Ўзбекистон: Президент самолётда кузатган ўйин ва Мексика орқали Америкага боришнинг нархи қанча? – янгиликлар, O'zbekiston, yangiliklar

Президент кузатган ўйин

Президент Шавкат Мирзиёев Нодирбек Абдусатторовнинг шахмат бўйича жаҳон чемпионига айланиши лаҳзаларини самолётдан онлайн кузатиб борган.

Шов-шувларга сабаб бўлган ўйин президент МДҲнинг норасмий саммити бўлиб ўтган Санкт-Петербургдан Тошкентга қайтаётган вақтга тўғри келган.

Президент матбуот котиби Шерзод Асадовнинг ёзишича, ўйинни кузатишда Мирзиёевга бутун делегация аъзолари ҳамроҳлик қилган.

"Давлатимиз раҳбари шахматнинг рапид йўналиши бўйича янги ва энг ёш жаҳон чемпионига ўзининг энг самимий табрикларини йўлламоқда ҳамда унинг ота-онаси ва мураббийларига миннатдорлик билдирмоқда. Баракалла!", ёзган Асадов.

28 декабрь куни ўзбекистонлик 17 яшар Нодирбек Абдусатторов шахматнинг рапид йўналиши бўйича жаҳон чемпионига айланган эди.

Ҳал қилувчи ўйинда Нодирбек беш карра жаҳон чемпиони, норвегиялик Магнус Карлсен устидан ғалаба қозонган.

Алоқадор мавзулар:

$30 мингга Америкага

Самарқандда одамларни Мексика орқали АҚШга ноқонуний юбормоқчи бўлган шахслар қўлга олинган.

ДХХнинг Самарқанд бўйича бошқармаси ва вилоят ИИБ 2 нафар шахсни бунинг эвазига 2 фуқаронинг ҳар биридан $30 мингдан, жами $60 минг талаб қилиб, олдиндан $20 минг олаётган пайтда ушлаган.

Тақдим этилган тезкор тасвирларда АҚШга бориш истагидаги фуқаролар Ўзбекистон - Туркия - Боливия - Колумбия - Мексика йўналиши орқали манзилга етказиш режалаштирилгани ҳақида сўз боради.

"Шунингдек, уларга йўлга чиқишдан аввал ПЗР-тест маълумотномасига ва ҳисобида 4 минг АҚШ доллари бўлган Виса-картага эга бўлишлари кераклиги ҳамда ҳар бир давлат ҳудудида уларни кузатиб қўювчи шахсларнинг талабларини, жумладан, Амазонка дарёсининг Колумбиядан оқиб ўтувчи қисмидан ва Мексиканинг ўрмонларидан ўтиб олиш бўйича талабларини бажаришлари зарурлиги тушунтирилган", дейилади хабарда.

Бундан ташқари, ҳибсга олинган шахсларда 60 нафардан ортиқ фуқароларнинг паспорт нусхалари борлиги ҳам аниқлангани қўшимча қилинган.

Айирбошлаш январдан ишлай бошлайди

Мамлакатдаги банкоматларнинг хорижий валюта айирбошлаш функцияси январь ойи охиригача қайта тикланади.

Gazeta.uz UzCard ва Марказий Банк маълумотларига таяниб, бу ҳақда хабар қилган.

Сентябрь охирида банкоматларда 50 ва 100 долларлик сохта банкноталарни алмаштириш ҳолатлари кўпайиб бораётганини билдирган UzCard банкоматлардаги бу функцияларни номаълум муддатга ўчириб қўйган эди.

Билдирилишича, банкоматларнинг қўшимча хавфсизлигини таъминлаш учун зарурий барча ўзгартиришлар киритилган ва улар янги йил бошидан тўлақонли хизмат кўрсата бошлайди.

Ортга қайтган фуқаролар

Қозоғистонда ЙТҲга учраган ўзбекистонлик махсус автобусда Ўзбекистонга қайтиб келганлар.

28 декабрь куни қўшни давлатнинг Олмаота вилоятида ўзбекистонликлар билан тўла йўловчи автобус тўқнашув натижасида енгил автомашина устига ағдарилган эди.

Қозоғистон нашрлари автомашина йўловчиларидан уч нафари воқеа жойида ҳалок бўлгани, автобус йўловчиларига эса жиддий шикаст етмагани ҳақида ёзган.

Ўзбекистон ТИВ ҳалок бўлган ва жабрланганлар орасида ўзбекистонликлар қайд этилмаганини билдирган.

Қурилишдан топилган снаряд

Тошкент шаҳрининг Яккасарой туманида қурилиши давом этаётган объектдан миномёт ва снаряд топилган.

Тошкент шаҳар ИИББнинг маълум қилишича, 27 декабрь куни икки фуқаро қурилиш ҳудудида занглаган ва шубҳали буюмларни топиб олиб, бу ҳақда тезкор хизматларга хабар берган.

"Текширув ўтказилгач, топилган буюмлар ўқув машғулотлари давомида фойдаланишга мўлжалланган иккита 115 мм.лик ўқув снаряди ва иккита 82 мм.лик ўқув миномёти эканлиги маълум бўлди", дейилади шаҳар ИИББ хабарида.

Хабарда ҳолат бўйича ўрганиш ишлари давом этаётгани қўшимча қилинган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek