ఫ్రాన్స్: ఈఫిల్ టవర్ వద్ద భారీ పెయింటింగ్.. మానవాళి ఐక్యతను చాటేందుకు

పారిస్‌లోని ప్రఖ్యాత ఈఫిల్ టవర్ వద్ద పచ్చికపై ఫ్రాన్స్ కళాకారుడు ప్రత్యేకమైన భారీ చిత్రాలు వేశారు. మానవాళి ఐక్యతను చాటుతూ మనుషులు ఒకరి చేతిని మరొకరు పట్టుకొని ఉన్న ఈ భారీ చిత్రాలను ప్రకృతిలో తేలిగ్గా కలిసిపోయే పదార్థంతో వేశారు.

ఇలాంటి భారీ పెయింటింగ్‌లు వేయడంలో ఆయన సిద్ధహస్తుడు. ఆయన్ను సాపే అని పలుస్తారు. అసలు పేరు గ్విలామే లెగ్రోస్. ఈ చిత్రాలు వేసిన కొన్ని రోజులకే ప్రకృతిలో కలిసిపోతాయి.

ఛాంప్ డే మార్స్ పార్కులో ఆరు వందల మీటర్లకు పైగా పొడవున వేసిన ఈ బొమ్మలను ఈఫిల్ టవర్‌పై నుంచి చూస్తే అబ్బురపరుస్తాయి.

ఆయన గతంలో ప్రపంచవ్యాప్తంగా కొండల వాలుపై, పార్కుల్లో ఈ చిత్రాలు వేశారు.

ఇప్పుడు 'బియాండ్ వాల్స్' పేరుతో ఈ చిత్రాలు వేశారు.

మధ్యదరా సముద్రంలో ప్రయాణించేటప్పుడు అందులో మునిగిపోయే ముప్పున్న వలసదారులకు సహాయం అందించేందుకు కృషిచేసే స్వచ్ఛంద సంస్థ 'ఎస్‌వోఎస్ మెడిటరేన్' గౌరవార్థం ఆయన ఈ కార్యక్రమం చేపట్టారు.

గత ఏడాది మధ్యదరా సముద్రాన్ని దాటుతూ సగటున రోజుకు ఆరుగురు చనిపోయారని ఐక్యరాజ్యసమితి చెబుతోంది.

మనిషికి మనిషి అంతకంతకూ దూరమవుతున్న ప్రస్తుత తరుణంలో, కలసి ఉండటం గురించి చెప్పేందుకు ఈ చిత్రాలు వేసినట్లు సాపే ద గార్డియన్ పత్రికతో చెప్పారు.

లండన్, బెర్లిన్, నైరోబీ, బ్యూనస్ ఎయిర్స్ సహా ప్రపంచవ్యాప్తంగా 20 ప్రధాన నగరాల్లో సాపే ఇలాంటి పెయింటింగ్ వేయనున్నారు.

ఈ ప్రాజెక్టులో భాగంగా తొలుత పారిస్‌లో వేశారు.

గమనిక: అన్ని ఫొటోలు కాపీరైట్‌కు లోబడి ఉన్నవి.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)