Россия: "Ватанга унинг ноҳақ эканлигини айтиш ватанпарварликдир..."

Алла Пугачёва уруш бошланганидан кейинги илк бор медиа билан суҳбатлашди.

Пугачёва бир неча йил аввал Россияни тарк этганди. Журналист Катерина Гордеева билан суҳбатнинг асосий мавзуси уруш бошланганидан кўп ўтмай Россияни тарк этиш қарорини бергани ва ундан кейинги воқеаларга муносабатлар бўлган.

Суҳбат 3 ярим соатдан кўпроқ давом этган, унда Россия ва собиқ Шўро давлатларининг энг машҳур хонандаси турли давр сиёсатчилари, ўзининг турмуш ўртоқлари ҳақида ҳам гапирган.

У ўз қўшиқлари ва бутун ҳаёти давомида уни ҳам севган, ҳам ёмон кўрган ҳар бир инсонга нималарни қолдирмоқчи эканлиги ҳақида ҳам сўз юритди.

Пугачёва муқаддам бу каби катта суҳбатни 2017-йилда актёр Олег Меньшиковга (ундан олдинроқ 2012-йилда Владимир Познерга) берган эди ва ўшанда улар ҳайрат ва ҳаёжонини яширмасдан, асосан, саҳна ва унинг ортида бўлаётган воқеалар ҳақида ҳикояларни тинглашган.

Аммо Катерина Гордеева билан суҳбат оҳангги бошқача бўлди.

Алла Пугачева ва унинг турмуш ўртоғи Максим Галкин (Украина билан уруш бошланганидан кейин Россияни тарк этган ва Пугачева Россия ҳукуматидан эридан кейин уни ҳам «хорижий агент» деб тан олишини сўраганди).

2024-йил июль ойида Киевдаги «Охматдет» болалар шифохонасига ҳужумдан сўнг у шундай деб ёзган эди: "ХУДО сабрли, лекин ҳамма нарсанинг ЧЕГАРАСИ бор".

"Одамлар учун бир ҳужжат бўлиб қолаверсин", у суҳбат мақсадини шундай таърифлади.

Пугачёванинг суҳбатда айтишича, Россияни тарк этиш қарори аста-секин қабул қилинган. Президент маъмурияти раҳбарининг ўринбосари Сергей Кириенко у билан гаплашишни сўраган ва хавотирланмасликка чақирган.

Пугачёванинг айтишича, у ҳатто унга ишонган, лекин бу суҳбатдан сўнг икки кун ўтиб Галкин «хорижий агент» деб топилган.

Галкин ва Пугачёва фарзандлари мактабда масхара қилинган. Синфдошлари уларни "Жосус болалари" дея ҳақоратлашган.

"Оёқлар қалтирамоқда, аммо қўллар ҳали ҳам титрамаяпти", дейди Пугачева ўзи ҳақида ва бунда у фақат ёши ёки соғлиғининг ҳолатини назарда тутмаётган кўринади.

"Виждон тушунчаси бор, у шуҳратдан, ҳашаматдан, дунёдаги ҳамма нарсадан қимматроқ", дейди Пугачева.

"Ватанга унинг ноҳақ эканлигини айтишнинг ўзи ватанпарварликдир..."

Суҳбатнинг каттагина қисми хонанданинг эстрада ва ҳаёти ҳақидаги хотиралари ҳақида кечган.

У ўз ҳамкасблари ҳам эслайди. Хусусан, у ҳар доим Татяна Булановага хайрихоҳ бўлгани, Манижага бўлган муҳаббати ҳақида, ренессансни бошдан кечираётган Надежда Кадишева ҳақида илиқ сўзлайди.

Фақатгина Шаман мақтовга сазовор бўлмади, бу ҳам унинг мусиқаси ёки истеъдоди билан эмас, балки шахсий фазилатлари билан боғлиқ.

"Худо сақласин, менга Примадонна дейишса, ёқтирмайман. "Примадонна" - бу қўшиқ номи", дейди Пугачёва.

"Мен — қўшиқ куйловчи аёлман". Бу ҳам унинг қўшиғи номи.

Пугачёва ҳатто бир пайтлар Владимир Путиннинг мухлиси бўлганлигини, уни қўллаб-қувватлаганини айтди: «У ажойиб тўғри гапларни айтди. Ҳатто Украина ҳақида ҳам. Умуман олганда, мен ўйлаган ҳамма нарсани у айтди"

"Курск" сув ости кемаси билан боғлиқ фожиадан сўнг бу ўзгарди.

Cуҳбат якунида Пугачёва бир неча марта кўз ёшларини тия олмай, ўз мухлисларига, улар қаерда бўлмасин мурожаат қилди.

У мулоқот бахти ва муҳаббат, ҳозир ҳам унинг ёнида эканликлари учун миннатдорчилик билдирди.

Аммо хонанда баъзилар "қандай қилиб шундай яшайдилар" дея ҳайратини ҳам яширмайди.

"Тарихни билишмайди, лекин ундан фахрланадилар, тиббиётда нималар бўлаётганини билишмайди, лекин соғлиқни сақлаш тизимидан фахрланадилар…"

"Яхшилик, меҳр ва гўзалликка интилишни ўрганинг. Ҳеч нарсани бузиш керак эмас. Яратиш керак. Тинчлик тилаб ибодат қилиш керак, урушдан ўйин каби роҳатланиш эмас..."

Россия адлия вазирлиги Катерина Гордеева ва Максим Галкинни хорижий агентлар деб эълон қилган.