"Боламиз туғилгач, эрим билан яқинлик истамай қўйдим"

Жинсий алоқа кўпчилик одамлар учун муносабатларнинг ажралмас қисми ҳисобланади. Аммо NHS [Британия Миллий Соғлиқни сақлаш хизмати] маълумотларига кўра, баъзиларда ҳомиладорлик ва туғруқдан сўнг жинсий истак йўқолиши одатий ҳол.

Реалити-ТВ юлдузи ва фитнес мураббий Ҳолли Ҳаган-Блайт ўғли туғилганидан кейин айнан шундай ҳолатни бошидан кечирганини айтади.

"Мен: "Менга умуман тегинмасангиз ҳам, фарқи йўқ", дейишим мумкин эди, чунки ўша пайтда ўзимни айнан шундай ҳис қилардим," дейди у CBeebies Parenting Helpline'га ҳамбошловчилик қилаётганда.

Жинсий ва муносабатлар бўйича терапевт Рейчел Голднинг айтишича, оналар кўпинча туғруқдан кейинги олти ҳафталик текширувдан сўнг яна яқинликка қайтади.

"Менимча, бу одамларни яна жинсий алоқа қилиш вақти келди, деб ўйлашига сабаб бўлади, лекин бу тўғри эмас."

Ҳоллининг айтишича, унинг жинсий иштиёқи 2023 йилда ўғли Альфа-Жакс туғилгандан кейин пасайган ва у ҳар қандай яқинликдан қоча бошлаган.

"Унга [эрим Жейкобга] тегиниш ёки эркалаш каби ҳар қандай турда меҳр кўрсатсам, бу тўлиқ жинсий алоқага олиб келишини ҳис қилардим ва буни хоҳламасдим".

"Унга нисбатан бирор нарса қилишга қўрқиб қолдим."

Эри билан очиқ бўлиш ёрдам берганини айтади у.

"Сени қучоқлаб, силаб-сийпалаётганимда, бу кейинги босқичга олиб келмаслиги мумкинми? Чунки у ёғини истамаяпман, деб айтганимдан сўнг, тўсатдан ҳамма нарса анча яхшиланди, босим йўқолди."

Унинг эри Жейкоб мени ёқтирмай қолди деб хавотирда эди.

"Мен унга: «Бунинг сенга ҳеч қандай алоқаси йўқлигини тушунишинг керак. Ҳозир ўзимни шундай ҳис қиляпман, лекин сен ҳақингда фикрим ўша-ўша", дедим."

"Ҳозир ёки ҳатто яқин бир неча ой ичида жинсий алоқа қилишни унчалик хоҳламайман. Бу мен бошдан кечираётган муаммо ва фақат ўзим уни ҳал қилишим керак".

Ҳолли шу каби муаммоларни бошдан кечираётган эр-хотинлар янада очиқроқ бўлишлари мумкинлигига умид қилади.

"Одамлар фарзандли бўлгандан кейин муносабатлар ўзгаради, дейишади, лекин ўйлашимча, бу ҳолга тушмагунча, ҳақиқатан ҳам қанчалик ўзгаришини тушунмайсиз".

Акушерлик ва гинекология бўйича мутахассис, доктор Женнифер Линколннинг айтишича, аёлларнинг туғруқдан кейин жинсий алоқада бўлишни истамаслигининг кўплаб сабаблари бор.

"Соғайиш жараёнлари содир бўлади. Бачадон ҳомиладорликдан олдинги ҳажмига қайтиши учун тахминан олти ҳафта керак. Қин ёки оралиқдаги ҳар қандай йиртилиш ҳам битади".

Аёллар учун либидога таъсир қилиши мумкин бўлган катта гормонал ўзгаришлар ҳам кузатилади.

"Эстроген ва прогестерон даражаси кескин пасаяди. Эстрогенларнинг пастлиги жинсий алоқани оғриқли қилиши мумкин бўлган қин қуруқлиги каби жисмоний ўзгаришларга олиб келиши мумкин."

"Одатда менопаузани аёл бошдан кечирадиган гормонлар даражасидаги энг кескин ўзгариш деб ўйлашади, лекин аслида бу туғруқ атрофидаги бир неча кундир".

Рейчелнинг таъкидлашича, жинсий алоқани тиклаш учун аниқ вақт чегараси йўқ ва бу ҳар бир жуфтлик учун ўзига хос.

Бу фақат оналарга таъсир қиладиган масала эмас. CBeebies Parenting Helpline'нинг уч ой олдин фарзандли бўлган бир тингловчиси Френки жуфти жинсий алоқани тўхтатганини айтди.

"Ҳозирда танамни ёқтирмаяпман ва жуфтимдан кўпроқ эътибор хоҳлайман, лекин у энди мен билан жинсий алоқада бўлишни хоҳламайди. Ўзимни муаллақ қолгандек ҳис қиляпман."

Рейчелнинг айтишича, эркаклар баъзида ўз ҳис-туйғуларини очиқ айтишга қийналади.

"Ота бўлиш эркакда турли хил ҳисларни уйғотиши, бу эса унинг жинсий алоқада бўлишни хоҳламаслигига катта таъсир кўрсатиши мумкин."

NCT туғруқ хайрия ташкилоти амалиётчиси Флер Паркернинг айтишича, эркаклар бу ҳис-туйғуларга жиддий эътибор бермайди.

"Жуфтингиз билан ўзингизни қандай ҳис қилаётганингиз ҳақида очиқ гаплашиш ҳақиқатан ҳам ёрдам бериши мумкин; улар нима бўлаётганини ёки нимани ўйлаётганингизни билади деб ўйламанг."

Женнифер қийналаётган жуфтликларга ёрдам сўрашни тавсия қилади.

"Баъзи янги ота-оналар яқинлик ўз-ўзидан қайтишини билиб, осон мослашади, бошқалари эса жиддий қийинчиликларга дуч келади."

"Агар бу катта муносабатлар можаросига сабаб бўлса, мен профессионал ёрдамни тавсия қиламан – бу эр-хотинлар учун маслаҳат, жинсий терапия ёки доимий жисмоний муаммолар учун тиббий текширувдир".

Туғруқдан кейин жинсий алоқани қайта бошлаш учун жуфтликларга маслаҳатлар: