నాసా లూసీ మిషన్: సౌర కుటుంబం మూల కణాలు గురు గ్రహం చుట్టూ తిరుగుతున్నాయా?

ఫొటో క్యాప్షన్, అట్లాస్ రాకెట్‌లో నింగిలోకి దూసుకెళ్లిన లూసీ

- రచయిత, జొనాథన్ అమోస్
- హోదా, సైన్స్ కరస్పాండెంట్
17 అక్టోబర్ 2021

సౌర వ్యవస్థలోని శిలాజాల గుట్టు తెలుసుకునేందుకు కేప్ కెనావెరల్ నుంచి ఒక స్పేస్ క్రాఫ్ట్ పంపించారు.

'లూసీ' అనే ఈ స్సేస్‌క్రాఫ్ట్ గురు (జూపిటర్-బృహస్పతి) గ్రహం కక్ష్యలోకి చేరి అక్కడి రెండు గ్రహశకలాల సముదాయలను అధ్యయనం చేస్తుంది. ఇందులో ఒకటి.. సముదాయం భ్రమణ మార్గంలో గురు గ్రహానికి ముందు.. రెండోది వెనుక వైపు ఉంటాయి.

సౌర వ్యవస్థ ఏర్పాటు తొలి దశ పరిణామలను అర్థం చేసుకోవడానికి ఈ గ్రహ శకలాల అధ్యయనం తోడ్పడుతుందని నాసా శాస్త్రవేత్తలు చెబుతున్నారు.

ఫ్లోరిడాలోని కేప్ కెనావెరల్ నుంచి అట్లాస్-5 రాకెట్‌లో లూసీ స్పేస్‌క్రాఫ్ట్‌ను శనివారం గ్రీనిచ్ కాలమానం ప్రకారం 9.45గంటలకు పంపించారు.

ఈ మిషన్ కోసం పన్నెండేళ్ల కాలానికి గాను నాసా 98.1 కోట్ల డాలర్లు (సుమారు రూ. 7,360 కోట్లు) ఖర్చు చేయాలని ప్రాథమికంగా నిర్ణయించింది.

ఆఫ్రికాలోని మానవ శిలాజం లూసీ — ఫొటో క్యాప్షన్, ఆఫ్రికాలోని మానవ అస్థిపంజర శిలాజం లూసీ

ఆఫ్రికాలో లూసీ అనే మానవ శిలాజం ఒకటి ఉంది. మానవ జాతి ఉనికి గురించి చాలా విషయాలు తెలుసుకోవడానికి ఉపయోగపడింది ఈ శిలాజమే.

దాన్ని స్ఫూర్తిగా తీసుకుని అదే పేరుతో నాసా ఈ మిషన్ చేపడుతోంది.

''ట్రోజన్ ఆస్టరాయిడ్స్ గురు గ్రహ కక్ష్యకు 60 డిగ్రీల కోణంలో తిరుగుతాయి'' అని కొలరాడోలోని సౌత్‌వెస్ట్ రీసెర్చ్ ఇనిస్టిట్యూట్‌కు చెందిన హాల్ లెవిసన్ చెప్పారు. లూసీ స్పేస్‌క్రాఫ్ట్ ప్రధాన అధ్యయనకర్తగా ఆయన వ్యవహరిస్తున్నారు.

Skip ఎక్కువమంది చదివినవి and continue reading

ఎక్కువమంది చదివినవి

End of ఎక్కువమంది చదివినవి

''గురుడు, సూర్యుడి ఆకర్షణ శక్తి ప్రభావంతో ఈ గ్రహశకలాలు ఆ కక్షలో నిలకడగా తిరుగుతుంటాయి. సౌర వ్యవస్థ ఏర్పడిన తొలినాళ్లలో ఏదైనా వస్తువు అక్కడ పడితే.. అది ఎప్పటికీ అలా స్థిరంగా ఉండిపోతుంది. కాబట్టి గ్రహాలు వేటి నుంచి ఏర్పడ్డాయో వాటి శిలాజాలే ఈ శకలాలు'' అన్నారు హాల్ లెవిసన్.

ఫొటో క్యాప్షన్, ఆస్టరాయిడ్స్ వద్ద లూసీ(ఊహాచిత్రం)

ఒక నగరమంత పరిమాణంలో లేదా అంతకంటే భారీగా ఉండే శకలాల ఆకారం, నిర్మాణం, ఉపరితల పరిస్థితులు, వాటి ఏర్పాటుకు కారణమైన పదార్థాల సమ్మేళనం వంటి అనేక అంశాలను లూసీ అధ్యయనం చేస్తుంది.

గురు గ్రహానికి ఉన్న ఉపగ్రహాలలో ఉండే పదార్థాలతోనే ఈ శకలాలు ఏర్పడ్డాయా అనేదీ అధ్యయనం చేస్తుంది.

''ఉదాహరణకు మనం కైపర్ బెల్ట్‌గా పిలిచే వాటిలో ఉండే పదార్థాలతోనే ఇవి కూడా తయారైతే.. కైపర్ బెల్ట్‌లోనే ఇవి కూడా తయారై తరువాత కక్షలోకి చేరాయని అనుకోవాల్సి ఉంటుంది'' అని సౌత్ వెస్ట్ రీసెర్చ్ ఇనిస్టిట్యూట్ మిషన్ శాస్త్రవేత్త డాక్టర్ కార్లీ హోవెట్ చెప్పారు.

కొన్ని అసాధారణ నావిగేషన్ లెక్కల ఫలితమే ఈ మిషన్ అని చెప్పారు కార్లీ.

లూసీ మొత్తం 600 కోట్ల కిలోమీటర్లు ప్రయాణించనుంది. ట్రోజాన్ల సముదాయాన్ని ఇది 2027/28లో అధ్యయనం చేయనుంది. అనంతరం గురుగ్రహం రెండో వైపు గల శకలాల సముదాయాన్ని 2033లో చేరుతుంది.