Nike ширкати раҳбари Хитойдаги бизнес сиёсатини ҳимоя қилди Xitoy Uyg'ur Shinjon

Дунёдаги спорт кийимлари бўйича энг йирик компаниялардан бири саналган Nike Шинжон ва Уйғурлар ҳақидаги баёнотлари ортидан Хитойда бойкотга дуч келган эди.

Ширкат раҳбари Жон Донаҳю "Nike - Хитойники ва Хитой учун бўлган бранд" деб айтган.

Компания ижрочи директори Wall Street таҳлилчиларининг Nikeнинг энг сўнгги даромадлари ҳақидаги ҳисоботи бўйича қилган сўровларига жавоб берган.

Хусусан, ундан Хитойдаги рақобатчи компаниялар қандай рақобат қилаётганлари ҳақида сўрашган.

Сўнгги ҳисоботдан маълум бўлишича, Nikeнинг бутун жаҳондаги 2020 йил тўртинчи чорагидаги даромади 12,3 миллиард долларни ташкил этган, бу йилнинг биринчи чорагидагига солиштирганда икки баравар кўп дегани.

Бу ширкатда кутганларидан ҳам яхшироқ натижа бўлган.

Коронавирус пандемияси боис 2020 йилнинг биринчи чорагида 790 миллион доллар йўқотишга дуч келган компания сўнгги чоракда 1,5 миллиард доллар соф фойда кўрган.

Ҳисоботлардан маълум бўлишича, ширкат Хитойдаги савдоларидан 1,9 миллиард доллар даромад топган, аммо Wall Street бу рақам 2,2 миллиардга етади деб кутган.

Nike ижрочи директори Жон Донаҳюнинг айтишича, "унинг Хитой бундан кейин ҳам компания учун тез ўсиб борадиган бозорлигигича қолишига ишончи комил".

Боиси, ширкатнинг Хитойга узоқ йиллар давомида киритган сармоялари мева беради.

"Биз ҳар доим узоқни кўзлаб келганмиз. Биз 40 йилдан ортиқ вақтдан буён Хитойдамиз", деб айтган Nike раҳбари.

"Фил (Найт) илк кунларда Хитойга муҳим вақт ва энергия сарфлаган ва бугун биз у ерда энг катта спорт брандимиз", деган жаноб Донаҳю Nike асосчиси ва собиқ ижрочи директорини назарда тутиб.

Nike ВВСнинг бундан кейинги саволларига ҳозирча жавоб қайтаргани йўқ.

Нью-Йоркдаги биржа савдоларининг илк соатларида Nike акцияларининг нархи 14 фоиз кўтарилган.

Нега Nike Хитойда бойкотга учради?

Хитой ҳукумати Шинжонда Уйғурларни пахта етиштиришда мажбурий меҳнатга жалб этаётгани ҳақидаги хабарлар ортидан Ғарбдаги қатор брандлар, шу жумладан, Nike ва H&M ўз хавотирлари изҳор этилган баёнот тарқатдилар.

Бу эса Хитой ҳукуматини ғазаблантирди, Хитойдаги социал медиа тармоқларида машҳур одамларнинг Ғарб брандларидан воз кечиб Хитой товарларини танлаганлари эълонлари тарқалди.

Шу йил март ойида қатор Ғарб мамлакатлари мусулмонларнинг ҳуқуқларини поймол этаётгани учун Хитой расмийларига қарши санкциялар жорий этди.

Ушбу санкцияларни Европа Иттифоқи, АҚШ, Буюк Британия ва Канада мувофиқлаштирган ҳолда киритдилар.

Ўтган йили декабрида BBC ўзининг журналистик суриштирувини эълон қилган, унда Хитой минглаб миллий озчиликлар вакиллари, шу жумладан, Уйғурларни Шинжондаги пахта далаларида мажбурий меҳнатга жалб этгани исботланган эди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek