оламиз, лекин биринчи навбатда одамларни қутқариш керак", деди у халққа.

Сергей Гайдай ҳам худди шуни гапирди: "Бизнинг қўшинларимиз янада мустаҳкамланган позицияларга чекинишди ... Беш ой давомида улар Луганскни ҳимоя қилишди. Бу мудофаа давом этар экан, биз Донецк вилоятида янги истеҳкомлар қурдик. Ҳозир қўшинлар ўша томонга боришди".

Лисичанск қулаганидан бир неча соат ўтгач, президент маслаҳатчиси Алексей Арестович ҳатто Лисичанск-Северодонецк мудофаасини "муваффақиятли ҳарбий операция" деб атади.

Россия байроғи ҳозир иккала шаҳарда ҳилпираб тургани сабабли, бу мантиқ бироз чалкашдек туюлиши мумкин, аммо унинг фикрича, улар узоқ вақт қимматли ўйин ўйнашган.

Ушбу мантиқни тушуниш учун сиз Украина қаршилиги учун Ғарб қуролларининг аҳамиятини тушунишингиз керак. Қисқаси, НАТО таъминотисиз улар ҳозиргидан ҳам кўпроқ муаммоларга дуч келишарди.

Улар Россиянинг олдинга силжишини қанчалик узоқроқ кечиктира олсалар, шунчалик илғор ракета ва артиллерия тизимларидан жангда фойдаланишлари мумкин бўлади.

Айтилишича, АҚШ томонидан тақдим этилган HIMARS аллақачон ишламоқда ва можаро мувозанатини тубдан ўзгартиради.

Кўпроқ вақт кўпроқ таъминот етиб келишини англатади, бу эса ўз навбатида тарози палласини улар томонга босади, айниқса, санкциялар шароитида Россия эскирган ускуналари ва ўқ-дориларини алмаштириш учун курашаётганини ҳисобга олсак.

Энди руслар томондан вазиятга баҳо берсак. Уларнинг мақсади Донбассни "озод қилиш" учун қўлга олишдир. Луганскнинг эгалланиши бунга қадам яқинлаштиради.

Дарҳақиқат, унинг аҳамиятини бугун Президент Путин ҳужумга бошчилик қилганларни "Россия қаҳрамони" - Федерациянинг олий мукофоти билан тақдирлаганида ҳам кўриш мумкин.

Аммо кейин нима бўлади? Улар Донбасснинг қолган қисмини, хусусан, сўнгги кунларда ўққа тутилган Славянск ва Краматорск шаҳарларини деярли қўлга киритишга ҳаракат қилишади.

Айтилишича, Словянск 2014 йилда илк бўлгинчи исёнчилар ҳаракати юзага келган билан алоҳида аҳамиятга эга.

Бундан ташқари, Россиянинг кенгроқ стратегияси аниқ эмас. Кўп нарса улар Донбассни эгаллагандан кейинги ҳарбий кучлари ҳолатига боғлиқ бўлади.

Президент Путин бугун буни сўзсиз тан олди ва шундай деди: "Фаол жанговар ҳаракатларда қатнашган ва Луганск йўналишида муваффақият ва ғалабаларга эришган бўлинмалар, албатта, дам олишлари ва жанговар имкониятларини оширишлари керак".

Агар улар ҳали ҳам тезкорлик билан олдинга силжишса, улар бутун Украина жанубини, жумладан, Днепр ёки ундан ташқаридаги йирик шаҳарни қўлга киритиш учун ҳужумларини давом эттиришлари мумкин.

Бироқ, агар улар кўплаб таҳлилчилар башорат қилганидек ва Путин шама қилганидек, чарчаган бўлсалар, улар "махсус ҳарбий операция" тугаганини эълон қилишлари мумкин.

Улар бир томонлама ўт очишни тўхтатиш Украинага халқаро қўллаб-қувватловни сусайтиради ва баъзилар, эҳтимол, Франция ва Германия тинчликка интилишади, деб умид қилишлари мумкин.

Украина, шубҳасиз, курашни давом эттиради, аммо барқарор қуролларсиз, олдинги чизиқ 2014 ва 2022 йиллардаги каби музлатилган можарога айланиши мумкин. Бу қўшнисини нотинч ҳолатда ушлаб турган Россияга мос келади.

Ҳозирча ҳеч нарса аниқ эмас, чунки иккала томон ҳам ўзларининг устунликларини даъво қилмоқдалар. Дарҳақиқат, Украина Донбассда ортда қолаётган бўлса да, сўнгги пайтларда муваффақиятга эришди, айниқса, бугун яна кўк ва сариқ байроқлар тикилган Илон оролини қайтариб олишда.

Ишонч билан айтишимиз мумкинки, бу уруш яқин келажакда тугамайди ва унинг оқибатларидан Донецк вилояти аҳолиси жабр кўради.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek