Алвидо, Путин! Хайр, Россия! Туркияга қочган рус ҳикояси. Video Rossiya Ukraina Yangiliklar

Россиялик қочқин

Сурат манбаси, Screenshot

Ўқилиш вақти: 2 дақ

Роман касби денгизчи бўлгани, Россиянинг Украинага босқини бошланиши билан оиласини Истанбулга Польша орқали олиб келганини айтади. - Аёлим украин, қизим 11 ёшда. У Украинада, бувисининг ёнида эди. 24 феврал куни ҳарбий операцияни эшитиб, бунинг нималигини дарров тушундим, ҳаракатга тушдим, - ҳикоя қилади у Би-би-си Ўзбек хизматига.

Роман Россиядаги ҳозирги сиёсатга қарамай, урушга қаршилигини айтишдан қўрқмаслигини айтади:

Ўтказиб юборинг YouTube пост
Google YouTube контентига рухсат бериш

Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.

Огоҳлантириш:Учинчи манба материалида реклама бўлиши мумкин

Охири YouTube пост

Алоқадор мавзулар:

Яқинларимни қутқариш операцияси

- Уруш бошланганида - 24 февралда Москвада эдим. Аёлим ҳам Москвада эди. Қизим Украинада, бувисида эди, - Туркияга келишини гапириб берди Роман.

"Менинг аёлим украин. Қизим 11 ёшда. У бувисининг ёнида эди. 24 феврал куни ҳарбий операцияни эшитиб, бунинг нималигини дарров тушундим, ҳаракатга тушдим.

Қизимни Украинадан олиб чиқиш учун бувисига ишонч қоғози юбордик. Бироқ Москвага келишнинг имкони йўқ эди. Қочоқлар қаторида Польшага чиқишига муваффақ бўлдик.

Мен етиб бордим, қизим билан Польшада кўришдик. Кейин Москвадан аёлим етиб келди. Оиламни айланма йўллар билан Истанбулга олиб келдим.

Буни бир неча кун ичида қилиш қийин эди, аммо биз қила олдик. Келиш тарихимиз шу.

Skip Энг кўп ўқилган and continue reading
Энг кўп ўқилган

End of Энг кўп ўқилган

Путин "махсус операциям" дейдию бу унимас, менинг "операциям" бўлди. Ўз яқинларимни қутқариш операциям.

Ҳозир Истанбулдамиз, нисбатан анча тинчмиз. Бироқ Украинада яқинларимиз қоларкан, тинчмиз дея олмаймиз. Улар ҳар куни 8 соат тревогада, бомбапаноҳда, ҳавф остида яшашаяпти".

Мен русман ва урушга қаршиман

Юртини ташлаб кетаётган россиялик ёшларнинг айримлари Кремль сиёсатига қаршилигини, баъзилари урушга чақирувдан қочишаётганини айтишади.

- "Мен кема бошқарувчиси, заҳирадаги матросман. Ҳарбий билетимда шундай ёзилган. Сочида ишлардим, иш бўйича Европада жуда кўп бўлганман. Туркияга ҳам кўп келгандим. Мен касбимни, денгизни севаман. Бу ерга жойлашаяпман, яхталар бўйича ишлаяпман.

Мен урушга бормайман, жанг қилишни истамайман. Урушга қаршиман. Мен бутун дунёда урушга қаршиман.

Биласизми, биз бу ерда уруш ҳақида гапиришимиз мумкин. Аммо у ерда одамлар ўлаяпти. Сергей Бодров, "Урушда эмас экансиз, уруш ҳақида гапириш керакмас", деганди. Уруш ҳақидаги фикрлар барибир реаллик билан мос келмайди. Уруш даҳшатини фақат уруш ичидагилар аниқ гапира оладилар", - дейди Роман.

Бўлди, етар. Тўхтанглар!

Суҳбатдошимиз Россиядан Туркияга 20 дан ортиқ дўстлари ҳам етиб келишганини айтади.

Шу пайт унинг телефон жиринглади. Рафиқаси қўнғироқ қилаётган экан.

Биз Алёна билан телефонда гаплашдик. У жуда ташвишли эди.

- Бу кунлар тезроқ ўтиб кетсин, деди Алёна.

- Аёлим уруш ҳақида гапиришни ҳам истамайди. У бу ерда жуда сиқилаяпти. Ота-онаси Украинада, Алёнка хавотирда. У бутун дардини ичига ютаяпти, - дейди Роман.

Роман урушга қаршилигини айтишдан қўрқмаслигини айтади.

- "Мен русман. Буни бу кафеда ҳам, ҳамма жойда бемалол айта оламан. Менга ҳеч ким ҳеч нарса демайди. Мен русман ва урушга қаршиман.

Тўхтанглар, илтимос. Мен Россияда ҳозир бўлаётган иблисона тизимга қаршиман.

Бўлди, етар! Хайр!

Хайр, Путин! Хукуматда ўтирган қарию эскилардан ким бор, Медведев ҳам, миллиардерлар ҳам, бошқалари ҳам кетсин.

Бўлди, етар. Тўхтанглар, ахир.

Хотиржам яшайлик.

Тинчликда яшайлик".

Telegram каналимиз: https://t.me/bbcuzbek

BBCUZBEK.COM билан Telegram орқали +44 7858860002 номери билан боғланинг.